Sunstar TV :
ଦୀର୍ଘ ଦିନର ଅପେକ୍ଷାର ଘଟିଲା ଅନ୍ତ । ଶେଷର କଂଗ୍ରେସ ବିଧାୟକ ଦଳର ନେତା ହେଲେ ରାମଚନ୍ଦ୍ର କାଡାମ । ରାମଚନ୍ଦ୍ର କାଡାମଙ୍କୁ ବିଧାୟକ ଦଳ ନେତା ଭାବେ ଚୟନ କରିଛି ଅଖିଳ ଭାରତୀୟ କଂଗ୍ରେସ କମିଟି । କୋରାପୁଟ ଜିଲ୍ଲାର ବରିଷ୍ଠ ଆଦିବାସୀ କଂଗ୍ରେସ ନେତା ରାମଚନ୍ଦ୍ର କାଡ଼ାମଙ୍କ ପୂର୍ବରୁ ଦୌଡରେ ଥିଲେ ତାରା ପ୍ରସାଦ ବାହିନୀପତି । ହେଲେ ସବୁ ଚର୍ଚ୍ଚାରେ ପୂର୍ଣ୍ଣଚ୍ଛେଦ ଟାଣିଛନ୍ତି ଏଆଇସିସି ଅଧ୍ୟକ୍ଷ ଖଡ଼ଗେ।
ବିଧାୟକ ଦଳ ନେତାଙ୍କ ସମେତ ଦଳର ଉପନେତା ଓ ମୁଖ୍ୟ ସଚେତକଙ୍କ ନାଁ ମଧ୍ୟ ଘୋଷଣା କରିଛି ଏଆଇସିସି । ତେବେ ଏହାପରେ ଦଳରେ ଲାଗିରହିଥିବା ନେତୃତ୍ବ ସଙ୍କଟ ଏବେ ଏକପ୍ରକାର ଦୂର ହୋଇପାରେ ବୋଲି କୁହାଯାଉଛି । ୨୦୨୪ ନିର୍ବାଚନରେ ବିଧାନସଭାକୁ କଂଗ୍ରେସରୁ ନିର୍ବାଚିତ ହୋଇଛନ୍ତି ୧୪ ଜଣ ବିଧାୟକ ।
ଏମାନଙ୍କ ମଧ୍ୟରେ ଜୟପୁର ବିଧାୟକ ତାରା ପ୍ରସାଦ ବାହିନୀପତି ଅଭିଜ୍ଞତା ଦୃଷ୍ଟିରୁ ସବୁଠାରୁ ବରିଷ୍ଠ । ୫ ଥରର ବିଧାୟକ ତାରା ବାହିନୀପତି ଦଳର ବିଧାୟକ ଦଳ ନେତା ରେସରେ ରହିଥିବା ଚର୍ଚ୍ଚା ହେଉଥିଲା । ହେଲେ ଏକ ଗୋଷ୍ଠୀ ତାରାଙ୍କୁ ବିରୋଧ କରୁଥିବା ମଧ୍ୟ ଆଲୋଚନା ହୋଇଥିଲା ।
ଏହାରି ଭିତରେ ଆଦିବାସୀ କାର୍ଡ ଖେଳିଛି ଏଆଇସିସି । କୋରାପୁଟ ଜିଲ୍ଲା ପଟ୍ଟାଙ୍ଗୀ ବିଧାୟକ ରାମଚନ୍ଦ୍ର କାଡ଼ାମଙ୍କୁ କଂଗ୍ରେସ ବିଧାୟକ ଦଳ ନେତା ଦାୟିତ୍ବ ମିଳିଛି । ରାମଚନ୍ଦ୍ର କାଡ଼ାମ ୩ ଥର ବିଧାୟକ ହୋଇଥିବା ଅଭିଜ୍ଞତା ରଖିଛନ୍ତି । ଆସନ୍ତାକାଲି ଠାରୁ ସପ୍ତଦଶ ବିଧାନସଭାର ପ୍ରଥମ ଅଧିବେଶନ ଆରମ୍ଭ ହେବାକୁ ଥିବାବେଳେ ରାମଚନ୍ଦ୍ରଙ୍କ ନେତୃତ୍ବରେ ଶାସକ ଦଳକୁ ଘେରିବ କଂଗ୍ରେସ ।
