ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର : ଗଣତାନ୍ତ୍ରିକ ସମାଜରେ ଏକ ମୁକ୍ତ ତଥା ଦାୟିତ୍ଵପୂର୍ଣ୍ଣ ଗଣମାଧ୍ୟମର ଗୁରୁତ୍ୱକୁ ପାଳନ କରିବା ପାଇଁ ପ୍ରତିବର୍ଷ ନଭେମ୍ବର 16 ରେ ଜାତୀୟ ପ୍ରେସ ଦିବସ ପାଳନ କରାଯାଏ। ଦେଶର ସମ୍ବାଦ ଗଣମାଧ୍ୟମ ପାଇଁ ଏକ ନିୟାମକ ସଂସ୍ଥା ଭାବେ କାର୍ଯ୍ୟ କରୁଥିବା ପ୍ରେସ୍ କାଉନସିଲ୍ ଅଫ୍ ଇଣ୍ଡିଆର ପ୍ରତିଷ୍ଠାକୁ ସ୍ମରଣ କରିବା ପାଇଁ ଏହି ଦିନ ପାଳନ କରାଯାଏ।
ପ୍ରେସ ଦିବସ ପାଳନ ଭାରତ ପରି ଏକ ଜୀବନ୍ତ ଗଣତନ୍ତ୍ରରେ ଏକ ମୁକ୍ତ ଏବଂ ନିରପେକ୍ଷ ଗଣମାଧ୍ୟମର ମହତ୍ତ୍ଵକୁ ସ୍ମରଣ କରାଏ। ଗଣମାଧ୍ୟମର ସମ୍ମୁଖୀନ ହେଉଥିବା ଆହ୍ୱାନ ଏବଂ ନୈତିକ ସାମ୍ବାଦିକତାର ଆବଶ୍ୟକତାକୁ ଆଲୋକିତ କରିବା ପାଇଁ ଏହି ଦିନ ସାରା ଦେଶରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଛି। ଏହି ଅବସରରେ ସାମ୍ବାଦିକ ତଥା ଗଣମାଧ୍ୟମ ବୃତ୍ତିଗତମାନେ ମଧ୍ୟ ସେମାନଙ୍କର ଆଦର୍ଶ କାର୍ଯ୍ୟ ପାଇଁ ବିଭିନ୍ନ ସଂଗଠନ ଦ୍ୱାରା ସମ୍ମାନିତ ହୋଇ ସ୍ୱଚ୍ଛତା, ଗଣତନ୍ତ୍ର ଏବଂ ସାମାଜିକ ନ୍ୟାୟକୁ ପ୍ରୋତ୍ସାହିତ କରିବାରେ ସେମାନେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି।
ପ୍ରେସ କାଉନସିଲର ମୁଖ୍ୟ ଉଦ୍ଦେଶ୍ୟ ହେଲା ଗଣମାଧ୍ୟମକୁ ସୁରକ୍ଷା ଦେବା ଓ ଖବରର ଗୁଣବତ୍ତା ଅକ୍ଷୁର୍ଣ୍ଣ ରଖିବା। ସାମ୍ବାଦିକମାନେ ଯେପରି କୌଣସି ବାହ୍ୟ ଶକ୍ତି ଚାପରେ ମୁଣ୍ଡ ନନୁଆଁଇ ଜନହିତରେ କାର୍ଯ୍ୟ କରିବେ ତାହାର ଦାୟିତ୍ୱ ନେଇଛି ପ୍ରେସ କାଉନସିଲ। ସରକାର ଓ ସାଧାରଣ ଜନତାଙ୍କ ମଧ୍ୟରେ ଗଣମାଧ୍ୟମ ହେଉଛି ସେତୁ। ତୃଣମୂଳ ସ୍ତରରେ ଲୋକଙ୍କ ସ୍ୱର ଉତ୍ଥାପନ କରିବା ହେଉ ଅବା ରାଜନେତାମାନଙ୍କର ବାର୍ତ୍ତା ସମାଜକୁ ପହଞ୍ଚାଇବାରେ ଏହା ପ୍ରମୁଖ ମାଧ୍ୟମ। ସମଗ୍ର ବିଶ୍ବରେ ଅନେକ ପ୍ରେସ୍ ଓ ମିଡିଆ କାର୍ଯ୍ୟ କରୁଥିଲେ ହେଁ ଭାରତୀୟ ପ୍ରେସ କାଉନସିଲ ଅନନ୍ୟ, କାରଣ ଏହା ଏକମାତ୍ର ସଂସ୍ଥା ଯାହା ପ୍ରେସକୁ ସମ୍ପୂର୍ଣ୍ଣ ସ୍ବାଧୀନତା ପ୍ରଦାନ କରେ ।
