ମମତାଙ୍କ ନିଷ୍ପତ୍ତିକୁ ନେଇ ବଢିଲା ଚର୍ଚ୍ଚା

ଟିଏମ୍‌ସି ସୁପ୍ରିମୋ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିରୋଧୀ ମେଣ୍ଟର ନେତୃତ୍ବ ନେବା ନେଇ ଆଭାସ ଦେବା ପରେ ରାଜନୈତିକ ମହଲରେ ଜୋର୍‌ଦାର ଚର୍ଚ୍ଚା । ଏହାରି ଭିତରେ ଏହି ପ୍ରସଙ୍ଗରେ ଆହୁରି ଛୁଙ୍କ ଢାଳିଛନ୍ତି ଟିଏମ୍‌ସି ନେତା । ସୂତ୍ରରୁ ଜଣାପଡ଼ିଛି ଯେ, କୁଆଡ଼େ ଖୁବଶୀଘ୍ର ମମତା ବାନାର୍ଜୀ ଗଢ଼ିବାକୁ ଯାଉଛନ୍ତି ଆଉ ଏକ ନୂଆ ବିରୋଧୀ ମେଣ୍ଟ । ମମତା ବାନାର୍ଜୀଙ୍କ ଟିଏମ୍‌ସି କଂଗ୍ରେସ ପ୍ରତି ଅସନ୍ତୁଷ୍ଟ ଅଛି ବୋଲି ଆଭାସ ମଧ୍ୟ ମିଳିସାରିଛି । ତେଣୁ ଅନ୍ୟ ଦଳଗୁଡ଼ିକ ସହ ମିଶି ନୂଆ ପଲିଟିକାଲ ଷ୍ଟର୍ମ୍‌ ସୃଷ୍ଟି କରିବାର ରଣନୀତି କରୁଛନ୍ତି ବେଙ୍ଗଲ ଟାଇଗ୍ରେସ୍‌ ମମତା । ସହଯୋଗୀ ଦଳଗୁଡ଼ିକର କହିବା କଥା, କଂଗ୍ରେସ କଦାପି ସେମାନଙ୍କ ପ୍ରତି ସମ୍ବେଦନଶୀଳ ହୋଇ ନାହିଁ । ନିକଟରେ ରାହୁଲ ଗାନ୍ଧି ତାଙ୍କ ଅଭିଭାଷଣରେ ବୀର ସବରକରଙ୍କୁ ଟାର୍ଗେଟ୍‌ କରିଥିଲେ । ଏହା ମହାବିକାଶ ଅଗାଢ଼ି ଶିବସେନା (ଉଦ୍ଧବ) ଏବଂ ଏନ୍‌ସିପି (ଏସ୍‌ପି)କୁ ଅଡୁଆରେ ପକାଇ ଦେଇଛି । ସୂତ୍ର ଅନୁସାରେ, ଶିବସେନା ଓ ଟିଏମ୍‌ସି ନେତା ବୈଠକ କରି ଏ ବିଷୟରେ ଆଲୋଚନା କରିଛନ୍ତି । ରାହୁଲ ଗାନ୍ଧି ମେଣ୍ଟକୁ ଯେଉଁ ଅଡୁଆରେ ପକାଇଛନ୍ତି, ସେ ବିଷୟରେ ଶିବସେନା(ଉଦ୍ଧବ) ଏବଂ ଟିଏମ୍‌ସି ଆଲୋଚନା କରିଛନ୍ତି । ଟିଏମ୍‌ସି ସାଂସଦ ରୀତାବ୍ରତ ଚାଟାର୍ଜୀ କହିଛନ୍ତି ଯେ, ମମତା ବାନାର୍ଜୀ ଥରେ ନୁହେଁ, ବରଂ ଅନେକ ଥର ପ୍ରମାଣିତ କରିଛନ୍ତି ଯେ, ବିଜେପି ବିରୋଧରେ ଲଢ଼େଇ କରିବା ପାଇଁ ସେ ଏକାକୀ ନେତୃତ୍ବ ନେଇପାରିବେ । ଅନ୍ୟ କେହି ଏଭଳି କରିପାରିବେ ନାହିଁ । ସେଥିପାଇଁ ମମତା ହିଁ ମୋର୍ଚ୍ଚାର ନେତୃତ୍ବ ନେବା ଉଚିତ୍‌ । କେବଳ ଏତିକି ନୁହେଁ ଯେତେବେଳେ ସଂସଦରେ ସମ୍ବିଧାନ ପ୍ରସଙ୍ଗରେ ଆଲୋଚନାର ଶେଷ ଦିନରେ ଆପ୍‌ ନେତା ସଞ୍ଜୟ ସିଂହ କହୁଥିବା ସମୟରେ, ବିଜେପି ନେତାଏ ‘କେଜ୍ରିୱାଲ ଚୋର୍‌ ହୈ’ନାରା ଦେଇଥିଲେ । ଇଣ୍ଡିଆ ମେଣ୍ଟର ଅନ୍ୟ ଦଳଗୁଡ଼ିକ ଏହାକୁ ପ୍ରବଳ ବିରୋଧ କରିଥିଲେ । କିନ୍ତୁ କଂଗ୍ରେସ ଏହି ପ୍ରସଙ୍ଗରେ ଚୁପ୍‌ ରହିଲା । ଜଣେ ବରିଷ୍ଠ ବିରୋଧୀ ନେତାଙ୍କ କହିବାନୁସାରେ, ଦିଲ୍ଲୀରେ ନିର୍ବାଚନ ଅଛି । କିନ୍ତୁ କଂଗ୍ରେସ ମେଣ୍ଟ ସହ ଛିଡ଼ା ହୋଇପାରିବ । ଗୁରୁତ୍ବପୂର୍ଣ୍ଣ କଥା ଏହା ଯେ, ଯେତେବେଳେ ଆମ୍ବେଦକର ପ୍ରସଙ୍ଗରେ କଂଗ୍ରେସ ନେତୃତ୍ବରେ କେତେକ ନେତା ବିରୋଧ କଲେ, ଟିଏମ୍‌ସି ଅନୁପସ୍ଥିତ ଥିଲା । ଅବଶ୍ୟ ମମତା ବାନାର୍ଜୀ ଏବଂ ଡେରେକ୍‌ ଓବ୍ରାଏନ୍‌ ଆମ୍ବେଦକର ପ୍ରସଙ୍ଗରେ ବିଜେପିକୁ ଟାର୍ଗେଟ୍‌ କରିଛନ୍ତି । ଡେରେକ୍‌ ଓବ୍ରାଏନ୍‌ ଏହି ପ୍ରସଙ୍ଗରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ବିରୋଧରେ ସ୍ବାଧିକାର ଭଙ୍ଗ ନୋଟିସ୍‌ ଆଣିଛନ୍ତି । ଚର୍ଚ୍ଚା ହେଉଛି ଯେ, କଂଗ୍ରେସ ଯଦି ନିଜ ଆଭିମୁଖ୍ୟରେ ପରିବର୍ତ୍ତନ ନକରେ ଏବଂ ଇଣ୍ଡିଆ ମେଣ୍ଟର ବିଚାରଧାରାକୁ ନେଇ ନଚାଲେ, ତେବେ ସମାନ ବିଚାରଧାରା ବିଶିଷ୍ଟ ଦଳଗୁଡ଼ିକୁ ନେଇ ଆଉ ଏକ ମେଣ୍ଟ ଗଠନ କରାଯିବ । ସେଥିରେ ଟିଏମ୍‌ସି, ଶିବସେନା (ଉଦ୍ଧବ), ଏନସିପି (ଏସ୍‌ପି) ଏବଂ ଆର୍‌ଜେଡି ସାମିଲ ହୋଇପାରନ୍ତି । ଆଉ ସେହି ମେଣ୍ଟ ବିଜେପି ବିରୋଧରେ ମହାଲଢ଼େଇ କରିବ । ଏଭଳି ହେଲେ କଂଗ୍ରେସ ଓ ରାହୁଲ ଗାନ୍ଧିଙ୍କ ଭବିଷ୍ଯତ ପୁଣି ଥରେ ଅନ୍ଧକାରକୁ ଠେଲି ହୋଇଯିବ । ଏଥିରେ ଆଦୌ ସନ୍ଦେହ ନାହିଁ ।