ସନଷ୍ଟାର ଟିଭି ବ୍ୟୁରୋ
ନୂଆଦିଲ୍ଲୀ: ଆସନ୍ତା ୨୦ ତାରିଖରୁ ସଂସଦର ମୌସୁମୀ ଅଧିବେଶନ ଆରମ୍ଭ ହେବ । ଏହା ଅଗଷ୍ଟ ୧୧ ତାରିଖ ଯାଏ ଚାଲିବ । ୨୩ ଦିନ ଧରି ଗୃହ ଚାଲିବ । ନୂଆ ସଂସଦ ଭବନରେ ବସିବ ମୌସୁମୀ ଅଧିବେଶନ । ମେ ୨୮ ତାରିଖରେ ନୂଆ ସଂସଦ ଭବନ ଉଦଘାଟିତ ହୋଇଥିଲା ।
ମୌସୁମୀ ଅଧିବେଶନ ନେଇ କେନ୍ଦ୍ର ସଂସଦୀୟ ବ୍ୟପାର ମନ୍ତ୍ରୀ ପ୍ରହ୍ଲାଦ ଯୋଶୀ ସୂଚନା ଦେଇଛନ୍ତି । ଏଥର ବି ସରଗରମ ରହିବ ସଂସଦ । ବିରୋଧୀ ଆମ ଆଦମୀ ପାର୍ଟି ଜୋରଦାର ବିରୋଧ କରିପାରେ । ଅନ୍ୟ ବିପକ୍ଷ ଦଳ ମଧ୍ୟ ଆମ ଆଦମୀ ପାର୍ଟିକୁ ସହଯୋଗ କରିପାରନ୍ତି ।
ଏଥର ସଂସଦରେ ୟୁସିସି ବିଲ୍ ଉପସ୍ଥାପନ ହୋଇପାରେ । ଅନ୍ୟାନ୍ୟ ବିଲ୍ ହୋଇପାରେ ପାରିତ । ୟୁସିସି ବା ସମାନ ନାଗରିକ ସଂହିତା ବିଲ୍ ଉପରେ ହଙ୍ଗାମା ହେବାର ସମ୍ଭାବନା ଅଛି । ସମାନ ନାଗରିକ ସଂହିତା ବିଲ୍ ନେଇ ଆସନ୍ତା ୩ ତାରିଖରେ ରାୟ ଜାଣିବାକୁ ସଂସଦୀୟ ସ୍ଥାୟୀ ସମିତି ବୈଠକ ଡାକିଛି ।
