ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର : ବାହାନଗା ଟ୍ରେନ ଦୁର୍ଘଟଣା ପରେ ବଗି ଗୁଡିକ କାଟିବା ପାଇଁ ଆସିଥିବା ଜଣେ ଶ୍ରମିକ ଘଟଣା ସ୍ଥଳରୁ ନିଖୋଜ ହୋଇଯାଇଥିବା ଅଭିଯୋଗ ଆସିଛି। ଗତ ଅକ୍ଟୋବର ୨୮ତାରିଖରେ ରେଳଡ଼ବା କାଟିବା ପାଇଁ ବିହାର ମୁଙ୍ଗେର ଜିଲ୍ଲା ରତନପୁର ଗାଁର ସଦନନ୍ଦ ଗୁପ୍ତାଙ୍କ ବଡ଼ ପୁଅ ଅଜୟ ଗୁପ୍ତା,ସାନପୁଅ ବିଟୋ ଗୁପ୍ତା ଉଭୟ ବାହାନଗା ଆସିଥିଲେ। ଦୁଇ ଭାଇ କାମ କରୁଥିବା ଵେଳେ ହଠାତ ଗତ ୮ ତାରିଖରୁ ସାନ ଭାଇ ବିଟୋକୁ ପାଉନାହାନ୍ତି। ସେ କେଉଁଆଡ଼େ ଚାଲିଗଲେ ସେ ତାଙ୍କୁ ପାଉନଥିବା ନେଇ ଥାନାରେ ଅଭିଯୋଗ କରିଛନ୍ତି ଅଜୟ।
ଅଭିଯୋଗ ପରେ ବିଟୋକୁ ପାଇବା ପାଇଁ ଵିଭିନ୍ନ ସ୍ଥାନ ଖୋଜାଖୋଜି କରୁଛି ପୋଲିସ। କିନ୍ତୁ ଏଯାବତ ବିଟୋଙ୍କ ପତ୍ତା ମିଳୁନଥିବା ପୋଲିସ ପକ୍ଷରୁ ସୂଚନା ଦିଆଯାଇଛି। ସେପଟେ ନିଖୋଜ ବିଟୋକୁ ନପାଇ ଦୁଃଖରେ ଭାଙ୍ଗି ପଡିଛନ୍ତି ଵଡ଼ଭାଇ। ଭଙ୍ଗାରୁଜା ରେଳଵଗି କାଟିବାକୁ ଆସି ଶ୍ରମିକ ନିଖୋଜ ଘଟଣା ସ୍ଥାନୀୟ ଅଞ୍ଚଳରେ ଦୁଃଖ ଆଣି ଦେଇଛି। ଏହି ବଡ଼ ଟ୍ରେନ ଦୁର୍ଘଟଣାର ଦୁଃଖ ଆଜି ମଧ୍ୟ ଲୋକଙ୍କ ମନରୁ ଲିଭିନଥିବାବେଳେ ପୁଣି ଜଣେ ଶ୍ରମିକ ନିଖୋଜ ଥିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ତେବେ ସେ କେଉଁଆଡ଼େ ଯାଇଛନ୍ତି କିମ୍ବା କିଛି ଅଘଟଣ ଘଟିଛି ତାହା ଏବେ ସମସ୍ତଙ୍କ ମନରେ ପ୍ରଶ୍ନ ଉଠିଛି।
