ସନଷ୍ଟାର ଟିଭି ବ୍ୟୁରୋ
ସୋର : ୭୦ ବର୍ଷର ବୃଦ୍ଧାଙ୍କୁ ଦୁଷ୍କର୍ମ କରିବାରେ ବିଫଳ ହେବାରୁ ମାରଣାସ୍ତ୍ରରେ ବୃଦ୍ଧାଙ୍କୁ ଆକ୍ରମଣ କରିଛି ଜଣେ ଯୁବକ । ଏଭଳି ଲଜ୍ୟାଜନକ ଘଟଣା ଘଟିଛି ବାଲେଶ୍ୱର ଜିଲ୍ଲା ବାହାନଗା ବ୍ଲକ ଆରୁହାବାଡ଼ ବଡ଼ମାଝୀସାହି ଗ୍ରାମରେ । ଯୁବକଙ୍କ ଆକ୍ରମଣ ଫଳରେ ବୃଦ୍ଧାଙ୍କ ମୁଣ୍ଡରେ ଗୁରୁତର ଆଘାତ ଲାଗିଥିବା ବେଳେ ତାଙ୍କୁ ଗୁରୁତର ଅବସ୍ଥାରେ ସ୍ଥାନୀୟ ଲୋକେ ଉଦ୍ଧାର କରି ଆମ୍ବୁଲାନ୍ସ ଯୋଗେ ସୋର ଡାକ୍ତରଖାନାରେ ଭର୍ତ୍ତି କରିଛନ୍ତି ।
ସୂଚନାନୁଯାୟୀ, ଆରୁହାବାଡ଼ ମାଝୀସାହି ଗ୍ରାମର ନରେନ୍ଦ୍ର ମାଝୀଙ୍କ ସ୍ତ୍ରୀ ସରସ୍ବତୀ ଘରେ ଏକୁଟିଆ ରହୁଥିବା ବେଳେ ଗତକାଲି ବିଳମ୍ବିତ ରାତ୍ରିରେ ଖାଇପିଇ ଶୋଇବାକୁ ଯାଉଥିଲେ । ତାଙ୍କ ଘର ଖଟ ତଳେ ଜଣେ ଯୁବକ ପୂର୍ବରୁ ଲୁଚି ରହିଥିଲା । ବୃଦ୍ଧା ଶୋଇବାର କିଛି ସମୟ ପରେ ଯୁବକ ଜଣକ ବୃଦ୍ଧାଙ୍କ ସହ ଜୋର ଜବରଦସ୍ତ କରୁଥିବା ବେଳେ ପ୍ରତିରୋଧ କରିବାରୁ ଯୁବକ ତାଙ୍କୁ ଏକ ମାରଣାସ୍ତ୍ରରେ ମୁଣ୍ଡକୁ ଆକ୍ରମଣ କରିଥିଲା। ଫଳରେ ବୃଦ୍ଧାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ରହିଛି। ତେବେ ଘଟଣାସ୍ଥଳରେ ଗୋପାଳପୁର ଫାଣ୍ଡି ପୁଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିବା ସହ ସଂପୃକ୍ତ ଯୁବକଙ୍କୁ ପୋଲିସ୍ ଅଟକ ରଖି ପଚରା ଉଚରା କରୁଛି ।
