Sunstar Tv
Chandipura Virus: ବ୍ୟାପୁଛି ଚାନ୍ଦିପୁରା ଭାଇରସ। ଏହି ଭାଇରସକୁ ନେଇ ଗୁଜୁରାଟରେ ଦେଖାଗଲାଣି ଆତଙ୍କ। ସଂକ୍ରମଣ ବୃଦ୍ଧି ଯୋଗୁଁ ଦେଶର ସ୍ୱାସ୍ଥ୍ୟ ଏଜେନ୍ସିମାନେ ସତର୍କ ହୋଇଛନ୍ତି।
ଜୁଲାଇ ୧୬ ପର୍ଯ୍ୟନ୍ତ ଚାନ୍ଦିପୁରା ଭାଇରସ ଯୋଗୁଁ ୮ ଜଣ ରୋଗୀଙ୍କ ମୃତ୍ୟୁ ଘଟିଥିଲା ଏବଂ ଗତକାଲି ଅର୍ଥାତ୍ ଜୁଲାଇ ୧୭ରେ ଗୋଧରାରୁ ଜଣେ, ଗାନ୍ଧିନଗରରୁ ୨ ଜଣ ଏବଂ ମେହସାଣାରେ ଜଣଙ୍କର ମୃତ୍ୟୁ ହୋଇଛି। ରାଜ୍ୟରେ ମୃତ୍ୟୁ ସଂଖ୍ୟା ୧୫ ଛୁଇଁଛି।
ଏଥିସହ ଏପର୍ଯ୍ୟନ୍ତ ମୋଟ ୨୯ଟି ସନ୍ଦିଗ୍ଧ ମାମଲା ରୁଜୁ ହୋଇଥିବା ଜଣାପଡ଼ିଛି। ଅନ୍ୟପଟେ ରାଜସ୍ଥାନରେ ଦୁଇଟି ମାମଲା ଚିହ୍ନଟ ହୋଇଛି ଏବଂ ଗୋଟିଏ ପିଲାର ମୃତ୍ୟୁ ହୋଇଛି। ଗାନ୍ଧିନଗରରେ ଜଣେ ୧୫ ମାସ ଶିଶୁର ମୃତ୍ୟୁ ଏହି ଭାଇରସ ଯୋଗୁଁ ହୋଇଛି।
ସେହିପରି ଗତ ୧୫ ଦିନ ମଧ୍ୟରେ ବଡ଼ୋଦରାସ୍ଥିତ ସର୍ ସୟାଜୀ ରାଓ ଜେନେରାଲ୍ ହସ୍ପିଟାଲର ଶିଶୁ ବିଭାଗରେ ଅନେକ ମାମଲା ରୁଜୁ ହୋଇଛି, ସେଥିମଧ୍ୟରୁ ୭ ଟି ନମୁନା ପୁନେ ଲ୍ୟାବକୁ ପଠାଯାଇଛି। ବର୍ତ୍ତମାନ ଚାରିଜଣ ରୋଗୀ ଚିକିତ୍ସିତ ହେଉଛନ୍ତି, ସେଥିମଧ୍ୟରୁ ଦୁଇଜଣ ୱାର୍ଡକୁ ସ୍ଥାନାନ୍ତରିତ ହୋଇଥିବାବେଳେ ଦୁଇ ଜଣ ଆଇସିୟୁରେ ଚିକିତ୍ସିତ ହେଉଛନ୍ତି।
ଏହି ପରିସ୍ଥିତିରେ ଡାଇରିଆ, ବାନ୍ତି, ଜ୍ୱର ଏବଂ ଚେତାଶୂନ୍ୟ ରୋଗରେ ପୀଡିତ ରୋଗୀଙ୍କ ନମୁନା ପଠାଯାଇଛି। ଏହି ଘଟଣାରେ ଚାନ୍ଦିପୁରା ଭାଇରସ ଅଛି କି ନାହିଁ ତାହା ନମୁନାର ରିପୋର୍ଟ ଆସିବା ପରେ ଜଣା ପଡ଼ିବ।
