ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର : ଟୁରିଷ୍ଟ ବସ୍ ଧକ୍କାରେ ଯୁବକଙ୍କ ମୃତ୍ୟୁ। ଘଟଣାସ୍ଥଳରୁ ଲୋକଙ୍କୁ ଘଉଡ଼ାଇବା ପାଇଁ ଲାଠିଚାର୍ଜ କଲା ପୋଲିସ୍। ସୂଚନାଯୋଗ୍ୟ ଯେ, ବୁଧବାର ସନ୍ଧ୍ୟାରେ ଆମ୍ବେଦକର ନଗରର ରୋନକ ନାଏକ ନାମକ ଜଣେ ନାବାଳକ ସ୍କୁଟିରେ ଯାଉଥିବା ସମୟରେ ମ୍ୟୁନିସିପାଲ୍ଟି ବାଳିକା ବିଦ୍ୟାଳୟ ସମ୍ମୁଖରେ ଏକ ବସ୍ ତାଙ୍କୁ ଧକ୍କା ଦେଇଥିଲା। ଉକ୍ତ ଦୁର୍ଘଟଣା ରେ ରୋନକଙ୍କ ମୃତ୍ୟୁ ହୋଇଥିଲା। ଏନେଇ ଉତ୍ୟକ୍ତ ଲୋକେ ଅଭିଯୋଗ ଆଣିଛନ୍ତି ଯେ ସହର ଭିତରକୁ ଟୁରିଷ୍ଟ ବସ ପ୍ରବେଶ ନିଷେଧ ଥିବାବେଳେ କେମିତି ଆସିଲା ବସ ? ପୋଲିସ ଓ ଟ୍ରାଫିକ ପୋଲିସ କାହିଁକି ଅଟକାଇଲା ନାହିଁ ? ଏମିତିକି ଲୋକେ ଉକ୍ତ ବସ୍ଟିକୁ ଭଙ୍ଗାରୁଜା ମଧ୍ୟ କରିଥିଲେ।
ଲୋକଙ୍କ ମଧ୍ୟରେ ଉତ୍ତେଜନା ବଢ଼ିବାର ଲାଗିଥିଲା, ବୁଝାସୁଝା ପରେ ବି ସ୍ଥିତି ଅଣାୟତ୍ତ ହେବାରୁ ପୋଲିସ୍ ଲାଠିଚାର୍ଜ କରିଥିଲା। ପରେ ସ୍ଥିତି ନିୟନ୍ତ୍ରଣରେ ରହିଛି। ଘଟଣାସ୍ଥଳରେ ବିଭିନ୍ନ ଥାନାର ଆଇଆଇସି ଉପସ୍ଥିତ ଅଛନ୍ତି। ତେବେ କିଛି ଲୋକଙ୍କୁ ମଧ୍ୟ ଥାନାକୁ ନିଆଯାଇଥିବା ସୂଚନା ରହିଛି। ସେପଟେ ”ବସ୍ ଏବଂ ଡ୍ରାଇଭର ପୋଲିସ ହେପାଜତର ରହିଛନ୍ତି, ଘଟଣାର ତଦନ୍ତ କରାଯିବ” ବୋଲି କହିଛନ୍ତି ଅତିରିକ୍ତ ଏସପି।
