ଆସନ୍ତା ୫ ତାରିଖରେ କଟକ ଆସୁଛନ୍ତି କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର

 Sunstar TV

ଭୁବନେଶ୍ୱର : କଟକରେ ବିଜେଡି ପ୍ରାର୍ଥୀମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବ୍ରାଣ୍ଡ କରି ପ୍ରଚାର ମଇଦାନରେ ଅବତୀର୍ଣ୍ଣ ହୋଇଥିବା ବେଳେ ବିଜେପି ପକ୍ଷରୁ ଛିଡା ହୋଇଥିବା କଟକ ଲୋକସଭା ପ୍ରାର୍ଥୀ ଭର୍ତ୍ତୃହରି ମହତାବ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ବ୍ରାଣ୍ଡ କରି ପ୍ରଚାର ମଇଦାନକୁ ଓହ୍ଲାଇଛନ୍ତି । ତେବେ ଭର୍ତ୍ତୃହରିଙ୍କ ସପକ୍ଷରେ ତଥା ମୋଦି ବ୍ରାଣ୍ଡ ସପକ୍ଷରେ ଆସନ୍ତା ୫ ତାରିଖ ରବିବାର ଦିନ ବିଜେପିର ଷ୍ଟାର ପ୍ରଚାରକ ତଥା କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର କଟକ ଆସୁଥିବା ଖବର ନିଜେ ଭର୍ତ୍ତୃହରି ଦେଇଛନ୍ତି । ସ୍ଥାନୀୟ ନିଶାମଣି କନଭେନସନ ହଲରେ ଆୟୋଜିତ ହେବାକୁ ଥିବା ଏକ କାର୍ଯ୍ୟକ୍ରମରେ ଏସ. ଜୟଶଙ୍କର ସହ ବିଜେପିର ବହୁ ନେତା, କର୍ମୀ, ଶୁଭେଚ୍ଛୁ ତଥା ସମର୍ଥକମାନେ ଉପସ୍ଥିତ ରହିବେ। ସମଗ୍ର ଦେଶରେ ଏବେ ମୋଦି ହାୱା ଚାଲୁଥିବାରୁ ଓ ରାଜ୍ୟ ବିଜେପି ନେତୃତ୍ବ ଡବଲ ଇଞ୍ଜିନ ସରକାରର ନାରା ଦେଇ ଲଢୁଥିବା ବେଳେ ଏସ. ଜୟଶଙ୍କରଙ୍କ କଟକ ଗସ୍ତ ପ୍ରଚାର କାର୍ଯ୍ୟକ୍ରମ ନିର୍ବାଚନ ମାହୋଲକୁ ଆହୁରି ସରଗରମ କରିବ ବୋଲି ଆଶା କରାଯାଉଛି । ଏହା ସହ ଚଳିତ ନିର୍ବାଚନ ଲାଗି ଆଗାମୀ ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ,ଗୃହ ମନ୍ତ୍ରୀ ଅମିତ ଶାହ ମଧ୍ୟ ପ୍ରଚାରର ମଙ୍ଗ ଧରିବା ଲାଗି ଓଡିଶା ଆସିବେ ବୋଲି କଟକ ସିଡିଏରେ ଆୟୋଜିତ ଏକ ବୁଦ୍ଧିଜୀବୀ ସାକ୍ଷାତ କାର୍ଯ୍ୟକ୍ରମରେ ଯୋଗ ଦେଇ କହିଛନ୍ତି ଭର୍ତ୍ତୃହରି ।