Sunstar TV :
ପିସିସି ସଭାପତିଙ୍କୁ କାଳିମାଡ । ନିଜ ଚ୍ୟାମ୍ବରରେ ବସିଥିଲେ ପିସିସି ସଭାପତି ଶରତ ପଟ୍ଟନାୟକ । ସେଠାରେ କର୍ମୀ ଓ ନେତାଙ୍କ ସହ କରୁଥିଲେ ଆଲୋଚନା । ଆଉ ସେହି ସମୟରେ କଂଗ୍ରେସ ଭବନକୁ ହଠାତ୍ ପଶି ଆସିଥିଲେ କିଛି ଯୁବକ । ସିଧା ପିସିିସି ସଭାପତି ଶରତ ପଟ୍ଟନାୟକଙ୍କ ଉପରକୁ କଲେ କାଳିମାଡ । କେହି କିଛି ବୁଝିବା ଆଗରୁ କାଳିମାଡ କରି ଚାଲିଲେ କିଛି ଯୁବକ । ମୁହଁରେ ମୁଖା ପିନ୍ଧି ଆସି କାଳିମାଡ କରିଥିବା ସ୍ପଷ୍ଟ ଚିତ୍ର ଦେଖିବାକୁ ମିଳିଛି । କାଳିମାଡ କରିବା ସହ ପିସିସି ସଭାପତିଙ୍କ ବିରୋଧରେ ନାରା ବାଜି କରିଥିବା ମଧ୍ୟ ଦେଖିବାକୁ ମିଳିଛି । ଆଉ କାଳିମାଡ କରିବା ପରେ ନିର୍ଭୟ ସହ ଚାଲି ଚାଲି ବାହାରକୁ ବି ଆସିଗଲେ । ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କଂଗ୍ରେସ ଭବନରେ ।
ପୁରା ଫିଲ୍ମ ଷ୍ଟାଇଲରେ କିଛି ଯୁବକ କଂଗ୍ରେସ ଭବନରେ ପଶି ଶରତଙ୍କ ଉପରକୁ କାଳିମାଡ଼ କରିଥିବା ଅଭିଯୋଗ ହୋଇଛି । ସୂଚନା ଅନୁସାରେ, ସମୟ ପାଖାପାଖି ଦିନ ୧୧ଟା ୨୦ମିନିଟ । କଂଗ୍ରେସ ଭବନରେ ଉପର ମହଲା କୋଠରୀରେ ପିସିସି ସଭାପତି ଶରତ ପଟ୍ଟନାୟକ ବସିଥିବା ବେଳେ ହଠାତ ୨୦ରୁ ଅଧିକ ଯୁବକ ହାଏ ହାଏ ସ୍ଲୋଗାନ ଦେଇ ପିସିସି ସଭାପତିଙ୍କ ରୁମ ଭିତରେ ପଶି ତାଙ୍କ ସହ ହାତ ମିଳାଇଥିଲେ । ପରେ ପକେଟରୁ କାଳି ବାହାର କରି କାଳିମାଡ଼ କରି ଉକ୍ତ ଯୁବକମାନେ ତତକ୍ଷଣାତ ସେଠାରୁ ପଳାଇଯାଇଛନ୍ତି ।
ତେବେ କାଳିମାଡ଼ର କାରଣ ଅସ୍ପଷ୍ଟ ରହିଛି । ତେବେ ଚିତ୍ରରେ ଦେଖାଯାଉଥିବା ଯୁବକ ମାନଙ୍କ ନାଁରେ ଲିଖିତ ଅଭିଯୋଗ କରିଛନ୍ତି ପିସିସି ସଭାପତି । ଆଜିର ଏହି ଘଟଣାକୁ କଂଗ୍ରେସର ସବୁ ମହଲରେ ନିନ୍ଦା କରାଯାଇଛି । ସମସ୍ତ ନେତା ଓ କର୍ମୀମାନେ ଘୋର ନିନ୍ଦା କରିବା ସହିତ ଏହା ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ସେପଟେ ଏହି ଘଟଣା ପରେ କଂଗ୍ରେସର ବରିଷ୍ଠ ନେତାମାନେ କଂଗ୍ରେସ ଭବନରେ ପହଞ୍ଚି ପିସିସି ସଭାପତିଙ୍କ ସହ ଆଲୋଚନା କରିଛନ୍ତି ।
ତେବେ କେଉଁ କାରଣରୁ ଏହି ଘଟଣା ଘଟିଛି ଏବଂ ସେହି ଯୁବକ ମାନେ କିଏ ଏବଂ କାହିଁକି ସେମାନେ ଏଭଳି କାଣ୍ଡ ଘଟାଇଛନ୍ତି ? ସୂଚନା ଥାଉ କି, ଗତ କିଛି ଦିନ ହେବ ଦଳ ଭିତରେ ଟିକେଟ ଆବଣ୍ଟନ ଏବଂ ନିର୍ବାଚନ ପାଣ୍ଠିରେ ଅନିୟମିତତାକୁ ନେଇ ଚର୍ଚ୍ଚା ଜୋର ଧରିଛି । ସେଥିପାଇଁ ହୁଏତ ଏଭଳି ଘଟଣା ଘଟିଥିବା ଅନୁମାନ କରାଯାଉଛି ।
