ସନଷ୍ଟାର ଟିଭି ବ୍ୟୁରୋ
ଉଦଳା :ଘର ସହିତ ଜୀଅନ୍ତା ଜଳିଗଲେ ଯୁବକ । ଜଣେ ପକ୍ଷାଘାତ ରୋଗୀ ଘର ଭିତରେ ରହିଥିବା ବେଳେ ହଠାତ୍ ଘରେ ନିଆଁ ଲାଗିଥିଲା । ଆଉ ନିଆଁ ପ୍ରକୋପରୁ ବଞ୍ଚି ପାରି ନ ଥିଲେ ପକ୍ଷାଘାତ ରୋଗୀ । ଶେଷରେ ଘର ସହିତ ଜୀଅନ୍ତା ଜଳିଗଲେ ଯୁବକ । ଏଭଳି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି ଖୁଂଟା ଥାନା ନବକିଶୋରପୁର ଗ୍ରାମରେ । ନବକିଶୋରପୁର ଗ୍ରାମର କୁଅଁର ଟୁଡୁ ମଧ୍ୟାହ୍ନ ସମୟରେ ଖାଦ୍ୟ ଖାଇ ସାରି ଘରେ ଶୋଇଥିଲେ । ସେ ପକ୍ଷାଘାତ ଆକ୍ରାନ୍ତ ହୋଇଥିବାରୁ ସେ ଶୋଇବା ପରେ ସ୍ତ୍ରୀ ବାସନ୍ତୀ ମହିଳା ସଂଘ ମିଟିଂକୁ ଚାଲିଯାଇଥିଲେ । ହେଲେ ହଠାତ୍ କେଇ ଘଣ୍ଟା ପରେ କୁଅଁର ଟୁଡୁଙ୍କ ଚିତ୍କାର ଗ୍ରାମବାସୀ ଶୁଣିବାକୁ ପାଇଥିଲେ । ପରେ କୁଅଁର ଟୁଡୁଙ୍କ ଘରେ ନିଆଁ ଲାଗିଥିବା ଜାଣିବାକୁ ପାଇଲେ। ଏବଂ ଘର ଭିତରେ ଫଶି ରହିଥିବା କୁଅଁର ଟୁଡୁଙ୍କୁ ବଞ୍ଚାଇବାକୁ ଗ୍ରାମବାସୀ ଅନେକ ଚେଷ୍ଟା କରିଥିଲେ ମଧ୍ୟ ବିଫଳ ହୋଇଥିଲେ । ଏ ନେଇ ଖୁଂଟା ଅଗ୍ନିଶମ ବିଭାଗକୁ ଖବର ଦେବା ପରେ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ କରିଥିଲେ ସୁଦ୍ଧା ସେତେବେଳକୁ ଘର ସହିତ ନିଆଁରେ ପୋଡି ହୋଇ ଯାଇଥିଲେ କୁଅଁର । ପୋଲିସ୍ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି ।( ରିର୍ପୋଟ:ଆଲୋକ କୁମାର ଵେହେରା)
