ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର : ହାଇକୋର୍ଟରୁ ଜାମିନ ପରେ ଆଜି ଝାରପଡ଼ା ଜେଲରୁ ମୁକୁଳିବେ ବହୁ ଚର୍ଚ୍ଚିତ ଅର୍ଚ୍ଚନା ନାଗ। ଏବେ ତାଙ୍କ ରହିବ ନେଇ ଏକ ବଡ ପ୍ରଶ୍ନବାଚୀ ? ଭୁବନେଶ୍ୱର ସତ୍ୟବିହାର ଘରେ ନା ଆଉ କେଉଁଠି ତାହା ସ୍ପଷ୍ଟ ହୋଇନାହିଁ। କୌଣସି ସାକ୍ଷୀଙ୍କୁ ସେ ପ୍ରଭାବିତ କରିବେ ନାହିଁ। ପୂର୍ବରୁ ଖଣ୍ଡଗିରି ଓ ନୟାପଲ୍ଲୀ ଥାନା ମାମଲାରେ ଅର୍ଚ୍ଚନାଙ୍କୁ ଜାମିନ ମିଳିଥିଲା।
ବଦଳିବ ଅର୍ଚ୍ଚନା ନାଗଙ୍କ ଠିକଣା। ବର୍ଷେ ଦୁଇ ମାସ ଧରି ଜେଲରେ ରହିବା ପରେ ଆସନ୍ତାକାଲି ସେ ଜାମିନରେ ମୁକୁଳିବେ। ଇଡି ମାମଲାରେ ହାଇକୋର୍ଟରୁ ମିଳିଥିବା ଜାମିନରେ ରହିଥିବା ସର୍ତ୍ତ ଅନୁଯାୟୀ, ଦୁଇ ଲକ୍ଷ ଟଙ୍କାର ଦୁଇ ଜଣ ଜାମିନଦାର ଦେବେ ଅର୍ଚ୍ଚନା। କୌଣସି ସାକ୍ଷୀଙ୍କୁ ପ୍ରଭାବିତ କରିବେ ନାହିଁ। କୋର୍ଟର ଡେଟ୍ ରେ ବ୍ୟକ୍ତିଗତ ଭାବେ ହାଜର ହେବେ। ଯଦି ହାଜର ହୋଇ ନପାରନ୍ତି ତେବେ କୋର୍ଟଙ୍କୁ ସନ୍ତୋଷଜନକ ଉତ୍ତର ଦେବେ ଅର୍ଚ୍ଚନା। ପାସପୋର୍ଟ ଦାଖଲ କରିବେ। ତଦନ୍ତରେ ସହଯୋଗ କରିବେ। ତଦନ୍ତକାରୀ ସଂସ୍ଥାକୁ ଅର୍ଚ୍ଚନା ନାଗ ନିଜର ଠିକଣା ଓ ମୋବାଇଲ ଫୋନ ନମ୍ବର ଦେବେ ବୋଲି ଜାମିନ ସର୍ତ୍ତ ରହିଛି।
