ସନଷ୍ଟାର ଟିଭି ବ୍ୟୁରୋ
କୋରପୁଟ: କୋରପୁଟ ଜିଲ୍ଲା ନନ୍ଦପୁର ବ୍ଲକ ପାଡୁଆ ଥାନା ଅନ୍ତର୍ଗତ ପୂଜାରିପୁଟ ଗାଁରେ ପୂର୍ବ ଶତ୍ରୁତାକୁ ନେଇ ଗୋଟିଏ ପରିବାରକୁ ମାରଣାତ୍ମକ ଆକ୍ରମଣ କରାଯାଇଛି। ଘଟଣାଟି ଗତ ୧୨ ତାରିଖ ଦିନ ଘଟିଛି। ସୂଚନାନୁଯାୟୀ ପୂଜାରିପୁଟ ଗ୍ରାମର ଉପେନ୍ଦ୍ର କୁମାର ସିଂ ଙ୍କ ପରିବାରକୁ ସେହି ଗ୍ରାମର ସାରଜିତ ମଣ୍ଡଳ, ରଞ୍ଜିତ ମଣ୍ଡଳ,ମାଦାଲ ମଣ୍ଡଳ, ବିଶ୍ୱନାଥ ମଣ୍ଡଳ,ମାଧବ ମାଖାଲ ମିଶି ସଂଘବଧ୍ୟ ଭାବେ ଘରେ ପଶି ଆକ୍ରମଣ କରିଛନ୍ତି। ଆକ୍ରମଣରେ ଉପେନ୍ଦ୍ର କୁମାର ସିଂ, ତାଙ୍କ ମା ରାଧା ସିଂ, ବାପା ନିର୍ମଳ ସିଂ,ସ୍ତ୍ରୀ ସଞ୍ଜିତା ସିଂ, ଦାଦା ବିମଳ ସିଂ, ଖୁଡି ଲକ୍ଷ୍ମୀ ସିଂ ଓ ଭାଇ ପ୍ରଭାତ ସିଂ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ମା ରାଧା ସିଂ ଙ୍କ ଅବସ୍ଥା ଗୁରୁତ୍ବର ଥିବାରୁ ତାଙ୍କୁ କୋରାପୁଟ ସହିଦ ଲକ୍ଷ୍ମଣନାୟକ ମେଡ଼ିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ରାଧା ସିଂଙ୍କ ମୁଣ୍ଡରେ ଗଭୀର କ୍ଷତ ହୋଇଥିବା ସହ ଗୋଡ଼ରେ ଗଭୀର ଆଘାତ ଲାଗିଥିବା ସେ ପ୍ରକାଶ କରିଛନ୍ତି। ପରିବାରର ଅନ୍ୟ ସଦସ୍ୟ ମାନେ ପାଡୁଆ ଡାକ୍ତର ଖାନାରେ ଚିକିତ୍ସିତ ହେଉଥିବା ଜଣାପଡିଛି। ଏନେଇ ଉପେନ୍ଦ୍ର ସିଂ ପାଡୁଆ ଥାନାରେ ଲିଖିତ ଅଭିଯୋଗ କରିଥିଲେ ମଧ୍ୟ ଥାନା ପକ୍ଷରୁ ଏଯାଏଁ କୌଣସି ଅଭିଯୁକ୍ତଙ୍କୁ ଗିରଫ କରାଯାଇନଥିବା ଉପେନ୍ଦ୍ର ପ୍ରକାଶ କରିଛନ୍ତି। ଅଭିଯୁକ୍ତ ମାନେ ଉପେନ୍ଦ୍ରଙ୍କ ପରିବାରକୁ ଗାଁ ଛାଡି ଅନ୍ୟତ୍ର ଚାଲିଯିବାକୁ କହୁଥିବା ସହ ଗାଁରୁ ନଗଲେ ଜୀବନରେ ମାରିଦେବୁ ବୋଲି ଧମକ ଦେଉଥିବା ସେ କହିଛନ୍ତି। ଉପେନ୍ଦ୍ରଙ୍କ ପରିବାରକୁ ଗାଁରେ ଏକଘରକିଆ କରାଯାଇଥିବାରୁ ତାଙ୍କ ପରିବାରର ସମସ୍ତ ସଦସ୍ୟ ଭୟଗ୍ରସ୍ତ ହୋଇରହୁଥିବା ସେ ଜଣାଇଛନ୍ତି। ଅଭିଯୁକ୍ତଙ୍କୁ ତୁରନ୍ତ ଗିରଫ କରି ତାଙ୍କୁ ନ୍ୟାୟ ପ୍ରଦାନ କରିବାକୁ ସେ ନିବେଦନ କରିଛନ୍ତି।(ରିର୍ପୋଟ:ବେଂକଟେସ ରାଓ)
