ସନଷ୍ଟାର ଟିଭି ବ୍ୟୁରୋ
ଉଦଳା : ପଥରରେ ଛେଚି ଭୁଜାଲିରେ ହାଣି ଯୁବକଙ୍କୁ ଅତି ବିଭତ୍ସ ଭାବେ ହତ୍ୟା କରିଛନ୍ତି ଦୁବୃର୍ତ୍ତ। ତେବେ ଏଭଳି ଘଟଣା ଘଟିଛି ଶରତ ଥାନା ଶ୍ରୀପଦମଞ୍ଜରୀ ଗ୍ରାମରେ। ଶ୍ରୀପଦମଞ୍ଜରୀ ଗ୍ରାମର ଲେଣ୍ଡୁ ସିଂ ଗତକାଲି ନିକଟସ୍ଥ ଶୁଖୁଆପଟା ହାଟକୁ ମାଂସ ବିକ୍ରୀ କରିବାକୁ ଯାଇଥିଲେ । ହେଲେ ବିଳମ୍ବିତ ରାତି ପର୍ଯ୍ୟନ୍ତ ସେ ଘରକୁ ଫେରି ନଥିଲେ । ପରେ ସ୍ଥାନୀୟ ଲୋକେ ରାସ୍ତା କଡରେ ଲେଣ୍ଡୁଙ୍କ ମୃତଦେହ ପଡିଥିବା ଦେଖି ତାଙ୍କ ପରିବାର ଲୋକଙ୍କୁ ଖବର ଦେଇଥିଲେ । ପରିବାର ଲୋକେ ଘଟଣାସ୍ଥଳରେ ପହଞ୍ଚି ତାଙ୍କ ଭାଇଙ୍କୁ କେହି ଦୁବୃର୍ତ୍ତ ପଥରରେ ଛେଚିବା ସହିତ ଭୁଜାଲିରେ ହାଣି ମାରି ଦେଇଥିବା ଦେଖିବାକୁ ପାଇଥିଲେ । ପରେ ଏ ନେଇ ଶରତ ପୋଲିସ୍କୁ ଖବର ଦେବା ପରେ ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏହା ସହିତ ବାରିପଦାରୁ ସାଇଣ୍ଟିଫିକ୍ ଟିମ ଘଟଣାସ୍ଥଳରେ ପହଞ୍ଚି ତଦନ୍ତକୁ ତ୍ୱରାନ୍ୱିତ କରିଛି । ତେବେ ସନ୍ଧ୍ୟା ସମୟରେ ଏହି ହତ୍ୟାକାଣ୍ଡ ଘଟିଥିବା ଅନୁମାନ କରାଯାଉଥିବା ବେଳେ ଏଭଳି ଏକ ଜଘନ୍ୟ ହତ୍ୟାକାଣ୍ଡ କିଏ ଭିଆଇଲା ତାହା ଏବେ ବି ଅସ୍ପଷ୍ଟ ରହିଛି । ଲେଣ୍ଡୁଙ୍କର ପୂର୍ବରୁ କୌଣସି ଶତୃତା କିମ୍ବା କୌଣସି ବିବାଦ ନ ଥିବା ବେଳେ ତାଙ୍କୁ କିଏ ଏବଂ କାହିଁକି ଏଭଳି ବିଭତ୍ସ ଭାବେ ହତ୍ୟା କରିଲା ତାହାର ତଦନ୍ତ କରୁଛି ପୋଲିସ୍ ।(ରିର୍ପୋଟ:ଆଲୋକ କୁମାର ବେହେରା)
