SunStarTV
ଲୋକସଭା ବାଚସ୍ପତି ଓମ ବିର୍ଲା ସଂସଦ ସଦସ୍ୟଙ୍କ ପାଇଁ ଶପଥ ଗ୍ରହଣ ନିୟମରେ ସଂଶୋଧନ କରିଛନ୍ତି। ଅଷ୍ଟାଦଶ ଲୋକସଭା ପାଇଁ ଶପଥ ଗ୍ରହଣ ସମାରୋହରେ ଅନେକ ସଦସ୍ୟ ଉଠାଇଥିବା ସ୍ଲୋଗାନରେ ପରିବର୍ତ୍ତନ ଆସିଛି।
ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନରେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓୱାଇସି ସଂସଦର ସଦସ୍ୟ ଭାବରେ ଶପଥ ଗ୍ରହଣ କରିବା ପରେ ‘ଜୟ ଭୀମ, ଜୟ ମିମ, ଜୟ ତେଲେଙ୍ଗାନା’ ଏବଂ ଶେଷରେ ‘ଜୟ ପାଲେଷ୍ଟାଇନ’ ସ୍ଲୋଗାନ ଦେଇ ଏକ ନୂତନ ବିବାଦ ସୃଷ୍ଟି କରିଥିଲେ। ଓୱାଇସି ବ୍ୟତୀତ ଅନ୍ୟ ଅନେକ ସାଂସଦ ମଧ୍ୟ ସଂସଦ ସଦସ୍ୟତାର ଶପଥ ଗ୍ରହଣ କରିବା ପୂର୍ବରୁ କିମ୍ବା ପରେ ଗୃହରେ ସ୍ଲୋଗାନ ଦେଉଥିବାର ନଜର ଆସିଥିଲେ। ଏହାକୁ ନେଇ ବିବାଦ ବଢ଼ିବା ପରେ ବର୍ତ୍ତମାନ ଲୋକସଭା ବାଚସ୍ପତି ଓମ ବିର୍ଲା ସାଂସଦଙ୍କ ଶପଥ ଗ୍ରହଣ ନିୟମକୁ ପରିବର୍ତ୍ତନ କରି ଏହାକୁ ଅଧିକ କଠୋର କରିଛନ୍ତି।
ଲୋକ ସଭା ବାଚସ୍ପତି ଓମ ବିର୍ଲା ନିୟମରେ ବଡ଼ ସଂଶୋଧନ କରିଛନ୍ତି। ନବ ନିର୍ବାଚିତ ସାଂସଦମାନେ ଶପଥ ଗ୍ରହଣ ବେଳେ କୌଣସି ନାରାବାଜି ଦେଇ ପାରିବେ ନାହିଁ।
ନୂଆ ନିୟମ ମୁତାବକ, ଭବିଷ୍ୟତରେ ନବନିର୍ବାଚିତ ସାଂସଦଙ୍କୁ ସମ୍ବିଧାନ ଅନ୍ତର୍ଗତ ନିୟମ ଅନୁସାରେ ହିଁ ଶପଥ ନେବାକୁ ପଡିବ। ସେମାନେ ସଂସଦରେ ଶପଥ ନେବା ସମୟରେ କୌଣସି ସ୍ଲୋଗାନ୍ କମ୍ବା ନାରାବାଜି କରିପାରିବେ ନାହିଁ କିମ୍ବା କୌଣସି ଅସଂସଦୀୟ ଶବ୍ଦ ଯୋଡି ପାରିବେ ନାହିଁ।
ଲୋକସଭା ବାଚସ୍ପତିଙ୍କ ନିର୍ଦ୍ଦେଶ ଅନୁସାରେ ଲୋକସଭାରେ ପ୍ରକ୍ରିୟା (ସପ୍ତଦଶ ସଂସ୍କରଣ) ର ନିୟମ ୩୮୯ରେ ପରିବର୍ତ୍ତନ କରାଯାଇଛି। ବର୍ତ୍ତମାନ ନିୟମ ୩୮୯ର ନିର୍ଦ୍ଦେଶ -୧ରେ ବିଭାଗ ୨ ପରେ ଏକ ନୂତନ ବିଭାଗ ୩ ଯୋଡାଯାଇଛି। ଏହି ଅନୁଯାୟୀ, ଜଣେ ସଦସ୍ୟ କେବଳ ଭାରତର ସମ୍ବିଧାନର ତୃତୀୟ ସୂଚୀରେ ଉଦ୍ଦେଶ୍ୟ ପାଇଁ ଧାର୍ଯ୍ୟ ହୋଇଥିବା ଫର୍ମ ଅନୁଯାୟୀ ଶପଥ ନେବେ ଏବଂ ସଦସ୍ୟତା ଗ୍ରହଣ କରିବେ।
