ଦିଲ୍ଲୀ ବିଧାନସଭା ନିର୍ବାଚନରେ ‘ଆପ’ ଦଳର ଶୋଚନୀୟ ପରାଜୟ ହୋଇଛି । ନିର୍ବାଚନରେ ଏକତରଫା ବିଜୟ ହାସଲ କରିଛି ଗେରୁଆ ପାର୍ଟୀ । ଏପରିକି ଏହି ରାଜନୈତିକ ପ୍ରତିୟୋଗିତାରେ ପୂର୍ବତନ ମୁଖ୍ୟମନ୍ତ୍ରୀ କେଜ୍ରିୱାଲ ଓ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ପରି ହେବଓ୍ବେଟ ନେତା ବି ହାରିଯାଇଛନ୍ତି । ୨୦୧୫ରେ ୬୭ଟି ଆସନ ସହିତ ବିପୁଳ ବିଜୟ ହାସଲ କରିଥିବା ଆମ ଆଦମୀ ପାର୍ଟି ଦିଲ୍ଲୀରୁ କ୍ଷମତାଚ୍ୟୁତ ହୋଇଯାଇଛି । ଆମ ଆଦମୀ ପାର୍ଟିର ପରାଜୟର ମୁଖ୍ୟ କାରଣ ଦୁର୍ନୀତି ଏବଂ ମିଥ୍ୟା ରାଜନୀତି ବୋଲି କହିବା ଆରମ୍ଭ କରିଛନ୍ତି ଲୋକେ । ବାସ୍ତବରେ ଅରବିନ୍ଦ କେଜ୍ରିୱାଲଙ୍କ ଦଳ ଦୁର୍ନୀତି ବିରୋଧୀ ଆନ୍ଦୋଳନରୁ ଉଭା ହୋଇଥିଲା, କିନ୍ତୁ ମାତ୍ର ୧୦ ବର୍ଷ ପରେ ଦଳର ପ୍ରମୁଖ ନେତାମାନଙ୍କ ବିରୁଦ୍ଧରେ ଦୁର୍ନୀତିର ଗମ୍ଭୀର ଅଭିଯୋଗ ଆସିଥିଲା। ମଦ ଦୁର୍ନୀତିରେ ଅରବିନ୍ଦ କେଜରିୱାଲ, ମନୀଷ ସିସୋଦିଆ ଏବଂ ସଞ୍ଜୟ ସିଂହଙ୍କୁ ଜେଲ ଯିବାକୁ ପଡିଥିଲା। ସେମାନଙ୍କ ବିରୁଦ୍ଧରେ ଆସିଥିବା ଗମ୍ଭୀର ଅଭିଯୋଗର ଦାଗ ଲିଭିପାରିଲା ନାହିଁ । ଏହା ବ୍ୟତୀତ କେଜ୍ରିୱାଲ କେବଳ ଲାଭାର୍ଥୀ ଭୋଟରଙ୍କ ଉପରେ ନିର୍ଭର କରିଥିଲେ। ଗତ ଦୁଇଟି ନିର୍ବାଚନ ପାଇଁ କେଜରିୱାଲ ମାଗଣା ବିଦ୍ୟୁତ୍ ଏବଂ ପାଣି ମାଧ୍ୟମରେ ତାଙ୍କ ରାଜନୀତି କରୁଥିଲେ । ତା ଛଡା ଗତ ଦୁଇଟି ନିର୍ବାଚନରେ ଆମ ଆଦମୀ ପାର୍ଟି ମୁସଲିମ ଏବଂ ଦଳିତ ଅଞ୍ଚଳରେ ବଡ଼ ବିଜୟ ପାଇଥିଲା, କିନ୍ତୁ ଏଥର ଏହି ଭୋଟରମାନେ ଉଭୟ ଅଞ୍ଚଳରେ ଆପ୍ ର ହାତ ଛାଡିଥିବା ଦେଖିବାକୁ ମିଳିଛି । ପ୍ରକୃତରେ, ଯେତେବେଳେ ଦିଲ୍ଲୀରେ ମୁସଲମାନମାନେ କୌଣସି ସଙ୍କଟର ସମ୍ମୁଖୀନ ହେଉଥିଲେ, ସେତେବେଳେ ଆପ ସ୍ୱର ଉଠାଇବା ପରିବର୍ତ୍ତେ ନୀରବ ରହୁଥିଲେ। ନିର୍ବାଚନରେ ମୁସଲମାନମାନେ ସର୍ବସମ୍ମତ ଭାବରେ ଆପକୁ ସମର୍ଥନ କରିନଥିଲେ, ଯାହା ଫଳରେ ଆପ୍ ଏକ କଡ଼ା ପ୍ରତିଯୋଗିତାରେ ପଛରେ ପଡ଼ିଗଲା । ମଦ ପ୍ରସଙ୍ଗ ଦିଲ୍ଲୀର