ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର: ମାର୍ଚ୍ଚ ୨୫ ତାରିଖ ପରେ ଓଡ଼ିଶାରେ ଦିନ ଓ ରାତିର ତାପମାତ୍ରା ବୃଦ୍ଧି ପାଇବା ସହ କେତେକ ଆଭ୍ୟନ୍ତରୀଣ ଜିଲ୍ଲାରେ ତାପମାତ୍ରା ୪୪ ଡିଗ୍ରୀ ସେଲ୍ସିୟସ୍ ଛୁଇଁବାର ସମ୍ଭାବନା ଥିବା ବେଳେ ଉପକୂଳବର୍ତୀ ଅଂଚଳରେ ୩୮ ରୁ ୪୦ ଡିଗ୍ରୀ ସେଲ୍ସିୟସ୍ ମଧ୍ୟରେ ରହିପାରେ ବୋଲି ଶିକ୍ଷା ଓ ଅନୁସନ୍ଧାନ ( ସୋଆ ) ପରିଚାଳିତ ପରିବେଶ ଓ ଜଳବାୟୁ କେନ୍ଦ୍ର ( ସିଇସି ) ପକ୍ଷରୁ ସୂଚନା ଦିଆଯାଇଛି । ବର୍ତ୍ତମାନ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ୩୯ ରୁ ୪୧ ଡିଗ୍ରୀ ମଧ୍ୟରେ ଓ ଉପକୂଳବର୍ତୀ ଜିଲ୍ଲାଗୁଡ଼ିକରେ ୩୬ ରୁ ୩୭ ଡିଗ୍ରୀ ତାପମାତ୍ରା ରହୁଛି ଓ ଏହା ମାର୍ଚ୍ଚ ୨୫ ତାରିଖ ଯାଏଁ ଜାରି ରହିବ । ତେବେ ଉତ୍ତର ପଶ୍ଚିମ ଦିଗରୁ ଆସୁଥିବା ଶୁଷ୍କ ଗରମ ପବନ ଦ୍ରବୀଭୂତ ହୋଇ ରାଜ୍ୟ ଆଡକୁ ମୁହାଁଉଥିବାରୁ ଏହି ସମୟରେ ଆଭ୍ୟନ୍ତରୀଣ ଏବଂ ପଶ୍ଚିମ ଓଡ଼ିଶାର ଜିଲ୍ଲାଗୁଡ଼ିକରେ ତାପମାତ୍ରା ଯଥାକ୍ରମେ ୪୦ ଡିଗ୍ରୀ ଏବଂ ୪୪ ଡିଗ୍ରୀ ଅତିକ୍ରମ କରିବାର ସମ୍ଭାବନା ଥିବା ସିଇସି ପକ୍ଷରୁ କୁହାଯାଇଛି ।
ଇତିମଧ୍ୟରେ ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଘନୀଭୂତ ହୋଇଥିବା ଡିପ୍ ଡିପ୍ରେସନ୍ ମଙ୍ଗଳବାର ମିଆଁମାର ଉପକୂଳ ଅତିକ୍ରମ କରିଥିବା ବେଳେ କେନ୍ଦ୍ର ଭାରତ ଉପରେ ଅବସ୍ଥିତ ଅପର୍ ଏୟାର ଟ୍ରଫ ପୂର୍ବ ଦିଗ ଆଡ଼କୁ ଗତି କରି ମାର୍ଚ୍ଚ ୨୬ ସୁଦ୍ଧା ଉତ୍ତର ପୂର୍ବ ଭାରତ ଓ ଉତ୍ତର ବଙ୍ଗୋପସାଗର ଉପରେ ପହଂଚିବାର ସମ୍ଭାବନା ରହିଛି । ମଙ୍ଗଳବାର ରୁ ଗୁରୁବାର ମଧ୍ୟରେ ଗଜପତି , ଗଞ୍ଜାମ , ନୟାଗଡ , ବାଲେଶ୍ଵର , ଯାଜପୁର , କେନ୍ଦୁଝର ଏବଂ ମୟୂରଭଞ୍ଜ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ସାମାନ୍ୟରୁ ମଧ୍ୟମ ଧରଣର ବର୍ଷା ହେବା ସହ ଘୂର୍ଣ୍ଣିବାତ୍ୟା ହେବାର ସମ୍ଭାବନା ରହିଛି । ତେବେ ଏହାର ପ୍ରଭାବରେ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ ବୋଲି ସୂଚନା ଦିଆଯାଇଛି ।
