ସନଷ୍ଟାର ଟିଭି ବ୍ୟୁରୋ
ନୂଆଦିଲ୍ଲୀ : ୱାନ ନେସନ ୱାନ ଇଲେକସନ ଲାଗି ଗଠିତ କମିଟିକୁ ନେଇ ବିବାଦ । ଏହି କମିଟିରେ ସଦସ୍ୟ ରହିବାକୁ ମନା କଲେ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ । ସେ କହିଛନ୍ତି କମିଟି ନାମକୁ ମାତ୍ର ଗଠିତ ହୋଇଛି ।
ଅଧୀର ରଞ୍ଜନ ଚୌଧୁରୀ ଏକ ପତ୍ରରେ ଦର୍ଶାଇଛନ୍ତି କମିଟିରେ ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କୁ ସ୍ଥାନ ଦେବା ବଦଳରେ ପୂର୍ବତନ କଂଗ୍ରେସ ନେତା ଗୁଲାମ ନବୀ ଆଜାଦଙ୍କୁ ସ୍ଥାନ ଦିଆଯାଇଛି । ସଂସଦୀୟ ଗଣତନ୍ତ୍ର ଲାଗି ଏହା ଏକ ଧକ୍କା ବୋଲି ସେ କହିଛନ୍ତି।
ସେପଟେ କଂଗ୍ରେସ ନେତା ଦିଗବିଜୟ ସିଂ ଓ ଜୟରାମ ରମେଶ ମଧ୍ୟ କମିଟିକୁ ବିରୋଧ କରିଛନ୍ତି । ଦେଶରେ ଗୋଟିଏ ସମୟରେ ନିର୍ବାଚନ ସମ୍ଭବ ନୁହେଁ । ଗତକାଲି ଏକ ରାଷ୍ଟ୍ର ଏକ ନିର୍ବାଚନ ଲାଗି ଗଠିତ କମିଟିରେ କେନ୍ଦ୍ରମନ୍ତ୍ରୀ ଅମିତ ଶାହ, କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ, ରାଜ୍ୟସଭାରେ ପୂର୍ବତନ ବିରୋଧୀ ଦଳ ନେତା ଗୁଲାମ ନବୀ ଆଜାଦ, ଏନକେ ସିଂହ, ସୁଭାଷ କଶ୍ୟପ, ହରିଶ ସାଲଭେ, ସଞ୍ଜୟ କୋଠାରୀ ସ୍ଥାନ ପାଇଥିଲେ । ପୂର୍ବରୁ କମିଟିର ଅଧ୍ୟକ୍ଷ ଭାବେ ପୂର୍ବତନ ରାଷ୍ଟ୍ରପତି ରାମନାଥ କୋବିନ୍ଦଙ୍କ ନାମ ଘୋଷିତ ହୋଇଥିଲା । ଆସନ୍ତା ୧୮ରୁ ୨୨ ତାରିଖ ଯାଏଁ ସଂସଦ ଅଧିବେଶନ ବସିବା ଲାଗି ଜରୁରୀ ଘୋଷଣା ପରେ ଏହି କମିଟି ଗଠିତ ହୋଇଥିଲା । ଏହି ଅଧିବେଶନରେ ଶୂନ୍ୟକାଳ, ପ୍ରଶ୍ନୋତ୍ତର, ପ୍ରାଇଭେଟ ମେମ୍ବର ବିଜନେସ କାଳ ରହିବ ନାହିଁ ।
