SUNSTARTV
ସନଷ୍ଟାରଟିଭି ବ୍ୟୁରୋ: ଦେଶର ବଡ ଧନୀ ତଥା ଜିଓ ରିଲିଏନ୍ସକମ୍ପାନୀର ମାଲିକ ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ ଆସନ୍ତା ମାସ ୧୨ ତାରିଖରେ ବିବାହ କରୁବାକୁ ଯାଉଛନ୍ତି । ଯାହକୁ ନେଇ ଏବେଠୁ ସମସ୍ତ ପ୍ରସ୍ତୁତି ସରିଛି । ତେବେ ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟଙ୍କ ବାହାଘର କାର୍ଡ ମଧ୍ୟ ଛପା ସରିଛି । ଯାହାକୁ ଦେଖିଲେ ଯେ କେହି ବି ଆଶ୍ଚର୍ଯ୍ୟ ଚକିତ ହୋଇଯାଉଛି । କାରଣ ମୁକେଶ ଅମ୍ବାନୀ ତାଙ୍କ ସାନ ପୁଅର ବିହାଘରକୁ ସ୍ୱତନ୍ତ୍ର କରିବାକୁ ଯାଇ ଏକ ନିଆରା ବିବାହ କାର୍ଡ ତିଆରି କରିଛନ୍ତି । ଏଥିସହିତ ଅମ୍ବାନୀ ପରିବାର କାର୍ଡ ମଧ୍ୟ ବାଣ୍ଟିବା ଆରମ୍ଭ କରିଛନ୍ତି । ତେବେ ଅନନ୍ତଙ୍କ ମାଆ ନୀତା ଅମ୍ବାନୀ ପୁଅର ବିବାହ କାର୍ଡ ସର୍ବ ପ୍ରଥମେ ବାବା ବିଶ୍ୱନାଥନଙ୍କୁ ଦେବା ପାଇଁ କାଶୀ ଯାତ୍ରା କରିଥିଲେ । ଯେଉଁ ସମୟରେ ଏହି ବିବାହ କାର୍ଡର ଟିକେ ଜଲକ ଦେଖିବାକୁ ମିଳିଥିଲା । ଏଥିସହିତ ବର୍ତ୍ତମାନ ଏହି କାର୍ଡର ଫଟୋ ମଧ୍ୟ ଭାଇରାଲ ହେଉଛି । ଯାହାକୁ ଦେଖିଲେ ସାଧାରଣ ଲୋକ ସହଜରେ ବିଶ୍ୱାସ କରି ପାରିବ ନାହିଁ ।
ତେବେ ଅନନ୍ତ ଏବଂ ରାଧିକାଙ୍କ ବିବାହ କାର୍ଡରେ ଅତିଥିମାନଙ୍କ ପାଇଁ ରହିଛି ଏକ ବିଶେଷ ଉପହାର । ଲାଲ୍ ବାକ୍ସରେ ରହିଛି ଭଗବାନ ଗଣେଶ, ରାଧା-କୃଷ୍ଣ ଏବଂ ମା’ ଦୁର୍ଗାଙ୍କର ସୁନାମୂର୍ତ୍ତି ଏବଂ ଏକ ରୂପାମନ୍ଦିର । ଏଥିସହିତ କାର୍ଡରେ ଏକ ରୂପାବାକ୍ସ ମଧ୍ୟ ରହିଛି । ବିବାହ କାର୍ଡ ଭକ୍ତି ଏବଂ ପରମ୍ପରାରେ ରହିଛି ପରିପୂର୍ଣ୍ଣ । ସେୟାର୍ ହୋଇଥିବା ଭିଡିଓରେ, ବାକ୍ସ ଖୋଲିବା ମାତ୍ରେ, ହିନ୍ଦୀର ଏକ ମନ୍ତ୍ର ବାଜୁଛି ଏବଂ କାର୍ଡରେ ବିଭିନ୍ନ କାର୍ଯ୍ୟକ୍ରମ ବିଷୟରେ ସୂଚନା ଦିଆଯାଇଛି । ଏହାବ୍ୟତୀତ କାର୍ଡରେ ଏକ ରୁମାଲ୍ ମଧ୍ୟ ଦେଖିବାକୁ ମିଳିଥିଲା । ଯେଉଁଥିରେ ଅନନ୍ତ-ରାଧିକାଙ୍କ ନାଁର ପ୍ରଥମ ଅକ୍ଷର, ‘ଏ’ ଏବଂ ‘ଆର’ ଲେଖାଯାଇଛି ।
ତେବେ ଗତ ବର୍ଷ ଅନନ୍ତ ଅମ୍ବାନୀ ଏବଂ ରାଧିକା ମର୍ଚାଣ୍ଟଙ୍କ ନିର୍ବନ୍ଧ ସରିଥିବା ବେଳେ ଚଳିତ ବର୍ଷ ମାର୍ଚ୍ଚମାସରେ ଗୁଜୁରାଟର ଜାମନଗରରେ ସେମାନଙ୍କର ପ୍ରଥମ ଗ୍ରାଣ୍ଡ ପ୍ରି – ୱେଡିଙ୍ଗ ପାର୍ଟି ଆୟୋଜନ ହୋଇଥିଲା । ଏହାପରେ ଜୁନ୍ ମାସରେ ତାଙ୍କର ଦ୍ୱିତୀୟ ପ୍ରି –ୱେଡିଙ୍ଗ କ୍ରୁଜଠାରେ ଅନୁଷ୍ଠିତ ହୋଇଥିଲା । ଯେଉଁଥିରେ ବଲିଉଡର ବଡ ବଡ ସେଲିବ୍ରିଟିଙ୍କ ଠାରୁ ଆରମ୍ଭ କରି ବିଦେଶର ନାମୀ ଦାମୀ କଳାକାର ମାନେ ଯୋଗ ଦେଇଥିଲେ । ତେବେ ଅନନ୍ତ ଏବଂ ରାଧିକାଙ୍କ ବିବାହର ମଧ୍ୟ ସମାନ ଦୃଶ୍ୟ ଦେଖିବାକୁ ମିଳିବ ବୋଲି ଆଲୋଚନା ହେଉଛି । ଏଥିସହିତ ବିବାହର ଗ୍ରାଣ୍ଡ ସେଲିବ୍ରେସନ କେଉଁଠି ହେବ ତାହା ଏଯାଏଁ ଜଣାପଡି ନାହିଁ ।