ରାଜନୀତିକୁ ମଧ୍ୟ ଗରମ କରିଥିଲା। ସେମାନଙ୍କ ଉପରେ ଉତ୍ପାଦ ନୀତିରେ ଘୋଟାଲାର ଅଭିଯୋଗ ଆସିଥିଲା। ମଦ ପ୍ରସଙ୍ଗର ପୂର୍ଣ୍ଣ ଫାଇଦା ନେଇଥିଲା ବିଜେପି । ହେଲେ ଆପ୍ ଦଳ ଏହାକୁ ପ୍ରତିହତ କରିପାରିଲ ନାହିଁ। ଏଥି ସହିତ କଂଗ୍ରେସ ମଧ୍ୟ କୋଉଠି ନା କୋଉଠି ଆପ୍ ପରାଜୟର କାରଣ ପାଲଟିଛି । ଗତଥର ଅପେକ୍ଷା ଏହି ନିର୍ବାଚନରେ କଂଗ୍ରେସକୁ ଅଧିକ ଭୋଟ ମିଳିଛି। ଯେଉଁ ଆସନଗୁଡ଼ିକରେ କଂଗ୍ରେସ ଦୃଢ଼ ସ୍ଥିତିରେ ଥିଲା, ସେଠାରେ ଆପ ପଛରେ ପଡ଼ିଯାଇଛି । କଂଗ୍ରେସ ବ୍ୟତୀତ, ଅସଦୁଦ୍ଦିନ ଓୱେସିଙ୍କ AIMIM ମଧ୍ୟ ଆପ୍ କୁ ଶକ୍ତ ଝଟକା ଦେଇଛି । ଅନ୍ୟପଟେ ଅରବିନ୍ଦ କେଜରିୱାଲଙ୍କୁ ସୁପ୍ରିମକୋର୍ଟରୁ ସର୍ତ୍ତମୂଳକ ଜାମିନ ମିଳିଛି। ଏହା ଅନୁଯାୟୀ, କେଜରିୱାଲ ମୁଖ୍ୟମନ୍ତ୍ରୀ ପଦରେ ରହିପାରିବେ ନାହିଁ । କଂଗ୍ରେସ ଏବଂ ବିଜେପି ଜନସାଧାରଣଙ୍କୁ ଏହି ବାର୍ତ୍ତା ଦେବାରେ ସଫଳ ହୋଇଥିଲେ ଯେ ଯଦି ଆପ କ୍ଷମତାକୁ ଆସେ, କେଜରିୱାଲ ମୁଖ୍ୟମନ୍ତ୍ରୀ ହୋଇପାରିବେ ନାହିଁ। ଯାହାର ବଡ ପ୍ରଭାବ ଦଳ ଉପରେ ପଡିଛି । ତା ଛଡା ବିଜେପି ତାର ଲକ୍ଷ୍ୟ ପୂରଣ କରିବାରେ ବାଟ ପାଇଥିଲା । ସବୁଠାରୁ ବଡ କଥା ହେଉଛି କେଜ୍ରିଓ୍ବାଲ ହାରିବାର ମୁଖ୍ୟ କାରଣ ମଧ୍ୟରେ ରହିଛି ଯମୁନା ପାଣିରେ ବିଷ ସମସ୍ୟା । ଦିଲ୍ଲୀ ଜନତାଙ୍କୁ ଅରବିନ୍ଦ କେଜ୍ରିଓ୍ବାଲ୍ ବହୁତ ବଡ ବଡ ପ୍ରତିଶ୍ରୁତି ଦେଇଥିଲେ । ଯେଉଁଥିରେ ସେ ଏହା ମଧ୍ୟ କହିଥିଲେ ଯେ, ଦିଲ୍ଲୀରେ ପ୍ରବାହିତ ହେଉଥିବା ଯମୁନା ନଦୀକୁ ପୁରାପୁରି ପରିବର୍ତ୍ତନନ କରିଦେବେ । ଯମୁନାରେ ଥିବା ମଇଳା ଏବଂ ବିଷାକ୍ତ ପଦାର୍ଥକୁ ସେ ସଫା କରିଦେବେ । କିନ୍ତୁ ତାଙ୍କର ୩ ଥର ମୁଖ୍ୟମନ୍ତ୍ରୀ କାର୍ଯ୍ୟକାଳରେ ବି ସେ ଯମୁନାକୁ ସଫା କରିବାର ପ୍ରତିଶ୍ରୁତି ପୂରଣ କରିପାରିନଥିଲେ । ଫଳରେ ବିଜେପି ଏହାର ଭଲ ଫାଇଦା ନେଇ ଆପ ସରକାରଙ୍କୁ ଟାଗେର୍ଟ କରିଥିଲା । ତେବେ ଆପ ଦଳ ହାରିବାରେ ଆହୁରି ଅନେକ କାରଣ ରହିଥିବା ନେଇ ଦିଲ୍ଲୀରେ ଚର୍ଚ୍ଚା ହେଉଛି
