‘ଆୟୁଷ୍ମାନ’ ଦ୍ୱନ୍ଦ୍ୱରେ ସରକାର ଜନତା

ନବୀନ ସରକାରଙ୍କ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଲୋକଙ୍କ ପାଇଁ ସଞ୍ଜିବନୀ ପାଲଟିଥିଲା । ଗରିବ ଲୋକଟିଏ ସ୍ବାସ୍ଥ୍ୟ ସମସ୍ୟାରୁ ଚିନ୍ତା ମୁକ୍ତ ରହିଥିଲା । ପୁରୁଷଙ୍କ ପାଇଁ 5 ଲକ୍ଷ ଓ ମହିଳାଙ୍କ ପାଇଁ 10 ଲକ୍ଷର ଘୋଷଣା କରି ନବୀନଙ୍କ ବିଜୁ ସ୍ବାସ୍ଥ୍ୟ କଲାଣ ଯୋଜନା ଶ୍ରେଷ୍ଠ ବୋଲି ପ୍ରମାଣିତ କରିଥିଲା ବିଜେଡି । ତେବେ ବର୍ତ୍ତମାନ ରାଜ୍ୟରୁ ବିଜେଡି ସରକାର ଯିବା ଓ ବିଜେପି ସରକାର ଆସିବା ପରେ ଅନେକ ଯୋଜନାର ପରିବର୍ତ୍ତନ ହୋଇଛି । କିନ୍ତୁ ନୂଆ ସରକାର ଯେଉଁ ଯୋଜନା କାର୍ଯ୍ୟକାରୀ କରୁଛନ୍ତି ତାହାକୁ ନେଇ ଲୋକଙ୍କ ଦ୍ବନ୍ଦ୍ବ ଦୂର କରିବାରେ ମୋହନ ବିଫଳ ହୋଇଛନ୍ତି ବୋଲି ଚର୍ଚ୍ଚା ହେଉଛି । ନିର୍ବାଚନୀ ପ୍ରତିଶ୍ରୁତି ଅନୁସାରେ ଓଡ଼ିଶାରେ ବିଜେପି ସରକାର ଆୟୁଷ୍ମାନ ଯୋଜନା କାର୍ଯ୍ୟ କରିବାକୁ ନିଷ୍ପତ୍ତି ନେଇଛନ୍ତି ଓ ଏଥିନିମନ୍ତେ କେନ୍ଦ୍ର ସରକାରଙ୍କ ସହ ବୁଝାମଣାପତ୍ର ସ୍ୱାକ୍ଷର କରିଛନ୍ତି। ମାତ୍ର ପୂର୍ବ ସରକାରଙ୍କ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା ଛାୟାରୁ ମୁକ୍ତ ହୋଇ ‘ଆୟୁଷ୍ମାନ’କୁ କାର୍ଯ୍ୟକାରୀ କରିବା ସରକାରଙ୍କ ପାଇଁ କାଠିକର ପାଠ ହୋଇଛି। ଯଦିଓ ବିଏସ୍‌କେୱାଇର ନାମ ପରିବର୍ତ୍ତନ କରି ଅବିକଳ ସେହି ଢାଞ୍ଚାରେ ସରକାର ଜିଜେଏୱାଇ ପ୍ରଚଳନ କରିବାକୁ ନିଷ୍ପତ୍ତି ନେଇଛନ୍ତି; ତଥାପି ଏହାକୁ ଆୟୁଷ୍ମାନ ସହ କିପରି ମିଶ୍ରଣ କରାଯିବ ତାହା ସରକାରଙ୍କ ପାଇଁ ବଡ଼ ଆହ୍ୱାନ ପାଲଟିଛି। ଏହି ପରିପ୍ରେକ୍ଷୀରେ ରାଜ୍ୟର ୧.୦୩ କୋଟି ହିତାଧିକାର ପରିବାର ମଧ୍ୟରୁ ୬୭.୮ ଲକ୍ଷ ପରିବାର କେନ୍ଦ୍ରୀୟ ଯୋଜନାରେ ଉପକୃତ ହେବେ ବୋଲି କେନ୍ଦ୍ର ସରକାରଙ୍କ ପକ୍ଷରୁ ଯାହା କୁହାଯାଇଛି ତାହା ଅଧିକ ଦ୍ୱନ୍ଦ୍ୱ ସୃଷ୍ଟି କରିଛି। ଏହି ପରିବାରଗୁଡ଼ିକ ଯଦି କେନ୍ଦ୍ର ସରକାରଙ୍କ ‘ଆୟୁଷ୍ମାନ’ରେ ଉପକୃତ ହେବେ, ତେବେ ବିଏସ୍‌କେୱାଇରେ ପୂର୍ବରୁ ଲାଭାନ୍ୱିତ ହେଉଥିବା ୯୯.୦୯ ଲକ୍ଷ ପରିବାର ମଧ୍ୟରୁ ରାଜ୍ୟ ସରକାରଙ୍କ ପରିବର୍ତ୍ତିତ ଜିଜେଏୱାଇରେ କ’ଣ ମାତ୍ର ୩୫ ଲକ୍ଷ ହିତାଧିକାରୀ ପରିବାର ଉପକୃତ ହେବେ କି ବୋଲି ସ୍ୱାଭାବିକ ପ୍ରଶ୍ନ ଉଠିଛି। ଦିଲ୍ଲୀରେ ଭାରତ ସରକାର ଏବଂ ଓଡିଶା ସରକାରଙ୍କ ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ ହୋଇଛି। ମୁଖ୍ୟମନ୍ତ୍ରୀ ଓ ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ଆସନ୍ତା ମାର୍ଚ୍ଚ ମାସ ସୁଦ୍ଧା ଓଡିଶାରେ ବିଧିବଦ୍ଧ ଭାବେ ଆୟୁଷ୍ମାନ କାର୍ଯ୍ୟକ୍ଷମ ହେବ ବୋଲି କହିଛନ୍ତି । ଏପରିକି ଓଡିଶାରେ ଆୟୁଷ୍ମାନ ଭାରତ ଓ ଗୋପବନ୍ଧୁ ଜନ ଆରୋଗ୍ୟ ଯୋଜନାକୁ ସମ୍ମିଶ୍ରଣ କରି ଏକ ସମୟରେ କାର୍ଯ୍ୟକାରୀ କରାଯିବ ବୋଲି ସରକାର କହୁଛନ୍ତି। ମାତ୍ର ଉଭୟ ଯୋଜନାର କାର୍ଯ୍ୟକାରିତା ଭିନ୍ନ ହୋଇଥିବାରୁ ଦୁଇଟି ଭିନ୍ନଭିନ୍ନ ରୂପରେଖ ଥିବା ଯୋଜନାରୁ କିପରି ଉପକୃତ ହେବେ, ତାହା ହିତାଧିକାରୀଙ୍କୁ ଦ୍ୱନ୍ଦ୍ୱରେ ପକାଇଛି। ସାରା ଦେଶ ପାଇଁ ଆୟୁଷ୍ମାନ ଲାଗୁ କରାଯାଇଛି ଓ ଏହାର ସର୍ତ୍ତାବଳୀ ସାରା ଦେଶ ପାଇଁ ଗୋଟିଏ ରହିଛି। ତେବେ ଓଡ଼ିଶାରେ ଆୟୁଷ୍ମାନରେ କିପରି ହିତାଧିକାରୀଙ୍କୁ ଅଧିକ ଲାଭ ମିଳିବ ତାହା ସନ୍ଦେହ ସୃଷ୍ଟି କରିଛି। ନିର୍ବାଚନ ସମୟରେ ବିଜେପି ଆୟୁଷ୍ମାନକୁ ତତ୍‌କାଳୀନ ସରକାରଙ୍କ ବିଏସ୍‌କେୱାଇଠାରୁ ଉତ୍ତମ ସ୍ୱାସ୍ଥ୍ୟ ସେବା ଯୋଜନା ବୋଲି କହିଥିଲା। କ୍ଷମତାକୁ ଆସିଲେ ରାଜ୍ୟର ହିତାଧିକାରୀଙ୍କ ପାଇଁ ଆୟୁଷ୍ମାନ ଯୋଜନା କାର୍ଯ୍ୟକାରୀ କରିବାକୁ ଘୋଷଣା କରିଥିଲା। ମାତ୍ର ତତ୍‌କାଳୀନ ସରକାରଙ୍କ ସ୍ୱାସ୍ଥ୍ୟ ସଞ୍ଜୀବନୀ କୁହାଯାଉଥିବା ବିଏସ୍‌କେୱାଇରେ ଲୋକମାନେ ଯେପରି ସହଜ ଓ ସୁବିଧାରେ ମାଗଣା ସ୍ୱାସ୍ଥ୍ୟ ସେବା ପାଉଥିଲେ, ଆୟୁଷ୍ମାନରେ ସେପରି ବ୍ୟବସ୍ଥା ନ ଥିବା ଉପଲବ୍ଧି କରି ରାଜ୍ୟ ସରକାର ବିଏସ୍‌କେୱାଇର ନାମ ଜିଜେଏୱାଇକୁ ପରିବର୍ତ୍ତନ କରି ଏହାକୁ ପ୍ରଚଳନ କରିବାକୁ ନିଷ୍ପତ୍ତି ନେଲେ। ମାତ୍ର ସାରା ଦେଶରେ ଆୟୁଷ୍ମାନ ଭାରତ ଲାଗୁ ହୋଇଥିବା ବେଳେ ଓଡିଶାରେ ଦୁଇଟି ଯୋଜନାର ମିଶ୍ରଣ କରିବା ସରକାରଙ୍କ ପାଇଁ ଅଡ଼ୁଆ ହୋଇଛି। ତେବେ ରାଜ୍ୟରେ ଆୟୁଷ୍ମାନ କାର୍ଯ୍ୟକାରୀ ହେବା ପରେ ଜଣେ ମହିଳା ହିତାଧିକାରୀଙ୍କର ଚିକିତ୍ସା ବାବଦରେ ୫ ଲକ୍ଷରୁ ଅଧିକ ଖର୍ଚ୍ଚ ହୁଏ ତା ହେଲେ ସମ୍ପୃକ୍ତ ଘରୋଇ ଡାକ୍ତରଖାନାକୁ କିପରି ଅର୍ଥ ଭରଣା କରାଯିବ ତାହା ଅଦ୍ୟାବଧି ସ୍ପଷ୍ଟ ହୋଇନାହିଁ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଗୋପବନ୍ଧୁ ଜନ ଆରୋଗ୍ୟ ଯୋଜନାରେ ଏବେ ସାଢେ଼ ତିନି କୋଟି ହିତାଧିକାରୀ ଥିବା ବେଳେ ଆୟୁଷ୍ମାନ ଭାରତ ଅଧିନରେ ମଧ୍ୟ ସାଢେ଼ ତିନି କୋଟି ହିତାଧିକାରୀ ସାମିଲ ହେବେ ବୋଲି ଗତକାଲି ସ୍ୱାସ୍ଥ୍ୟମନ୍ତ୍ରୀ ଡ଼ ମୁକେଶ ମହାଲିଙ୍ଗ ସ୍ପଷ୍ଟ କରିଛନ୍ତି। ତେଣୁ ଗୋପବନ୍ଧୁ ଜନ ଆରୋଗ୍ୟ ଯୋଜନାରୁ ବାହାରେ ଥିବା ଲୋକ ଆୟୁଷ୍ମାନ ଭାରତରେ ସାମିଲ ହୋଇ ନ ପାରିବା ସ୍ପଷ୍ଟ ହୋଇଛି। ତେବେ ଆୟୁଷ୍ମାନ ଭାରତରେ ଓଡିଶାର ୨୩ ଲକ୍ଷରୁ ଅଧିକ ବରିଷ୍ଠ ନାଗରିକ ସାମିଲ କରାଯିବାକୁ ସରକାର ଘୋଷଣା କରିଥିବାରୁ ହିତାଧିକାରୀଙ୍କ ସଂଖ୍ୟା ଅନ୍ୟୂନ ୩.୭୩ କୋଟିରେ ପହଞ୍ଚି ପାରେ। ମାତ୍ର ବିଭାଗୀୟ ମନ୍ତ୍ରୀ ୩ କୋଟି ଲୋକଙ୍କୁ ସ୍ୱାସ୍ଥ୍ୟ କାଡର଼୍ ଦିଆଯିବ ବୋଲି କହିବା ହିତାଧିକାରୀଙ୍କୁ ଅଧିକ ସନ୍ଦେହରେ ପକାଇଛି ଓ ସରକାରଙ୍କ ପରି ସାଧାରଣ ଲୋକମାନେ ମଧ୍ୟ ଦ୍ୱନ୍ଦ୍ୱରେ ରହିଛନ୍ତି ।