ଚାନ୍ଦିପୁରା ଭାଇରସ ମିଳିବା ପରେ ସ୍ୱାସ୍ଥ୍ୟ ବିଭାଗ କାର୍ଯ୍ୟାନୁଷ୍ଠାନ ଗ୍ରହଣ କରିଛି ଏବଂ ବିଭିନ୍ନ ସ୍ୱାସ୍ଥ୍ୟ ବିଭାଗର ଏକ ଟିମ୍ ଦ୍ୱାରା ଏକ ସର୍ଭେ କରାଯାଇଥିଲା। ରାଜ୍ୟର ବିଭିନ୍ନ ସହର ଏବଂ ଗାଁରେ ଚିହ୍ନଟ ହୋଇଥିବା ରୋଗୀ ସିଭିଲ ହସ୍ପିଟାଲରେ ଚିକିତ୍ସିତ ହେଉଛନ୍ତି।
ତେବେ ବର୍ତ୍ତମାନ ସମସ୍ତ ପିଲାଙ୍କ ଅବସ୍ଥା ବିଷୟରେ ଅଧିକ ସୂଚନା ମିଳିନାହିଁ । କିନ୍ତୁ ସିଭିଲ ହସ୍ପିଟାଲ ଅନୁଯାୟୀ ସମସ୍ତ ସନ୍ଦିଗ୍ଧ ପିଲାଙ୍କ ନମୁନା ସଂଗ୍ରହ କରାଯାଇ ପୁନେକୁ ପଠାଯାଇଛି।
ସ୍ୱାସ୍ଥ୍ୟମନ୍ତ୍ରୀ ଋଷିକେଶ ପଟେଲ ଚାନ୍ଦିପୁରା ଭାଇରସ ବିଷୟରେ କହିଛନ୍ତି ଯେ ବାଲିରେ ରହୁଥିବା ମାଛି କାରଣରୁ ଚାନ୍ଦିପୁରା ଭାଇରସ ବ୍ୟାପୁଛି । ବର୍ତ୍ତମାନ ଆମେ ଏହାକୁ ସନ୍ଦେହଜନକ ମନେ କରୁଛୁ ।
ବର୍ତ୍ତମାନ ଏହାର ଲକ୍ଷଣ ଦେଖିବାକୁ ମିଳିଛି । ରିପୋର୍ଟ ଆସିବା ପରେ ଏହା ନିଶ୍ଚିତ ହେବ । ଏହି ପ୍ରକାର ରୋଗ ମଧ୍ୟ ଗୁଜୁରାଟରେ ଅଧିକ ଦେଖାଯାଏ ।
ଏହି ମାଛି ଏବଂ କୀଟପତଙ୍ଗ କାଦୁଅ ଏବଂ ପ୍ଲାଷ୍ଟରରେ ନିର୍ମିତ ଘରର ଖାଲ ଭିତରେ ବାସ କରନ୍ତି । ଏନେଇ ପ୍ରାୟ ୪୫୦୦ ରୁ ୪୬୦୦ ଘରେ କୀଟନାଶକ ସ୍ପ୍ରେ କରାଯାଇଛି ।
ଏହି ରୋଗ ପାଇଁ ପ୍ରାୟ ୪୪,୦୦୦ ଲୋକଙ୍କୁ ଯାଞ୍ଚ କରାଯାଇଛି । ଭାଇରସ ବ୍ୟପୁଥିବାରୁ ଅଭିଭାବକମାନେ ଚିନ୍ତାରେ ଅଛନ୍ତି । କେମିତି ନିଜ ପିଲାଙ୍କୁ ବଞ୍ଚାଇବେ ସେହି ଚିନ୍ତା ଘାରିଛି । ଏ ଦିଗରେ ତୁରନ୍ତ ପଦକ୍ଷେପ ନେବାକୁ ଅଭିଭାବକମାନେ ଦାବି କରିଛନ୍ତି ।
