ପ୍ରେମିକା ସହ ଧାରା ପଡିଲା ବୋଲି ବନ୍ଧୁକ ଦେଖାଇ ଡ଼ରାଇଲା ଛାତ୍ର

ସନଷ୍ଟାର ଟିଭି ବ୍ୟୁରୋ

ଉଦଳା; ପ୍ରେମିକା ସହିତ ଧରା ପଡିଯିବା ପରେ ଜନସାଧାରଣଙ୍କ ଆକ୍ରୋଶରୁ ବଂଚିବା ପାଇଁ ସମସ୍ତଙ୍କୁ ବନ୍ଧୁକ ଦେଖାଇ ଧମକ ଦେଇଛନ୍ତି ଛାତ୍ର । ଯାହାକୁ ନେଇ ଛାତ୍ର ଜଣକୁ ଗିରଫ କରିଛି ପୋଲିସ୍ । ଏଭଳି ଘଟଣା ଘଟିଛି ଖୁଂଟା ଥାନା କୁଆମରା ଅଂଚଳରେ । ଗତକାଲି କୁଆମରା ଅଂଚଳରେ ସଂପର୍କୀୟ ଘରେ ରହୁଥିବା ନିଜର ପ୍ରେମିକାକୁ ଦେଖା କରିବାକୁ ଯାଇଥିଲେ ଉଦଳା ଆରଡିଏସ୍ ଡିଗ୍ରୀ କଲେଜରେ ଯୁକ୍ତ ତିନି ଦ୍ୱିତୀୟ ବର୍ଷରେ ପାଠ ପଢୁଥିବା ଯୁବକ ଅଭିଷେକ ପ୍ରଧାନ । କୁଆମରା ବଙ୍ଗଳା ନିକଟରେ ଉଭୟ ପୁଅ ଏବଂ ଝିଅ ଥିବା ବେଳେ ଝିଅର ସଂପର୍କୀୟ ଆସି ଝିଅକୁ ସେଠାରୁ ନେଇ ଯାଇଥିଲେ ।

ଏହା ପରେ ଝିଅର ପରିବାର ଲୋକେ ଏବଂ ଗ୍ରାମବାସୀମାନେ ପ୍ରେମିକକୁ ଧରି ମାଡ ମାରିଥିଲେ । ଏହି ସମୟରେ ଛାତ୍ର ଅଭିଷେକ ନିଜ ବ୍ୟାଗରୁ ଏକ ବନ୍ଧୁକ ବାହାର କରି ମାରିଦେବାର ଧମକ ଦେଇଥିଲା । ଯାହାକୁ ନେଇ ସ୍ଥାନୀୟ ଲୋକେ ପୋଲିସ୍‌କୁ ଖବର ଦେବା ପରେ ପୋଲିସ୍ ଛାତ୍ର ଜଣକୁ ଗିରଫ କରି ଅଧିକ ପଚରାଉଚରା କରୁଛି । ସେପଟେ ଏହା ଖେଳଣା ବନ୍ଧୁକ ବୋଲି ଛାତ୍ର ଜଣକ କହୁଥିବା ବେଳେ ଗିରଫ ଛାତ୍ରଙ୍କ ଘର ବାଲେଶ୍ୱର ଜିଲ୍ଲା ରେମୁଣା ଅଂଚଳରେ ବୋଲି ଜଣାପଡିଛି ।

ରିପୋର୍ଟ ; ଆଲୋକ କୁମାର ବହେରା