ପୁରୀ ଜିଲ୍ଲା ନିମାପଡ଼ା ବ୍ଲକ୍ ଅଧିନସ୍ଥ ଚଅଁରପଦା ପଞ୍ଚାୟତରେ ଥିବା ଆଦର୍ଶ ବିଦ୍ୟାଳୟରେ ପଡ଼ିଲା ତାଲା।ଶତାଧିକ ଛାତ୍ର ଛାତ୍ରୀ ଆଜି ଏକତ୍ରିତ ହୋଇ ବିଦ୍ୟାଳୟର ମୁଖ୍ୟ ଫାଟକରେ ତାଲା ପକାଇବା ସହ ଗେଟ୍ ସାମନାରେ ଧାରଣା ଦେଇଥିବା ଦେଖିବାକୁ ମିଳିଛି।ସୂଚନା ଅନୁଯାୟୀ ଦୀର୍ଘ ଦିନ ହେବ ଅନେକ ଅବ୍ୟବସ୍ଥା ଘେରରେ ବିଦ୍ୟାଳୟ ରହିଥିଲେ ମଧ୍ୟ ଛାତ୍ର ଛାତ୍ରୀଙ୍କ ଅଭିଯୋଗକୁ କେହି କର୍ଣ୍ଣପାତ କରୁନଥିବା ଛାତ୍ର ଛାତ୍ରୀ ଅଭିଯୋଗ ଆଣିଛନ୍ତି।ବିଦ୍ୟାଳୟର ଶୌଚାଳୟ ଗୁଡ଼ିକ ସମ୍ପୂର୍ଣ ଭାଙ୍ଗି ରୁଜି ଯାଇଥିବା ବେଳେ ଖେଳ ପଡିଆ ନଥିବା କଥା ଛାତ୍ର ଛାତ୍ରୀ ମାନେ କହିଛନ୍ତି।ପୂର୍ବ ସରକାର ସମୟରେ ଛାତ୍ରୀ ମାନଙ୍କ ସୁବିଧା ନିମନ୍ତେ ଏକ ଛାତ୍ରୀ ନିବାସ ଅନେକ ଦିନ ହେବ ନିର୍ମାଣ ହୋଇସାରିଥିଲେ ମଧ୍ୟ ଏପର୍ଯ୍ୟନ୍ତ ତାହା କାର୍ଯ୍ୟକ୍ଷମ ହୋଇନଥିବା ଜଣାପଡିଛି।ପାଠ ପଢୁଥିବା ସମସ୍ତ ଛାତ୍ର ଛାତ୍ରୀଙ୍କୁ ତାଙ୍କ ବିଦ୍ୟାଳୟର ପରିଚୟ ପତ୍ର ଏପର୍ଯ୍ୟନ୍ତ ମିଳିନଥିବା ମଧ୍ୟ ଅଭିଯୋଗ କରିଛନ୍ତି ଛାତ୍ର ଛାତ୍ରୀ।ବିଦ୍ୟାଳୟର ସମସ୍ତ କାର୍ଯ୍ୟ ପାଇଁ ଅନୁଦାନ ଆସୁଥିଲେ ମଧ୍ୟ ଅଧକ୍ଷ ସେଗୁଡିକୁ କାର୍ଯ୍ୟକାରୀ କରୁନଥିବା ଅଭିଯୋଗରେ ଓ ତାଙ୍କ ବଦଳି ଦାବିରେ ଆଜି ଶତାଧିକ ଛାତ୍ର ଛାତ୍ରୀ ଗେଟ୍ ସାମ୍ନାରେ ଧାରଣା ଦେଇଥିବା ଜଣାପଡିଛି।ଅନ୍ୟପକ୍ଷରେ ପିଲା ମାନଙ୍କ ସମସ୍ତ ଅଭିଯୋଗକୁ ଅଧକ୍ଷ ଖଣ୍ଡନ କରିବା ସହିତ ତାଙ୍କ ଉପରେ ଆସିଥିବା ସମସ୍ତ ଆରୋପ ମିଥ୍ୟା ବୋଲି କହିଛନ୍ତି।ତେବେ ଘଟଣା ସ୍ଥଳରେ ନିମାପଡ଼ା ତହସିଲଦାର ପହଞ୍ଚି ପିଲା ମାନଙ୍କୁ ବୁଝା ଶୁଝା କରିବା ସହିତ ବିଦ୍ୟାଳୟର ସମସ୍ତ ଶିକ୍ଷକ ,ଶିକ୍ଷୟତ୍ରୀ ଓ ଅଧକ୍ଷଙ୍କ ସହ ଆଲୋଚନା କରିଥିବା ଦେଖିବାକୁ ମିଳିଛି।
