SUNSTARTV
ମୟୂରଭଞ୍ଜ: ଖେଳିବାକୁ ଆସିଥିଲା ନଦୀ ପଠାକୁ । ନଦୀ ପଠାରେ ବାଲି ବାହାର କରିବା ସମୟରେ ଘଟିଗଲା ଅଘଟଣ । ଧସକିଲା ଅତଡା, ଆଉ ଅତଡା ତଳେ ଚାପି ହୋଇ ଚାଲିଗଲା ନାବାଳକର ଜୀବନ । ଏଭଳି ଘଟଣା ଘଟିଛି ମୟୂରଭଞ୍ଜ ଜିଲ୍ଲା କପ୍ତିପଦା ଥାନା ବେଲଡିହା ନଦୀ ନିକଟରେ ।
ପଥରସାହି ଗ୍ରାମର ପ୍ରଶାନ୍ତ ନାୟକଙ୍କ ଏକ ମାତ୍ର ପୁଅ ହେଉଛି ପ୍ରକାଶ ନାୟକ । ଅପରାହ୍ନ ସମୟରେ ନଦୀ ପଠରେ ବସି ଖେଳୁଥିଲା । ନଦୀ ପଠାରେ ଖେଳିବା ସମୟରେ କୂଳରୁ ବାଲି ସଂଗ୍ରହ କରିବା ସହିତ ନଦୀ ପଠାରେ ଶୋଇ ବାଲି ଖୋଳି ବାହାର କରୁଥିଲା । ବାଲି ବାହାର କରିବା ସମୟରେ ତା ଉପରେ ଧସକି ପଡିଥିଲା ମାଟି ଅତଡା । ଫଳରେ ମାଟି ଅତଡା ତଳେ ଚାପି ହୋଇ ରହିଯାଇଥିଲା ନାବାଳକ ପ୍ରକାଶ । ଏହା ଦେଖିପାରି ସ୍ଥାନୀୟ ଲୋକେ କପ୍ତିପଦା ଦମକଳ ବିଭାଗକୁ ଖବର ଦେବା ପରେ ଦମକଳ ବିଭାଗ କର୍ମଚାରୀ ଘଟଣାସ୍ଥଳରେ ପହଂଚି ନାବାଳକ ଜଣକୁ ଉଦ୍ଧାର କରି ଚିକିତ୍ସା ନିମନ୍ତେ ଉଦଳା ଡାକ୍ତରଖାନାରେ ଭର୍ତି କରିଥିଲେ । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । । ଏଭଳି ଏକ ଘଟଣା ସ୍ଥାନୀୟ ଅଂଚଳରେ ଶୋକାକୁଳ ପରିବେଶ ସୃଷ୍ଟି କରିଛି ।
