ରାସନ କାର୍ଡଧାରୀଙ୍କ ପାଇଁ ବଡ଼ ଖବର । ଯଦି ଆପଣ ଆୟକର ଦାତା, ତେବେ ରାସନ କାର୍ଡ ତାଲିକାରୁ ଆପଣ ବାଦ ପଡିବେ । ସରକାର ଏନେଇ ବଡ ସୂଚନା ଦେଇଛନ୍ତି । ସରକାରଙ୍କ ଟ୍ୟାକ୍ସ ଭରୁଛନ୍ତି ଓ ମାଗଣା ରାସନ ମଧ୍ୟ ପାଉଛନ୍ତି, ତାହେଲେ ଆପଣ ଲିଷ୍ଟରୁ ବାଦ ପଡିବେ । ଖାଦ୍ୟମନ୍ତ୍ରୀ କୃଷ୍ଣ ପାତ୍ର ସୂଚନା ଦେଇ କହିଛନ୍ତି, ଆୟକରଦାତାଙ୍କୁ ରାସନ କାର୍ଡରୁ ବାଦ ଦେବା ପାଇଁ ପ୍ରକିୟା ଆରମ୍ଭ କରାଯିବ। ଆହୁରି ମଧ୍ୟ ଏନେଇ ବିଭାଗ ପାଖରେ ତଥ୍ୟ ପହଞ୍ଚିବା ପରେ ଅନୁଧ୍ୟାନ କରିବ ବିଭାଗ। ପୂର୍ବ ସରକାର ସମୟରେ ଆୟକରଦାତା ରାସନ କାର୍ଡ ପାଇଥିଲେ। କେତେ ପାଇଛନ୍ତି ତାହାକୁ ନେଇ ଅନୁଧ୍ୟାନ ଚାଲିଛି ବୋଲି ମନ୍ତ୍ରୀ କହିଛନ୍ତି । ପୂରା ତଥ୍ଯ ଆସିବା ପରେ ଆୟକରଦାତାଙ୍କୁ ଏହି ତାଲିକାରୁ ବାଦ ଦିଆଯିବ । ପ୍ରାୟ ୪ଲକ୍ଷ ଆୟକର ଦାତା ରାସନ କାର୍ଡ ପାଇଥିବାର ସୂଚନା ରହିଛି । ସରକାରଙ୍କ ମାନଦଣ୍ଡ ଅନୁସାରେ ଟ୍ୟାକ୍ସପେୟର୍ସମାନେ ମାଗଣା ରାସନ ପାଇବା ପାଇଁ ଯୋଗ୍ୟ ନୁହଁନ୍ତି । କିନ୍ତୁ ବର୍ତ୍ତମାନ ବି ଅନେକ କରଦାତା ମାଗଣା ରାସନ ସ୍କିମ ଅଧୀନରେ ରାସନ ପାଉଛନ୍ତି । ଏହା ଉପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମନ୍ତ୍ରୀ କହିଛନ୍ତି । ରାସନ ବଣ୍ଟନରେ ସ୍ୱଚ୍ଛତା ପାଇଁ ରାସନ କାର୍ଡଧାରୀଙ୍କ ପାଇଁ ଇକେୱାଇସି କରିବା ବାଧ୍ୟତାମୂଳକ କରିଛନ୍ତି ରାଜ୍ୟସରକାର । ଏହା ଜରିଆରେ ଅଯୋଗ୍ୟ ହିତାଧିକାରୀଙ୍କୁ ଏହି ତାଲିକାରେ ବାଦ ପକାଇବାକୁ ସରକାର ଯୋଜନା କରିଛନ୍ତି । ଫ୍ରି ରାସନ ସ୍କିମ ଜରିଆରେ ରାସନ ପାଇବା ପାଇଁ କିଛି ନିର୍ଦ୍ଦିଷ୍ଟ ମାନଦଣ୍ଡ ରହିଛି ।ସେହି ମାନଦଣ୍ଡ ପୂରଣ କରୁଥିବା ହିତାଧିକାରୀ ହିଁ ରାସନ ପାଇବା ପାଇଁ ଯୋଗ୍ୟ ହେବେ ।
