ସନଷ୍ଟାର ଟିଭି ବ୍ୟୁରୋ
ଉଦଳା; ସଙ୍କଟରେ ଗଜରାଜ । ପୁଣି ଶିମିଳିପାଳ ଆଭ୍ୟନ୍ତରୀଣ ଅଂଚଳରେ ଏକ ହାତୀର ମୃତ୍ୟୁ । ଯାହାକୁ ନେଇ ଶିମିଳିପାଳରେ ହାତୀଙ୍କର ସୁରକ୍ଷା ଏବଂ ବନବିଭାଗର କାର୍ଯ୍ୟଦକ୍ଷତାକୁ ନେଇ ପୁଣି ଛିଡା ହୋଇଛି ବଡ ପ୍ରଶ୍ନ ଚିହ୍ନ । କପ୍ତିପଦା ରେଞ୍ଜ ରାଇପାଳ ବିଟ ପଦ୍ମପୋଖରୀ ବାଘଧରସାହି ଜଙ୍ଗଲରେ ଏକ ହାତୀର ମୃତ୍ୟୁ ହୋଇଥିବା ବନବିଭାଗ ଖବର ପାଇଥିଲା । ଖବର ପାଇ କପ୍ତିପଦା ବନାଂଚଳ କର୍ମଚାରୀ ଘଟଣାସ୍ଥଳରେ ପହଂଚି ମୃତଦେହ ଦେଖିବା ପରେ ହାତୀଟି ଏକ ଦନ୍ତାହାତୀ ହୋଇଥିବା ବେଳେ ତାହାର ବୟସ ୧୦ ରୁ ୧୫ ବର୍ଷ ହେବ ବୋଲି ଜଣାଯାଇଛି । ତେବେ ହାତୀ ମୃତ୍ୟୁ ପଛର କାରଣ ଅସ୍ପଷ୍ଟ ରହିଥିବା ବେଳେ ହାତୀଟି କେଉଁ କାରଣରୁ ମୃତ୍ୟୁବରଣ କରିଛି ତାହାର ତଦନ୍ତ କରୁଛି ବନବିଭାଗ । ତେଣେ ଆସନ୍ତାକାଲି ମୃତ ହାତୀର ବ୍ୟବଚ୍ଛେଦ କରାଯିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ସୂଚନା ଦେଇଛନ୍ତି ଡିଏଫଓ । ତେବେ ହାତୀଟିକୁ କେହି ଶିକାରୀ ଶିକାର କରିବା ନିମନ୍ତେ ହତ୍ୟା କରିଛନ୍ତି ନା ହାତୀ କୌଣସି ରୋଗରେ ଆକ୍ରାନ୍ତ ହୋଇ ମୃତ୍ୟୁ ବରଣ କରିଛି ତାହାକୁ ନେଇ ଏବେ ବି ଦ୍ୱନ୍ଦ ।
