ସନଷ୍ଟାର ଟିଭି ବ୍ୟୁରୋ
ନୂଆଦିଲ୍ଲୀ: କଂଗ୍ରେସକୁ ଭୁଲି ପାରୁନାହାନ୍ତି ଗୁଲାମନବୀ ଆଜାଦ | ଦଳ ଛାଡିବା ପରେ ବି ଆଜାଦଙ୍କ ମନରେ ରହିଛି କଂଗ୍ରେସ ପ୍ରେମ | ଆଗକୁ ଗୁଜରାଟ ଓ ହିମାଚଳ ପ୍ରଦେଶରେ ଅନୁଷ୍ଠିତ ହେବାକୁ ଯାଉଛି ବିଧାନସଭା ନିର୍ବାଚନ । ଏହି ନିର୍ବାଚନକୁ ନେଇ ରାଜନୈତିକ ଚର୍ଚ୍ଚା ଜୋର ଧରିଛି | ଏହି ସମୟରେ କଂଗ୍ରେସ ଛାଡିଥିବା ପୂର୍ବତନ କଂଗ୍ରେସ ନେତା ଗୁଲାମନବୀ ଆଜାଦଙ୍କର କଂଗ୍ରେସ ପ୍ରେମ ଦେଖିବାକୁ ମିଳିଛି । ଗୋଟିଏ ପଟେ ସେ କଂଗ୍ରେସ ଛାଡି ନିଜର ସ୍ୱତନ୍ତ୍ର ଦଳ ପ୍ରତିଷ୍ଠା କରିସାରିଥିବା ବେଳେ ଏବେ ସେ ଗୁଜରାଟ ଓ ହିମାଚଳରେ କଂଗ୍ରେସର ପ୍ରଦର୍ଶନକୁ ନେଇ ଟିପ୍ପଣୀ କରିଛନ୍ତି ।
ସେ କହିଛନ୍ତି କି, ଏବେ ମୁଁ କଂଗ୍ରେସରେ ନଥିଲେ ବି ମୁଁ ଚାହୁଁଛି କଂଗ୍ରେସ ଉଭୟ ଗୁଜରାଟ ଓ ହିମାଚଳ ପ୍ରଦେଶରେ ବିଜୟ ଲାଭ କରୁ । ସେ ଆହୁରି କହିଛନ୍ତି କି କଂଗ୍ରେସର ଧର୍ମ ନିରପେକ୍ଷତା ବିରୋଧରେ ସେ ନୁହଁନ୍ତି । ଏହାସହ ସେ ଆମ୍ ଆଦମୀ ପାର୍ଟିକୁ ଟାର୍ଗେଟ କରି କହିଛନ୍ତି ଆପ କେବଳ କେନ୍ଦ୍ରଶାସିତ ଅଞ୍ଚଳ ଦିଲ୍ଲୀର ପାର୍ଟି । ସେ କେବେ ବି ପଞ୍ଜାବରେ ସରକାର ଚଳାଇ ପାରିବ ନାହିଁ । ଏହାସହ ହିମାଚଳ ଓ ଗୁଜରାଟରେ କଂଗ୍ରେସ ହିଁ କେବଳ ବିଜେପିକୁ ଚ୍ୟାଲେଞ୍ଜ ଦେଇପାରିବ ବୋଲି କହିଛନ୍ତି ଗୁଲାମନବୀ ।
ରିପୋର୍ଟ: ଦୀପା ପ୍ରଧାନ
