SunstarTV
ପ୍ରଧାନମନ୍ତ୍ରୀଙ୍କ ପରେ ଏବେ ଚିଠି ଲେଖିଲେ ମୁଖ୍ୟମନ୍ତ୍ରୀ । ସାଢେ ୪ କୋଟି ଓଡିଶାବାସୀଙ୍କ ନିକଟକୁ ମାନ୍ୟବର ମୁଖ୍ୟମନ୍ତ୍ରୀ ଶ୍ରୀଯୁକ୍ତ ନବୀନ ପଟ୍ଟନାୟକଙ୍କ ଚିଠି। ସାଢେ ଚାରି କୋଟି ଓଡିଶାବାସୀଙ୍କ ଭଲପାଇବା ଏବଂ ଅକୁଣ୍ଠ ବିଶ୍ୱାସ ବଳରେ ସେବା କରିବାର ସୁଯୋଗ ପାଇଥିବାରୁ କୃତଜ୍ଞତା ଜଣାଉଛି।ଆଉ କିଛି ଦିନ ଭିତରେ ରାଜ୍ୟବାସୀ ଦେଶର ରାଜନୀତିରେ ନୂଆ ଇତିହାସ ସୃଷ୍ଟି କରିବାକୁ ଯାଉଛନ୍ତି।ସାଢେ ୪ କୋଟି ଓଡିଶାବାସୀ ମୋ ପରିବାର । ସମସ୍ତଙ୍କ ସୁଖ, ଦୁଃଖ, ସୁବିଧା, ଅସୁବିଧାରେ ସବୁବେଳେ ସମସ୍ତଙ୍କ ପାଖରେ ରହିଛି।
୨୦୩୬ ସୁଦ୍ଧା ଓଡିଶାକୁ ସମସ୍ତ କ୍ଷେତ୍ରରେ ୧ ନମ୍ବର ରାଜ୍ୟ କରିବାକୁ ଦୃଢ ସଂକଳ୍ପର ସହ ଆଗକୁ ବଢୁଛି ।ଆସନ୍ତୁ ଏହି ସଂକଳ୍ପକୁ ଆହୁରି ସୁଦୃଢ କରିବା ସହ ନବୀନ ଓଡିଶା, ସଶକ୍ତ ଓଡିଶା ଗଠନ କରିବା ଦିଗରେ ସଭିଏଁ ମିଶି କାର୍ଯ୍ୟ କରିବା।
ଏହାସହିତ ନିର୍ବାଚନ ଆଚରଣବିଧି ଦୃଷ୍ଟିରୁ ମୁଖ୍ୟମନ୍ତ୍ରୀ ଙ୍କ ଅଭିଯୋଗ ଶୁଣାଣି ବନ୍ଦ ରହିବ ବୋଲି ସୂଚନା ଦିଆ ଯାଇଛି ।
ଆଗାମୀ ଲୋକସଭା ଓ ବିଧାନସଭା ନିର୍ବାଚନ ପରିପ୍ରେକ୍ଷୀରେ ଆଦର୍ଶ ଆଚରଣବିଧି ଘୋଷଣା ହୋଇଥିବାରୁ ନିର୍ବାଚନ ପ୍ରକିୟା ସମ୍ପୂର୍ଣ୍ଣ ହେଲା ପର୍ଯ୍ୟନ୍ତ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ ରେ ଅଭିଯୋଗ ଶୁଣାଣି ବନ୍ଦ ରହିବ।
ସୂଚନା ମୁତାବକ ବିଜେପି ସରକାରକୁ ୧୦ବର୍ଷ ପୂରଣ ଅବସରରେ ପ୍ରଧାନମନ୍ତ୍ରୀ ଚିଠି ଜରିଆରେ ଦେଶବାସୀଙ୍କ ପାଇଁ ବାର୍ତ୍ତା ଜାରି କରିଥିଲେ । ଯେଉଁଥିରେ ଦେଶବାସୀଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ କହିଛନ୍ତି, ଆପଣମାନଙ୍କ ସହ ଆମର ସମ୍ପର୍କକୁ ୧୦ ବର୍ଷ ପୂରିଲା । ୧୪୦ କୋଟି ଭାରତୀୟଙ୍କ ବିଶ୍ୱାସ ଏବଂ ସମର୍ଥନ ମୋତେ ବହୁତ ପ୍ରେରଣା ଦେଇଛି ।
ଲୋକଙ୍କ ଜୀବନରେ ଯେଉଁ ପରିବର୍ତ୍ତନ ଆସିଛି, ତାହା ଗତ ୧୦ ବର୍ଷରେ ଆମ ସରକାର ପାଇଁ ସବୁଠାରୁ ବଡ଼ ଉପଲବ୍ଧି । ଆପଣମାନଙ୍କ ସମର୍ଥନ ଓ ବିଶ୍ୱାସ ଯୋଗୁଁ ବିଗତ ୧୦ବର୍ଷରେ ଆମେ ବିଭିନ୍ନ ଐତିହାସିକ ପଦକ୍ଷେପ ମାନ ଗ୍ରହଣ କରିଛୁ । ଧାରା ୩୭୦ ହଟାଇବା, ତିନି ତଲାକ ରୋକିବା, ଚାଷୀଙ୍କୁ ଆର୍ଥିକ ସହାୟତା, ଆୟୁଷ୍ମାନ ଭାରତ ମାଧ୍ୟମରେ ମାଗଣା ଚିକିତ୍ସା, ସଂସଦରେ ମହିଳାଙ୍କ ଭାଗିଦାରୀ ବୃଦ୍ଧି କରିବା, ନୂଆ ସଂସଦ ଭବନର ଉଦଘାଟନ କରିବା ଶ୍ରେଷ୍ଠ ଉପଲବ୍ଧି ବୋଲି ପ୍ରଧାନମନ୍ତ୍ରୀ ନିଜ ବାର୍ତ୍ତାରେ ପ୍ରକାଶ କରି କହିଛନ୍ତି ।
