SUNSTARTV
ସନଷ୍ଟାର ଟିଭି ବ୍ୟୁରୋ:ବିରୋଧୀଙ୍କୁ ଭି.କେ. ପାଣ୍ଡିଆନ୍ ଖୋଲା ଚାଲେଞ୍ଜ । ଏଥର ଓଡିଶାରେ ପୁଣି ସରକାର ଗଢିବ ବିଜୁ ଜନତା ଦଳ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁଣି ହେବେ ମୁଖ୍ୟମନ୍ତ୍ରୀ । ବ୍ରଜରାଜନଗରରେ ଦଳୀୟ ପ୍ରଚାର ବେଳେ ଜନସାଧାରଣଙ୍କୁ ସମ୍ବୋଧନ କରି ପାଣ୍ଡିଆନ କହିଛନ୍ତି ଏଥର ବିଜେଡି ଜିତିବା ସୁନିଶ୍ଚିତ । ଆଉ ଜୁନ୍ ୯ ତାରିଖ ସାଢେ ୧୧ଟାରୁ ଗୋଟାଏ ଭିତରେ ଶପଥ ନେବେ ନବୀନ ପଟ୍ଟନାୟକ । ଯଦି ବିଜୁ ଜନତାଦଳ ଏଥର ସରକାର ଗଠନ ନ କରେ ତାହାଲେ ମୁଁ ରାଜନୀତିରୁ ସନ୍ୟାସ ନେଇଯିବି । ଏହା ମୋର ବିରୋଧୀଙ୍କୁ ଖୋଲା ଚାଲେଞ୍ଜ ।
ବିରୋଧୀ ମାନେ ମତେ ସବୁ ସମୟରେ ଗାମୁଛା ଗୁମାସ୍ତା ଭଳି ନୂଆ ନୂଆ ନାଁ ଦେଉଛନ୍ତି ।ଏଥିସହିତ ଓଡିଶାରେ ପରିବର୍ତ୍ତନର ହାୱା ଚାଲୁଛି ବୋଲି ମଧ୍ୟ କହୁଛନ୍ତି । କିନ୍ତୁ ସେହି ନେତାମାନେ ଭୁଲି ଯାଉଛନ୍ତି ଯେ ତାଙ୍କ ଦଳ ହିଁ ସେମାନଙ୍କ ଉପରେ ଭରଷା କରୁନାହିଁ । ବିରୋଧୀ ଦଳର ନେତା ମିଠା ମିଠା ମିଛ କଥା କହି ଲୋକଙ୍କୁ ଭୂଆଁ ବୁଲାଉଛନ୍ତି । କିନ୍ତୁ ନିର୍ବାଚନ ସରିଗଲା ସେମାନଙ୍କ ଦେଖା ଦର୍ଶନ ମିଳିବନି । ଧର୍ମେନ୍ଦ୍ରଙ୍କୁ ଟାର୍ଗେଟ କରି ପାଣ୍ଡିଆନ କହିଛନ୍ତି ଢେଙ୍କାନାଳ ସଂସଦୀୟ କ୍ଷେତ୍ରପାଇଁ ଲାଗିଥିଲେ ଏବେ ସମ୍ବଲପୁରରୁ ଲଢୁଛନ୍ତି । ଆଜିକାଲି ସେ ବଡ ବଡ ଭାଷଣ ଦେଉଛନ୍ତି । ମୁଖମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ଅଶାଳୀନ ମନ୍ତବ୍ୟ ଦେଉଛନ୍ତି । ମୁଁ ବ୍ରଜରାଜନଗର ମାଟିରୁ ତାଙ୍କୁ ଆହ୍ୱାନ ଦେଉଛି , ସେ ତାଙ୍କର ମୁଖ୍ୟମନ୍ତ୍ରୀ ପ୍ରାର୍ଥୀ ଘୋଷଣା କରନ୍ତୁ । ନିର୍ବାଚନୀ ସଭାରେ ବିଜେଡି ନେତା ଭି.କେ ପାଣ୍ଡିଆନ୍ ମୁଖ୍ୟମନ୍ତ୍ରୀଙ୍କ ଲୋକଭିମୁଖୀ କାର୍ଯ୍ୟ ଏବଂ ବ୍ରଜରାଜନଗର ବିକାଶର ହିସାବ ଦେଇଛନ୍ତି ।
