ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର: ସିକିଲ ସେଲ ରୋଗରୁ ଶିଶୁଙ୍କୁ ଦୂରେଇ ରଖିହେବ। ଏହାର ସମ୍ଭାବନା ୫୦ ପ୍ରତିଶତ ବଂଶାନୁକ୍ରମିକ ରକ୍ତ ସମ୍ବନ୍ଧୀୟ ସମସ୍ୟା ହୋଇଥିବାରୁ ଗର୍ଭଧାରଣ ପୂର୍ବରୁ ପିତାମାତା ଡାକ୍ତରଙ୍କ ପରାମର୍ଶ ନେବା ଉଚିତ ବୋଲି ବିଶ୍ୱ ସିକିଲ ସେଲ ଦିବସ ଅବସରରେ କିମସ-ଭୁବନେଶ୍ୱର ଶିଶୁରୋଗ ବିଶେଷଜ୍ଞ ଡା ପଲାଶ ଦାସ ସୂଚନା ଦେଇଛନ୍ତି। ଏ ନେଇ ସଚେତନତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଡା ଦାସ କହିଛନ୍ତି। ଏହି ରୋଗର ଉପଚାର କଷ୍ଟସାଧ୍ୟ, ଯାହା ଜୀବନ ବ୍ୟପୀ ଚାଲିଥାଏ ଏବଂ ଅତ୍ୟନ୍ତ ବ୍ୟୟ ବହୁଳ। ଏହା ଶିଶୁଟିର ଜୀବନଶୈଳୀରେ ଅସୁବିଧା ସୃଷ୍ଟି କରେ। ଏହାର ପ୍ରତିକାର ସମ୍ଭବ ଯଦି, ଦମ୍ପତ୍ତି ଗର୍ଭଧାରଣ ପୂର୍ବରୁ ନିଜର ରୋଗ ବାହକ ସ୍ଥିତି ସଂପର୍କରେ ଅବଗତ ହେବା ସହ ଭବିଷ୍ୟତ ଶିଶୁର ଜେନେଟିକ୍ ସ୍ଥିତିକୁ ଜାଣି ଗର୍ଭଧାରଣକୁ ନଷ୍ଟ କରିବେ। ଗର୍ଭସ୍ଥ ଶିଶୁଠାରେ ସିକିଲସେଲ ସମସ୍ୟା ନଥିବା ନିଶ୍ଚିତ ହେବାପରେ ସୁସ୍ଥ ଶିଶୁ ଜନ୍ମ ଦେବା ବିଷୟରେ ଚିନ୍ତା କରିବା ଉଚିତ ବୋଲି ଡା. ଦାସ କହିଛନ୍ତି। ସୂଚନା ମୁତାବକ ସିକିଲସେଲ ରୋଗ ହେଉଛି ଏକ ଜେନେଟିକ ଅବସ୍ଥା, ଯେଉଁଥିରେ ଶିଶୁର ଲୋହିତ ରକ୍ତ କଣିକା (ଆରବିସି) ଧାନ କଟାରେ ବ୍ୟବହୃତ ‘ଦାଆ’ ଆକୃତିର। ସାଧାରଣ ଆରବିସି ‘ବରା’ ଆକାରରେ ଥିବାବେଳେ ଏହା ଶିଶୁଟିର ସ୍ୱାସ୍ଥ୍ୟ କ୍ଷେତ୍ରରେ ୬ ମାସରୁ ୧ବର୍ଷ ମଧ୍ୟରେ ଅସୁବିଧା ସୃଷ୍ଟି କରିବା ଆରମ୍ଭ ହୋଇଥାଏ।
ଲକ୍ଷଣ:
ସିକିଲ ସେଲ ଆକ୍ରାନ୍ତ ଶିଶୁ ଜନ୍ମ ପରେ ସ୍ୱାଭାବିକ ଦେଖାଯାଏ। କିନ୍ତୁ ଏହା ଥରେ ବଢ଼ିବା ଆରମ୍ଭ ହେଲେ ହାତ ଓ ପାଦ ଆଙ୍ଗୁଠି ଫୁଲିବା, ପ୍ରଦାହ, ରକ୍ତହୀନତା, ପ୍ଳିହା ବୃଦ୍ଧି, ଜଟିଳ ସଂକ୍ରମଣ ଏବଂ ନିମୋନିଆ, ମସ୍ତିଷ୍କାଘାତ ଓ ପକ୍ଷାଘାତ ଆଦି ଲକ୍ଷଣ ପ୍ରକାଶ ପାଇଥାଏ। ‘ଦାଆ’ ପ୍ରକାରର ଶିଶୁର ଲୋହିତ ରକ୍ତ କଣିକା (ଆରବିସି) ରକ୍ତ ପ୍ରବାହରେ ଅବରୋଧ ସୃଷ୍ଟି କରିଥାଏ। ଫଳରେ ଶିଶୁଟି ବିଭିନ୍ନ ସ୍ୱାସ୍ଥ୍ୟଗତ ସମସ୍ୟାର ସମ୍ମୁଖୀନ ହୋଇଥାଏ। ତେଣୁ ଶିଶୁକୁ ବିପଦରୁ ଦୂରେଇ ରଖିବା ପାଇଁ ସିକିଲ ସେଲ ଗୁଣବାହକ ପିତାମାତା ଗର୍ଭଧାରଣ ପୂର୍ବରୁ ପରୀକ୍ଷା କରାଇବା ଜରୁରୀ। ସିକିଲ ସେଲ ମସ୍ତିଷ୍କାଘାତ, ଛାତିରେ ତୀବ୍ର ଯନ୍ତ୍ରଣା ଏବଂ ଜୀବନ ପ୍ରତି ବିପଦ ଥିବା ସଂକ୍ରମଣ ଏବଂ ପ୍ଳିହାରେ ସୂକ୍ଷ୍ମ ସଂକ୍ରମଣ ଆଦି ଶିଶୁ ଜୀବନକୁ ଦୁର୍ବିସହ କରିଦିଏ।
ଚିକିତ୍ସା:
ଏହି ରୋଗରେ ପୀଡ଼ିତ ହୋଇଥିବା ସନ୍ଦେହ ହେଲେ ଶିଶୁ ଚିକିତ୍ସା କେନ୍ଦ୍ରକୁ ଆସି ଡାକ୍ତରଙ୍କ ପରାମର୍ଶ ନେବା ଉଚିତ। ପ୍ରାଥମିକ ଟିକାକରଣ ଚିକିତ୍ସା ପ୍ରକ୍ରିୟା ପ୍ରଭାବଶାଳୀ ହୋଇପାରିବ। ସମଗ୍ର ବିଶ୍ୱର ଏହାର ଜେନେଟିକ୍ ଚିକିତ୍ସା ନେଇ ଗବେଷଣା ଜାରି ରହିଛି। ସିକିଲ ସେଲ ରୋଗରେ ଆକ୍ରାନ୍ତ ଶିଶୁମାନେ ଭିନ୍ନକ୍ଷମ ପ୍ରମାଣପତ୍ର ମଧ୍ୟ ପାଇପାରିବେ ବିଭିନ୍ନ ସରକାରୀ ଯୋଜନା, ଉଚ୍ଚଶିକ୍ଷା ଏବଂ ସାର୍ବଜନୀନ କ୍ଷେତ୍ରରେ ନିଯୁକ୍ତ ସୁଯୋଗ ମଧ୍ୟ ପାଇପାରିବେ। ସିକିଲ ସେଲ ରୋଗ ଓଡ଼ିଶାର ଢେଙ୍କାନାଳ, ତାଳଚେର, ଅନୁଗୋଳ, ସମ୍ବଲପୁର, ସୁନ୍ଦରଗଡ଼, କନ୍ଧମାଳ, କଳାହାଣ୍ଡି ଓ ଦକ୍ଷିଣ ଓଡ଼ିଶାର କେତେକ ଅଞ୍ଚଳରେ କେତେକ କାରଣରୁ ଏହି ରୋଗ ପରିଲକ୍ଷିତ ହୋଇଥାଏ। ଉପକୂଳ ଓଡ଼ିଶାର କେତେକ ଅଞ୍ଚଳରେ ଏହି ରୋଗ ଦେଖାଯାଏ। ଅନ୍ତର୍ଜାତୀୟସ୍ତରରେ ନାଇଜେରିଆ, କଙ୍ଗୋ ଏବଂ ଭାରତରେ ସିକିଲ ସେଲ ଆକ୍ରାନ୍ତଙ୍କ ସଂଖ୍ୟା ଅଧିକ ରହିଛି। ଭାରତରେ ମଧ୍ୟପ୍ରଦେଶର ଛୋଟ-ନାଗପୁର ଏବଂ ଓଡ଼ିଶାରେ ପ୍ରତ୍ୟେକ ୧୦୦ରୁ ୩ ଜଣଙ୍କଠାରେ ଏହି ରୋଗ ଚିହ୍ନଟ ହେଉଛି। ଭାରତରେ ୪.୩ ପ୍ରତିଶତ ଶିଶୁ ସିକିଲ ସେଲ ପୀଡ଼ିତ ଥିବା ବେଳେ କେବଳ ଓଡ଼ିଶାରେ ଏହା ୯.୧ପ୍ରତିଶତ ରହିଛି।
