ସନଷ୍ଟାର ଟିଭି ବ୍ୟୁରୋ
ଉଦଳା ; ବାପା ଏବଂ ପୁଅ ହେବ ତ ଏମିତି । ସାଙ୍ଗ ହୋଇ ଲୁଟ୍ କରିଲେ ଆଉ ସାଙ୍ଗ ହୋଇ ଧରା ମଧ୍ୟ ପଡିଲେ । ଉଭୟ ଧରା ପଡିବା ପରେ ପୋଲିସ୍ ତାଙ୍କ ନିକଟରେ ଥିବା ଚୋରି ମୋବାଇଲ୍ ଦେଖି ଟେରା । ଦୁଇ ବାପା, ପୁଅ ଏବଂ ପୁଅର ସାଙ୍ଗ ତିନି ଜଣଙ୍କୁ ଗିରଫ କରିବା ପରେ ସେମାନଙ୍କ ନିକଟରୁ ଜବତ ହୋଇଛି ୮୦ ଗୋଟି ମୋବାଇଲ୍ । ଖୁଂଟା ପୋଲିସ୍ ଏହି ତିନି ଜଣ ଲୁଟେରାଙ୍କୁ ଗିରଫ କରିଛି । ଗତ ୧୩ ତାରିଖରେ ଖୁଂଟା ବଜାରରେ ଥିବା ଏକ ମୋବାଇଲ୍ ଦୋକାନରେ ଲୁଟ୍ ହୋଇଥିବା ଥାନାରେ ଅଭିଯୋଗ ହେବା ପରେ ପୋଲିସ୍ ତଦନ୍ତ ଆରମ୍ଭ କରିଥିଲା । ଏବଂ ଗତକାଲି ରାତିରେ ୩ ଜଣ ଲୁଟେରାକୁ ପୋଲିସ୍ ଗିରଫ କରିଛି । ଗିରଫ ଲୁଟେରାମାନେ ହେଲେ କେନ୍ଦୁଆମୁଣ୍ଡି ଗ୍ରାମର ବାପା ସୁଭାକର ମହାକୁଡ ଏବଂ ପୁଅ ଯତିନ୍ଦ୍ର ମହାକୁଡ । ଏହା ସହିତ ଯତିନ୍ଦ୍ରଙ୍କ ସହଯୋଗୀ ତଥା ସାଙ୍ଗ ଚତୁରଶିଳା ଗ୍ରାମର ସତ୍ୟବାନ ବେହେରାକୁ ମଧ୍ୟ ପୋଲିସ୍ ଗିରଫ କରିଛି । ଏହି ଲୁଟେରା ବାପା ଏବଂ ପୁଅ ପୁରା ଘଟଣାର ମାଷ୍ଟର ମାଇଣ୍ଡ ଥିବା ବେଳେ ସେମାନେ ମୋବାଇଲ୍ ଲୁଟ୍ କରି ନେଇ କପ୍ତିପଦା ଥାନା ପୋଡାଡିହା ଗ୍ରାମରେ ଲୁଚାଇ ରଖିଥିଲେ । ପୋଲିସ୍ ସେମାନଙ୍କୁ ଧରିବା ପରେ ସେମାନଙ୍କ ନିକଟରୁ ୮୦ ଗୋଟି ଚୋରି ମୋବାଇଲ୍ ଜବତ କରିଛି ଯାହାର ମୂଲ୍ୟ ୫ ଲକ୍ଷ ଟଙ୍କାରୁ ଉର୍ଦ୍ଧ୍ୱ ହେବ । ତେବେ ଏହି ତିନି ଜଣଙ୍କର ମୋବାଇଲ୍ ଲୁଟେରା ଗ୍ୟାଙ୍ଗ ସହିତ କଣ ଲିଙ୍କ୍ ରହିଛି ଏବଂ ଅନ୍ୟ କେଉଁଠି କେଉଁଠି ଏହି ଲୁଟେରା ଲୁଟ୍ କରିଛନ୍ତି ତାହାର ଖୋଳତାଡ କରୁଛି ପୋଲିସ୍ ।
ରିପୋର୍ଟ ; ଆଲୋକ କୁମାର ଵେହେରା (ଉଦଳା)
