ସନଷ୍ଟାର ଟିଭି ବ୍ୟୁରୋ
ନୂଆଦିଲ୍ଲୀ: ତୃତୀୟ ଥର ପାଇଁ ବିବାହ କଲେ ପାକିସ୍ତାନର ପୂର୍ବ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପତ୍ନୀ ରେହମ ଖାନ |ରେହମ ଯାହାଙ୍କୁ ବିବାହ କରିଛନ୍ତତି ତାଙ୍କ ନାମ ହେଉଛି ମିର୍ଜା ବିଲାଲ । ସେ ପାକିସ୍ତାନର ମୂଳ ବାସିନ୍ଦା, ହେଲେ ସେ ଏବେ ଆମେରିକାରେ ରହୁଛନ୍ତି । ସେପଟେ ୪୯ ବର୍ଷିୟା ରେହମ ପେଶାରେ ଜଣେ ସାମ୍ବାଦିକା । ରେହମ ଖାନଙ୍କ ଭଳି ମିର୍ଜା ବିଲାଲ ପ୍ରଥମରୁ ଦୁଇଥର ବିବାହ କରିଛନ୍ତି । ଏହାସହ ତାଙ୍କର ଗୋଟିଏ ପିଲା ମଧ୍ୟ ରହିଛି । ମିର୍ଜା ଓ ରେହମ୍ ଆମେରିକାରେ ବିବାହ କରିଥିବା କଥା ପାକିସ୍ତାନ ଗଣମାଧ୍ୟମରେ ପ୍ରକାଶ ପାଇଛି ।
ସୂଚନା ଅନୁଯାୟୀ, ରେହମ୍ ପ୍ରଥମେ ଇଜାଜ ରେହମାନଙ୍କୁ ବିବାହ କରିଥିଲେ । ସେ ୨୦୦୫ ମସିହାରେ ଇଜାଜଙ୍କୁ ଛାଡପତ୍ର ଦେଇଥିଲେ । ଏହାପରେ ୨୦୧୪ ମସିହାରେ ରେହମ ପାକିସ୍ତାନର ପୂର୍ବ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ବିବାହ କରିଥିଲେ । ୨୦୧୫ ମସିହାରେ ମଧ୍ୟ ଇମ୍ରାନ ଖାନଙ୍କୁ ଛାଡପତ୍ର ଦେଇଥିଲେ ରେହମ ଖାନ ।
ତେବେ ରେହମ ଖାନ ତୃତୀୟ ବିବାହ କରି ବେଶ ଖୁସି ଥିବା ଜଣାପଡୁଛନ୍ତି | ସୋସିଆଲ ମିଡିଆରେ ନିଜ ବାହାଘର ବେଳର ଫଟୋ ସେୟାର କରି ଲେଖିଛନ୍ତି କି, ଶେଷରେ ମୋତେ ଜଣେ ମଣିଷ ମିଳିଗଲା, ଯାହା ଉପରେ ମୁଁ ଭରଷା କରିପାରିବି ।
ରିପୋର୍ଟ : ଦୀପା ପ୍ରଧାନ
