SunstarTV
ନିର୍ବାଚନ ପାଇଁ ଓଡ଼ିଶାକୁ ଘନ ଘନ ଗସ୍ତ କରୁଛନ୍ତି କେନ୍ଦ୍ରୀୟ ନେତା। ତେବେ ଆସନ୍ତାକାଲି(ବୁଧବାର) ପୁଣିଥରେ ଓଡ଼ିଶା ଆସିଛନ୍ତି ହେବି ଓ୍ବେଟ ନେତ ଅମିତ ଶାହ ଏବଂ ରାହୁଲ ଗାନ୍ଧୀ ।
ନିର୍ବାଚନୀ ପ୍ରଚାର ଅଭିଯାନ ପରିପ୍ରେକ୍ଷୀରେ କାଲି କଟକଠାରେ ଗୃହମନ୍ତ୍ରୀ ଶାହା ମେଗା ରୋଡ ସୋ’ କରିବେ । ଅପରାହ୍ନ ୪ଟାରୁ ସହରର ଗୋପବନ୍ଧୁ ପାର୍କଠାରୁ ରୋଡ ସୋ’ ଆରମ୍ଭ କରି ପ୍ରତ୍ୟେକ ବଡ ବଡ ଛକ ଯେପରିକି- ବକ୍ସି ବଜାର, ଦରଘା ବଜାର, ତିନି କୋଣିଆ ବଗିଚା ଚୌଧୁରୀ ବଜାର, ଶେଖ୍ ବଜାର ଦେଇ ଚଣ୍ଡୀ ମନ୍ଦିର ପାଖରେ ପହଞ୍ଚିବେ । ଏନେଇ କଟକ ନଗର ବିଜେପି ସଭାପତି ଲଲାଟେନ୍ଦୁ ବଡୁ ସୂଚନା ଦେଇଛନ୍ତି ।
ଆସନ୍ତାକାଲି ଅପରାହ୍ନରେ ଶାହ ସ୍ବତନ୍ତ୍ର ହେଲିକପ୍ଟର ଯୋଗେ ଆସି ବାଲିଯାତ୍ରା ଉପର ପଡିଆରେ ଓହ୍ଲାଇବେ । ଏହାପରେ ବକ୍ସି ବଜାରର ଗୋପବନ୍ଧୁ ପାର୍କ ରୋଡ ସୋ ଆରମ୍ଭ କରିବେ । ଏଥିପାଇଁ ବିଜେପି ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି ।
ସେପଟେ ଆସନ୍ତାକାଲି କଂଗ୍ରେସ ନେତା ରାହୁଲ ଗାନ୍ଧୀ ମଧ୍ୟ ଓଡ଼ିଶା ଆସି ବଲାଙ୍ଗୀରରେ ପ୍ରଚାର କରିବାର କାର୍ଯ୍ୟକ୍ରମ ରହିଛି । କଂଗ୍ରେସ ପ୍ରାର୍ଥୀଙ୍କ ସପକ୍ଷରେ ଭୋଟ ମାଗିବାକୁ ରାହୁଲ ଗାନ୍ଧି ଆସନ୍ତା ୧୫ ତାରିଖରେ ବଲାଙ୍ଗୀର ଆସିବେ। ଏଠାରେ ସେ କଂଗ୍ରେସର ଲୋକସଭା ଓ ବିଧାନସଭା ପ୍ରାର୍ଥୀମାନଙ୍କ ପାଇଁ ପ୍ରଚାର କରିବେ।
ରାହୁଲ ବାଇକ ରାଲି ସହ ଜନସଭାରେ ଲୋକଙ୍କୁ ସମ୍ବୋଧନ କରିବେ। ରାହୁଲ ଗାନ୍ଧିଙ୍କ ଗସ୍ତକୁ ନେଇ ବଲାଙ୍ଗୀର କଂଗ୍ରେସ ବିଧାୟକ ପ୍ରାର୍ଥୀ ସମରେନ୍ଦ୍ର ମିଶ୍ର ସୂଚନା ଦେଇଛନ୍ତି।
ରାହୁଲ ଗାନ୍ଧି ଏହାପୂର୍ବରୁ ଏପ୍ରିଲ ୨୮ରେ ସାଲେପୁର ଆସି କଂଗ୍ରେସ ପାଇଁ ପ୍ରଚାର କରିଥିଲେ। ମେ’ ୩ରେ ମଧ୍ୟ ସେ ରାୟଗଡ଼ା ଆସିବାର ଥିଲା। କିନ୍ତୁ ରାଏବରେଲ ସେଦିନ ରାହୁଲ ନାମାଙ୍କନ ଭରିଥିଲେ।
