ରାଜ୍ୟରେ ବିଜେପି ସରକାର ଗଢିଛି ସତ କିନ୍ତୁ ଏବେ ବି ସରକାରଙ୍କ ସ୍ଥିତି ଦୃଢ ହୋଇପାରିନି । ମନାନ୍ତର ମତାନ୍ତର ଭିତରେ ଛନ୍ଦି ହୋଇପଡିଥିବା ବିଜେପି ଏବେ ବି ରାଜ୍ୟ ସଭାପତିଙ୍କ ନାଁରେ ମୋହର ମାରିପାରିନି । ସେପଟେ ତୃଣମୂଳସ୍ତରର କାର୍ଯ୍ୟ ମଧ୍ୟ ଅସଜଡା ହୋଇ ପଡିରହିଛି । ଅଧାଗଢା ମନ୍ତ୍ରୀ ମଣ୍ଡଳ ପାଇଁ ଅସନ୍ତୋଷର ଶୀକାର ହେଲାଣି ଦଳ । ଆଉ ଏହା ଭିତରେ ମୁଣ୍ଡ ଟେକିଲାଣଇ ଗୋଷ୍ଠୀ ବିବାଦ । ମୁଖ୍ୟମନ୍ତ୍ରୀ ପଦରେ ମୋହନ ବସିଥିଲେ ମଧ୍ୟ ମୋହନଙ୍କୁ ମାନିବାକୁ ନାରାଜ ଦଳର ତୁଙ୍ଗ ନେତା । ରାଜ୍ୟ ବିଜେପିରେ ଏବେ ସମସ୍ତଙ୍କ ମନ ଊଣା । ସରକାର ତ ଆସିଲା, ହେଲେ ନେତାଙ୍କୁ ମିଳୁନି ପରିଚୟ । ଅନେକ ପୁରୁଖା ଓ ଯୁବ ନେତା କ୍ଷମତା ପାଇଁ ଡହଳବିକଳ ହେଉଛନ୍ତି ଆଉ ସେପଟେ ସରକାର ମଧ୍ୟ ନିଜର ଦକ୍ଷତା ଦେଖାଇ ପାରୁନାହାନ୍ତି । ଯେଉଁଥି ପାଇଁ ମୋହନ ସରକାରକୁ ଦିଲ୍ଲୀ ରିମୋର୍ଟରେ କଣ୍ଟ୍ରୋଲ କରାଯାଉଛି ବୋଲି ବୋଲି ଚର୍ଚ୍ଚା ହେଉଛି । ଆଉ ସମସ୍ତ ଘଟଣା ଏବେ ଦଳ ଭିତରେ ଅଧିକ ଅସେନ୍ତାଷ ବଢ଼ାଉଛି । ବାରମ୍ବାର ଏ ନେଇ ବୈଠକ ମଧ୍ୟ ବସୁଛି ହେଲେ ସମସ୍ତଙ୍କୁ ବୁଝାଇବା ସମ୍ଭବପର ହେଉନାହିଁ । କାହା ମନ କାହାକୁ ପାଉନାହିଁ । ବିଜେପି ସରକାରକୁ ଆସି ମଧ୍ୟ ସରକାର କୌଣସି କାର୍ଯ୍ୟ କରିପାରୁ ନାହିଁ । ଅନେକ ସଂସ୍ଥା ଏବେ ବି ବିଜେଡି ଦଖଲରେ ରହିଛି । ଯାହା ବିଜେପି ସରକାରର ବାଟ ଓଗାଳିଛି । ସବୁ ଉନୟନମୂଳକ କାର୍ଯ୍ୟର ଠିକାଦାର ବିଜେଡି ନେତାଙ୍କ ହାତରେ ଆଉ ସେମାନେ ବିଜେଡି ଇଙ୍ଗିତରେ ପରିଚାଳିତ ହେଉଛନ୍ତି । ତେଣୁ ବିଜେପି ସରକାରଙ୍କ କଥା ତାଙ୍କ ଉପରେ ପ୍ରଭାବ ପକାଇପାରୁନାହିଁ ବୋଲି ମଧ୍ୟ ଆଲୋଚନା କରିଛନ୍ତି ବୁଦ୍ଧିଜୀବୀ । ବହୁ ବର୍ଷରୁ କ୍ଷମତାରେ ନଥିବାରୁ ବିଜେପି ନେତାମାନେ କ୍ଷମତା କାର୍ଯ୍ୟକାରୀତାର ରାସ୍ତା ପାଉ ନାହାନ୍ତି । ସେପଟେ ରାଜ୍ୟସଭାପତି କିଏ ହେବ ତାକୁ ନେଇ ମାନସମନ୍ଥନ ଜାରି ରହିଛି । ରାଜ୍ୟ ସଭାପତି ଚୟନରେ ଅହେତୁକ ବିଳମ୍ବ ଦଳ ଭିତରେ ଥିବା ଅସନ୍ତୋଷକୁ ପଦାରେ ପକାଇଛି । ଜାନୁଆରୀ ୧୫ ସୁଦ୍ଧା ରାଜ୍ୟ ସଭାପତି ନିର୍ବାଚନ ସାରିବାକୁ ଟାର୍ଗେଟ ରଖାଯାଇଥିବା ବେଳେ ଫେବୃଆରୀ ସରିବାକୁ ବସିଲାଣି, କିଛି ଚୁଡ଼ାନ୍ତ ହୋଇପାରୁନାହିଁ। ନିଗମ ଅଧ୍ୟକ୍ଷ ପାଇଁ ବି ଅଙ୍କକଷା ଚାଲିଛି। ହେଲେ ସବୁକିଛି ଅଧାପନ୍ତରିଆ ହୋଇପଡିରହିଛି । କାରଣ ରାଜ୍ୟ କର୍ମକର୍ତ୍ତାଙ୍କ ହାତରେ କିଛି ନାହିଁ । ସବୁ ସିଗ୍ନାଲ କେନ୍ଦ୍ର ଆଡୁ କଣ୍ଟ୍ରୋଲ ହେଉଛି । ରାଜନୈତିକ ସମୀକ୍ଷକମାନଙ୍କ କହିବାନୁଯାୟୀ ହଠାତ ବିଜେପି ସରକାରକୁ ଆସିବା, ଅସ୍ବାଭାବିକ ଭାବେ ମୁଖ୍ୟମନ୍ତ୍ରୀ ବଛାଯିବା ଯୋଗୁଁ ସରକାର ଏଯାଏଁ ଗତିଶୀଳ ହୋଇପାରିନାହିଁ। ରାଜ୍ୟ ବିଜେପିରେ ଗୋଷ୍ଠୀ କନ୍ଦଳ ସାଙ୍ଗକୁ ନିଜ ଇଚ୍ଛାରେ ମୁଖ୍ୟମନ୍ତ୍ରୀ କାମ କରିପାରୁନଥିବା ଯୋଗୁଁ ସବୁ କିଛି ଅଯଥାରେ ବିଳମ୍ବିତ ହୋଇ ଚାଲୁଛି। ଯେୁଁଥି ପାଇଁ ରାଜ୍ୟ ବିଜେପି ସବୁ କଥାରେ ବାଟବଣା ହୋଇପଡିଛି । ତେବେ ଆଗାମୀ ଦିନରେ ଶାସକ ଦଳ ଏସବୁକୁ ମ୍ୟାନେଜ କରୁଛି ନା ବେହାଲ ହୋଇ ବାଟ ଛାଡୁଛି ତାହା ଉପରେ ସମସ୍ତଙ୍କ ନଜର ।
