ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର : ଇନଷ୍ଟାଗ୍ରାମ ପୋଷ୍ଟକୁ ନେଇ ଅଭାବନୀୟ ଘଟଣା। ଜୀବନ ହାରିଲେ ମଧ୍ୟପ୍ରଦେଶ ଉଜୈନର ଜଣେ ୧୬ ବର୍ଷୀୟ ଆର୍ଟିଷ୍ଟ। ଇନଷ୍ଟାଗ୍ରାମ ରିଲକୁ ନେଇ ହଜାର ହଜାର ହେଟ କମେଣ୍ଟ ଆସିବା ପରେ ଜୀବନ ହାରିବାକୁ ନିଷ୍ପତ୍ତି ନେଇଥିଲେ କୁନି କଳାକାର। ଉଜୈନର ପ୍ରାନଶୁ ନାମକ ଏହି କଳାକାର ଇନଷ୍ଟାଗ୍ରାମ ଜରିଆରେ ମେକଅପ ଓ ବ୍ୟୁଟି ସଂକ୍ରାନ୍ତ ବିଷୟ ପୋଷ୍ଟ କରୁଥିଲେ।
ଗତ ଦୀପାବଳିରେ ଏକ ଶାଢ଼ି ପିନ୍ଧି ସେ ଏକ ରିଲ୍ ପୋଷ୍ଟ କରିଥିଲେ। ପ୍ରାନଶୁଙ୍କ ଏହି ପୋଷ୍ଟକୁ ନେଇ ୪୦୦୦ରୁ ଅଧିକ କମେଣ୍ଟ ପୋଷ୍ଟ ହୋଇଥିଲା । ତେବେ ଏହି କମେଣ୍ଟକୁ ନେଇ ପ୍ରାନଶୁ ଆତ୍ମହତ୍ୟା କରିଥିବା କୁହାଯାଇଛି । ତାଙ୍କର ୧୬ ହଜାରରୁ ଅଧିକ ଫଲୋଅର ରହିଛନ୍ତି । ଏହାକୁ ନେଇ ମେଟା ମାଲିକାନାରେ ଥିବା ଇନଷ୍ଟାଗ୍ରାମକୁ ବିଭିନ୍ନ ମହଲରୁ କରାଯାଇଛି ସମାଲୋଚନା।
ଏଲଜିବିଟିକ୍ୟୁ ସମ୍ପ୍ରଦାୟକୁ ସୁରକ୍ଷା ଦେବାରେ ଇନଷ୍ଟାଗ୍ରାମ ବିଫଳ ବୋଲି କହିଛନ୍ତି ଅଭିନେତ୍ରୀ ତ୍ରିନେତ୍ରା। ଏହା ସମେତ ଏଲଜିବିଟିକ୍ୟୁର ଅନେକ ସଦସ୍ୟ ମଧ୍ୟ ଇନଷ୍ଟାଗ୍ରାମ, ଏକ୍ସ, ଫେସବୁକକୁ ମଧ୍ୟ ସମାଲୋଚନା କରିଛନ୍ତି। ଆତ୍ମହତ୍ୟା ପରେ ଏହାର ତଦନ୍ତ କରାଯାଉଛି ବୋଲି କହିଛନ୍ତି ନଗାହିରି ଥାନାଧିକାରୀ କେଏସ ଗେହଲଟ। ନାବାଳକ ଓ ନାବାଳିକାଙ୍କୁ ନିରାପତ୍ତା ଦେବାରେ ଇନଷ୍ଟାଗ୍ରାମ ବିଫଳ ହେଉଥିବା ଅଭିଯୋଗ କରି ଗତ ୨୦୨୧ରେ ଇସ୍ତଫା ଦେଇଥିଲେ ମେଟାର ଏକଜିକ୍ୟୁଟିଭ ଆର୍ଥର ବେଜାର। ଏପରିକି ୧୩ ବର୍ଷ ବୟସ୍କ ପିଲାଙ୍କ ଲାଗି ଇନଷ୍ଟାଗ୍ରାମ ଅନୁପଯୁକ୍ତ ବୋଲି ସେ କହିଥିଲେ।
