ବଡ ଅପେକ୍ଷାର ଅନ୍ତ ଘଟିଲା। ଆଜିଠୁ ପୁଣି ଚାଲିଲା ପୁଷ୍ପାରାଜ୍ର ରାଜୁତି। ସାରା ଦେଶରେ କ୍ରେଜ, ସବୁ ହଲ୍ରେ ଚାଲିଛି ହାଉସ୍ ଫୁଲ୍ ଶୋ’। ବଡ଼ ପରଦାକୁ ଆସିଛି ବହୁ ପ୍ରତିକ୍ଷିତ ସିନେମା ପୁଷ୍ପା ଟୁ। ଭୁବନେଶ୍ୱରରୁ ମୁମ୍ବାଇ, ଦିଲ୍ଲୀରୁ ହାଇଦ୍ରାବାଦ ଯାଏଁ ସବୁଠି ଫାଷ୍ଟ ଡେ’ ଫାଷ୍ଟ ଶୋ’ ଦେଖିବାକୁ ମିଳିଛି ଫ୍ୟାନ୍ସଙ୍କ ଛଚାଖଚ ଭିଡ଼। ଶୀତ ଦିନରେ ଯେଉଁଠି ସକାଳୁ ଉଠିବା ମୁସ୍କିଲ ସେଠି ସକାଳ ସାଢେ଼ ୫ ଟାରେ ହାଉସ୍ ଫୁଲ୍ ହୋଇଯାଉଛି ସୋ। ବାଣ ଫୁଟାଇ ବାଜା ବଜାଇ ଫାଷ୍ଟ ଡେ ଫାଷ୍ଟ ଶୋ ଦେଖିବାକୁ ହଲ ଆଗରେ ଲାଗିଛି ଫ୍ୟାନ୍ସ ମାନଙ୍କ ଭିଡ଼। କିନ୍ତୁ ଏତେ ସବୁ ଖୁସି ଭିତରେ ପୁଷ୍ପା-୨ ରିଲିଜ୍ରେ ବଡ଼ ଅଘଟଣ ହୋଇଛି। ଦଳାଚକଟାରେ ଚାଲିଯାଇଛି ଜଣେ ଫ୍ୟାନଙ୍କ ଜୀବନ। ଗତକାଲି ରାତିରେ ହାଇଦ୍ରାବାଦରେ ପୁଷ୍ପା-୨ ପ୍ରିମିୟର୍ ଶୋ’ ହୋଇଥିଲା । ସେହି ପ୍ରିମିୟରେ ଅଲୁ ଅର୍ଜୁନ ଓ ରଶ୍ମିକା ମନ୍ଦାନା ସାମିଲ ଥିଲେ। ତେବେ ତାଙ୍କୁ ଦେଖିବାକୁ ଫ୍ୟାନ୍ ଏତେ ଭିଡ଼ ଜମାଇଥିଲେ ଯେ, ଦଳାଚକଟା ସ୍ଥିତି ଉପୁଜିଥିଲା। ଏମିତିକି ଆରଟିସି କ୍ରସ୍ ରୋଡରେ ଥିବା ସନ୍ଧ୍ୟା ଥିଏଟର୍ ବାହାରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଥିଲା। ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ପୋଲିସ ଲାଠିଚାର୍ଜ କରିବାକୁ ବାଧ୍ୟ ହୋଇଥିଲା। ତେବେ ଦଳାଚକଟାରେ ଜଣେ ୩୯ ବର୍ଷ ବୟସର ମହିଳାଙ୍କ ମୃତ୍ୟୁ ହେବା ସହ ଏକାଧିକ ଲୋକେ ଆହତ ହୋଇଥିବା ଜଣା ପଡିଛି।
ଅନ୍ୟପଟେ ମୃତ ମହିଳା ଜଣଙ୍କ ଦିଲସୁଖନଗର ନିବାସୀ ରେବତୀ। ସେ ତାଙ୍କ ସ୍ୱାମୀ ଏବଂ ଦୁଇ ପୁଅଙ୍କ ସହ ପୁଷ୍ପା-୨ ଫିଲ୍ମ ଦେଖିବାକୁ ଯାଇଥିଲେ। ଯେତେବେଳେ ରେବତୀ ଏବଂ ତାଙ୍କ ପରିବାର ଥିଏଟର ବାହାରକୁ ଆସୁଥିଲେ, ସେତେବେଳେ ଦଳାଚକଟା ଆରମ୍ଭ ହୋଇଥିଲା। ସେହି ସମୟରେ ଅଲ୍ଲୁ ଅର୍ଜୁନଙ୍କ ଏକ ଝଲକ ପାଇବା ପାଇଁ ତାଙ୍କ ଫ୍ୟାନ୍ମାନେ ଥିଏଟର ଆଡ଼କୁ ମାଡ଼ି ଆସିଥିଲେ। ଯାହାଫଳରେ ସେଠାରେ ଦଳାଚକଟା ସ୍ଥିତି ଉପୁଜିଥିଲା ଏବଂ ଘଟଣାସ୍ଥଳରେ ରେବତୀ ଏବଂ ତାଙ୍କ ପୁଅ ଚେତାଶୂନ୍ୟ ହୋଇପଡିଥିଲେ।
ସେଠାରେ ଉପସ୍ଥିତ ଥିବା ପୋଲିସ କର୍ମଚାରୀ ଏବଂ ଲୋକମାନେ ତୁରନ୍ତ ରେବତୀ ଏବଂ ତାଙ୍କ ପୁଅଙ୍କୁ ତୁରନ୍ତ ନିକଟସ୍ଥ ହସ୍ପିଟାଲକୁ ନେଇଥିଲେ। କିନ୍ତୁ ଡାକ୍ତର ରେବତୀଙ୍କୁ ମୃତ୍ୟୁ ବୋଲି ଘୋଷଣା କରିଥିଲେ। ତାଙ୍କ ପୁଅଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଏକ ସୁପର ସ୍ପେସାଲିଷ୍ଟ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
