ଶତ୍ରୃତାରୁ ମୃତ୍ୟୁ

ସନଷ୍ଟାର ଟିଭି ବ୍ୟୁରୋ

ଉଦଳା : ପୂର୍ବ ଶତ୍ରୃତାରୁ ଜଘନ୍ୟ ହତ୍ୟାକାଣ୍ଡ।ହତ୍ୟାକରି ଡ୍ୟାମରେ ପିଙ୍ଗିଲେ ଦୁବୁର୍ତ୍ତ। ଦେୱାନବାହାଳୀ ଗ୍ରାମର ରାମାଏ ସିଂ ଗତ ସୋମବାର ଘରୁ ନିକଟସ୍ଥ  ଉପିସାହି ହାଟକୁ ଯାଇଥିଲେ । ହେଲେ ହାଟରୁ ଆଉ ସେ ଘରକୁ ଫେରି ନଥିଲେ । ଗତକାଲି ସୁନେଇ ଡ୍ୟାମରେ ତାଙ୍କର ମୃତଦେହ ଭାସୁଥିବା ସ୍ଥାନୀୟ ଲୋକେ ଦେଖି ପୋଲିସ୍‌କୁ ଖବର ଦେଇଥିଲେ । ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ଗତକାଲି ଉକ୍ତ ମୃତଦେହକୁ ଡ୍ୟାମରୁ ଉଦ୍ଧାର କରିଛି। ପୋଲିସ୍ ମୃତଦେହ ଉଦ୍ଧାର କରିବା ପରେ ଏହା ହତ୍ୟାକାଣ୍ଡ ବୋଲି ଜାଣିବାକୁ ପାଇଥିଲେ । ସେପଟେ ମୃତକ ରାମାଏଙ୍କ ପୁଅ ଅଭିଯୋଗ ଅନୁସାରେ ପୂର୍ବ ଶତ୍ରୃତାକୁ ନେଇ ଏହି ହତ୍ୟାକାଣ୍ଡ  କରାଯାଇଛି। ସୂଚନାମୁତାବକ ରାମାଏଙ୍କ ଭାଇଙ୍କ ସହିତ ପୂର୍ବରୁ ଗୁଣିଗାରେଡି ସନ୍ଦେହକୁ ନେଇ ଏକ ବିବାଦ ହୋଇଥିଲା  ଯାହାକି ସମାଧାନ ମଧ୍ୟ ହୋଇଥିଲା । ହେଲେ ସେହି ରାଗରେ ଅନେକ ଦିନ ହେବ ଉଭୟଙ୍କ ମଧ୍ୟରେ ଶତ୍ରୃତା ରହିଥିଲା । ତେଣୁ ପୂର୍ବ ଶତୃତାରୁ ଏହି ହତ୍ୟାକାଣ୍ଡ ହୋଇଥିବା ସେ ଅଭିଯୋଗ କରିଛନ୍ତି । ପୋଲିସ୍ ଏହି ଘଟଣାରେ ସନ୍ଦେହରେ ୪ ଜଣଙ୍କୁ ଥାନାରେ ଅଟକ ରଖି ତଦନ୍ତ ଜାରି ରଖିଛି ।(ରିର୍ପୋଟ:ଆଲୋକ କୁମାର ବେହେରା)