ରିପୋର୍ଟ: ସଫଳତା ପାଇଲେ ସ୍ୱାମୀଙ୍କ ଜଣାଇଲେ । ଉପହାର ବଦଳରେ ମିଳିଲା ସଜା । ସରକାରୀ ଚାକିରି ପାଇଲେ ବୋଲି ସ୍ତ୍ରୀର ହାତ କାଟିଲା ସ୍ୱାମୀ । ଏଭଳି ଏକ ଘଟଣା ଘଟିଛି ଚିସିନାପୁର ର କେଟୁଗ୍ରାମରେ । ରେଣୁ ଖାତୁନ ନାମକ ଜଣେ ମହିଳା କିଛି ଦିନ ହେବ ଏକ ସରକାରୀ ଚାକିର ପାଇଁ ପରିକ୍ଷା ଦେଇଥିଲେ । ପରିକ୍ଷାରେ ରେଣୁ ଉତ୍ତୀର୍ଣ୍ଣ ହୋଇଥିଲେ । ଚାକିରିଟି ହେଉଛି ନର୍ସଙ୍କର । ତେବେ ଚାକିରି ମିଳିବା ଖବର ପାଇବା ମାତ୍ରେ ସେ ତାଙ୍କ ସ୍ୱାମୀଙ୍କୁ ଜଣାଇଥିଲେ । ତାଙ୍କ ସ୍ୱାମୀ ଶେର ମହମ୍ମଦ ଶେଖ ହୁଏତ ଏହି ଖବର ପାଇ ଖୁସି ନଥିଲେ । ତେଣୁ ଶନିବାର ଦିନ ରାତିରେ ରେଣୁ ଶୋଇଥିବା ସମୟରେ ତାଙ୍କ ଡାହାଣ ହାତକୁ କାଟି ଦେଇଛନ୍ତି ଶେର । ଧାରୁଆ ଛୁରି ସାହାଯ୍ୟରେ ହାତକୁ କାଟିବା ପରେ ସଙ୍ଗେ ସଙ୍ଗେ ତାଙ୍କୁ ପାଖ କାଟୱା ସବଡିଭିଜନାଲ ଡାକ୍ତରଖାନାକୁ ନେଇ ଯାଇଥିଲେ ସ୍ୱାମୀ ଶେର ମହମ୍ମଦ ଶେଖ । ହେଲେ କଟା ଯାଇଥିବା ହାତକୁ ଘରେ ଲୁଚାଇଦେଇଥିଲେ ଅଭିଯୁ୍କ୍ତ । ଯାହା ଫଳରେ ରେଣୁଙ୍କର ହାତକୁ ଯୋଡି ପାରିନଥିଲେ ଡାକ୍ତର । ତେବେ ସ୍ତ୍ରୀଙ୍କ ଚାକିରି ପାଇବା ସ୍ୱାମୀଙ୍କୁ ପସନ୍ଦ ଆସିନଥିଲା ବୋଲି ମହିଳାଙ୍କ ପରିବାର ଅଭିଯୋଗ କରିଛନ୍ତି ।(ରିପୋର୍ଟ:ସୋନାଲି)
