SUNSTARTV
ସନଷ୍ଟାରଟିଭି ବ୍ୟୁରୋ: ରାଜ୍ୟରେ ଜାରି ରହିଛି ଗ୍ରୀଷ୍ମ ଲହରୀ । ଫଳରେ ଖରା ଗରମରେ କଲବଲ ହେଉଛି ଜନଜୀବନ । ଦିନ ୧୦ଟା ବାଜିଲେ ଘରୁ ବାହିବା କଷ୍ଟକର ହୋଇପଡୁଛି । ତେବେ ଚଳିତ ଥର ମୌସୁମୀ ୪ ଦିନ ଆଗରୁ ଓଡିଶା ଆଗମନ କରିଥିଲେ ମଧ୍ୟ ପାଗ ପାଇଁ ଏହା ଆଗକୁ ଅଗ୍ରସର ହୋଇପାରୁ ନଥିଲା । ଫଳରେ ରାଜ୍ୟରେ ଗରମ ଗୁଳୁଗୁଳି ଜାରୀ ରହିଛି । ଏହାରି ଭିତରେ ଆଜି ଅପରାହ୍ନରେ ପ୍ରଚଣ୍ଡ ଖରା ଗରମରୁ ଟିକେ ଆଶ୍ୱସ୍ତି ମିଳିଛି । ରାଜଧାନୀ ଭୁବନେଶ୍ୱର ଏବଂ କଟରେ ଘଡଘଡି ସହ ପ୍ରବଳ ବର୍ଷା ଜାରି ରହିଛି । ଏଥିସହିତ ମୌସୁମୀ ପାଇଁ ପାଗ ଅନୁକୂଳ ହୋଇଥିବା ସୂଚନା ମିଳିଛି ।
ଟ୍ୱିନ୍ ସିଟିରେ ବର୍ଷା ସମୟରେ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହୁଛି । ପ୍ରବଳ ବର୍ଷା ଯୋଗୁ ଯାତାୟାତ ବାଧାପ୍ରାପ୍ତ ହୋଇଥିବାବେଳେ କେତେକ ସ୍ଥାନରେ ପାଣି ବି ଜମି ରହିଛି। ଆଗାମୀ ୫ ଦିନ ଯାଏଁ ଉପକୂଳ, ଦକ୍ଷିଣ ଓ ପଶ୍ଚିମ ଓଡିଶାର କିଛି ଜିଲ୍ଲାରେ ବର୍ଷା ସମ୍ଭାବନା ରହିଛି । ୧୯ ଓ ୨୦ରେ ବର୍ଷାର ପରିମାଣ ଅଧିକ ରହିବ ବୋଲି ଜଣାପଡିଛି । ଭୁବନେଶ୍ୱର ଆଞ୍ଚଳିକ ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ଏବେ ମୌସୁମୀ ବାୟୁ କୋରାପୁଟ ମାଲକନଗିରି ରେ ସକ୍ରୀୟ ରହିଛି । ସେ ଉପକୂଳ ମୁହାଁ ହୋଇ ଧୀରେ ଧୀରେ ଅଗ୍ରସର ହେଉଛି ଯାହାର ପ୍ରଭାବ ବର୍ତ୍ତମାନ ଦେଖିବାକୁ ମିଳିଛି । ତେବେ ଆସନ୍ତା ୧୯ ତାରିଖଠାରୁ ରାଜ୍ୟରେ ବର୍ଷାର ପରିମାଣ ବଢିପାରେ ବୋଲି ଆକଳନ କରାଯାଉଥିବା ବେଳେ କିଛି ସ୍ଥାନରେ ପ୍ରବଳ ବର୍ଷା ହୋଇଛି । ଏଥିସହିତ ଅନ୍ୟ କିଛି ସ୍ଥାନରେ ପ୍ରାକ୍ ମୌସୁମୀ ବର୍ଷା ହୋଇଥିବା ମଧ୍ୟ ଜଣାପଡିଛି । ଏବେବି ରାଜ୍ୟର ଅନେକ ସ୍ଥାନରେ ନିଅଁଟିଆ ବର୍ଷା ହୋଇଛି । କିଛି କିଛି ସ୍ଥାନରେ ଏଯାବତ୍ ମଧ୍ୟ ବର୍ଷାର କୌଣସି ସମ୍ଭାବନା ନଥିବା ମଧ୍ୟ ଜଣାପଡିଛି ।
