SunstarTV
ଆଜି ଭାରତ-ଶ୍ରୀଲଙ୍କା ପ୍ରଥମ ଟି-୨୦ ମୁକାବିଲା। ଶ୍ରୀଲଙ୍କା ପଲ୍ଲେକେଲରେ ଉଭୟ ଦଳ ମୁହାଁମୁହିଁ ହେବେ। ୩ଟି ଟି-୨୦ ସହ ଓ୍ବାନ୍ ଡେ ମ୍ୟାଚ୍ ଖେଳିବ ଭାରତ। ଭାରତ ନୂତନ ଅଧିନାୟକ ସୂର୍ଯ୍ୟକୁମାର ଯାଦବ ଓ ପ୍ରଶିକ୍ଷକ ଗୌତମ ଗମ୍ଭୀରଙ୍କ ପ୍ରଶିକ୍ଷଣରେ ଖେଳିବାବେଳେ ଶ୍ରୀଲଙ୍କା ଚାରିର୍ଥ ଆଶାଲାଙ୍କା ଓ ସନତ ଜୟସୂରିଆଙ୍କ ପ୍ରଶିକ୍ଷଣରେ ଖେଳିବ।
ଟି୨୦ ବିଶ୍ବକପ -୨୦୨୪ ଟାଇଟଲ ଜିତିବା ପରେ ଶୁବମାନ ଗିଲ୍ଙ୍କ ନେତୃତ୍ବରେ ଭାରତ ଜିମ୍ବାୱେ ବିପକ୍ଷ ଟି୨୦ ଶୃଙ୍ଖଳାକୁ ୪-୧ରେ ଜିତିଥିଲା। ଏବେ ନୂଆ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ନେତୃତ୍ବରେ ଶ୍ରୀଲଙ୍କା ବିପକ୍ଷରେ ଟି୨୦ ଶୃଙ୍ଖଳା ଖେଳିବାକୁ ଯାଉଛି। ଅନ୍ୟ ପକ୍ଷରେ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ପ୍ରଶିକ୍ଷଣରେ ଦଳ ପ୍ରଥମ ଥର ପାଇଁ ଏକ ଶୃଙ୍ଖଳା ଖେଳିବାକୁ ଯାଉଛି।
ନଜର ପକାଇବା ଦଳ ବ୍ୟାଟିଂ କ୍ରମରେ ୫ଜଣ ସ୍ପେଶାଲିଷ୍ଟ ବ୍ୟାଟ୍ସମ୍ୟାନଙ୍କୁ ନେଇ ଖେଳିବା ଆଶା କରାଯାଉଛି। ବ୍ୟାଟ୍ସମ୍ୟାନ ଭାବେ ଶୁବମାନ ଗିଲ୍, ଯଶସ୍ବୀ ଜୟସୱାଲ ଓପନିଂ କରିବେ। ୱିକେଟ ରକ୍ଷକ ଭାବେ ଋଷଭ ପନ୍ତ୍ ଓ ସଞ୍ଜୁ ସାମସନଙ୍କ ମଧ୍ୟରୁ ଜଣେ ଖେଳିବେ। ପନ୍ତ୍ ଖେଳିବାର ଯଥେଷ୍ଟ ସମ୍ଭାବନା ରହିଛି। ଟି୨୦ ବିଶ୍ବକପରେ ୩ ନମ୍ବର ସ୍ଥାନରେ ବ୍ୟାଟିଂ କରିଥିବା ପନ୍ତ୍ ଉକ୍ତ ସ୍ଥାନରେ ବ୍ୟାଟିଂ କରିପାରନ୍ତି। ସୂର୍ଯ୍ୟକୁମାର ଯାଦବ ୪ ନମ୍ବର, ଶିଭମ ଦୁବେ ୫ ନମ୍ବର ସ୍ଥାନରେ ବ୍ୟାଟିଂ କରିବାର ଆଶା କରାଯାଉଛି।
ଅଲରାଉଣ୍ଡର ଭାବେ ହାର୍ଦିକ ପାଣ୍ଡ୍ୟା ଓ ଅକ୍ଷର ପଟେଲ, ସ୍ପିନର ଭାବେ ରବି ବିଷ୍ଣୋୟି ଓ ୱାଶିଂଟନ ସୁନ୍ଦରଙ୍କୁ ସ୍ଥାନ ମିଳିପାରେ। ଦ୍ରୁତ ବୋଲିଂ କ୍ଷେତ୍ରରେ ମହମ୍ମଦ ସିରାଜ ଓ ଅର୍ଶଦୀପ୍ ସିଂହ ଖେଳିବାର ଯଥେଷ୍ଟ ସମ୍ଭାବନା ରହିଛି। ଶ୍ରୀଲଙ୍କା ବିପକ୍ଷ ଶୃଙ୍ଖଳା ପୂର୍ବରୁ ଦଳ ଜିମ୍ବାୱେ ଗସ୍ତରେ ଟି୨୦ ଶୃଙ୍ଖଳା ଜିତିଥିଲେ ମଧ୍ୟ ଶ୍ରୀଲଙ୍କା ଗସ୍ତ ସହଜ ହେବ ନାହିଁ। ଗୌତମ ଗମ୍ଭୀର ଓ ସୂର୍ଯ୍ୟକୁମାରଙ୍କ ନୂଆ ରଣନୀତି କିଭଳି ପଡ଼ିଆରେ ପ୍ରତିଫଳିତ ହେଉଛି ତାହା ଦେଖିବାକୁ ବାକି ରହିଛି।
