ସନଷ୍ଟାର ଟିଭି ବ୍ୟୁରୋ
ଭୁବନେଶ୍ବର : ଓଡ଼ିଶାର ନୂତନ ମହାନିର୍ଦେଶକ ଭାବେ ନିଯୁକ୍ତି ପାଇଥିବା ୧୯୮୭ ବ୍ୟାଚର ଆଇପିଏସ୍ ସୁନୀଲ କୁମାର ବଂଶଲ ଆଜି ଦାୟିତ୍ଵ ନେବେ । ଗୁରୁବାର ରାତ୍ରୀରେ ଶ୍ରୀ ବଂଶଲ ରାଜଧାନୀରେ ପହଞ୍ଚିଛନ୍ତି । ଶୁକ୍ରବାର ଅପରାହ୍ନରେ ବକ୍ସିବଜାରସ୍ଥିତ ପୁଲିସ ମୁଖ୍ୟାଳୟରେ ଶ୍ରୀ ବଂଶଲ ପହଞ୍ଚି ବିଧବଦ୍ଧ ଭାବେ କାର୍ଯ୍ୟଭାର ଗ୍ରହଣ କରିବେ ବୋଲି କାର୍ଯ୍ୟକ୍ରମ ସ୍ଥିର କରାଯାଇଛି। ଏନେଇ ସମସ୍ତପ୍ରକାର ବନ୍ଦୋବସ୍ତ ହୋଇସାରିଥିବା ପୁଲିସ ମୁଖ୍ୟାଳୟ ପକ୍ଷରୁ ସୂଚନା ମିଳିଛି । ୧୯୮୬ ବ୍ୟାଚର ଆଇପିଏସ ଅଭୟଙ୍କ କାର୍ଯ୍ୟକାଳର ଆଜି ସମାପ୍ତି ହେଉଛି । ନୂଆ ବର୍ଷ ପୂର୍ବରୁ ନୂତନ ମହାନିର୍ଦେଶକ ଭାବେ ଆଜି ପୁଲିସ ମହାନିର୍ଦେଶକ ଶ୍ରୀ ବଂଶଲ ଦାୟିତ୍ଵ ଗ୍ରହଣ କରିବେ । ନୂଆବର୍ଷରୁ ଶ୍ରୀ ବଂଶଲ ତାଙ୍କ କାର୍ଯ୍ୟାରମ୍ଭ କରିବେ । ୨୦୨୨ ଜୁନ୍ରେ ଶ୍ରୀ ବଂଶଲଙ୍କ ଚାକିରି କାଳର ୬୦ ବର୍ଷ ପୂରଣ ହେଉଛି । କେନ୍ଦ୍ର ଲୋକ ସେବା ଆୟୋଗ ନିୟମ ଅନୁସାରେ ଜଣେ ପୁଲିସ ମହାନିର୍ଦେଶକ ଭାବରେ ଅତିକମ୍ରେ ୨ ବର୍ଷ ଚାକିରି କରିବେ । ଗୁରୁବାର ପ୍ରାୟ ରାତି ୯ଟାରେ ଭୁବନେଶ୍ବର ବିମାନବନ୍ଦରରେ ଶ୍ରୀ ବଂଶଲ ପହଞ୍ଚିବା ପରେ ପୁଲିସ ଆୟୁକ୍ତ ସୌମେନ୍ଦ୍ର ପ୍ରିୟଦର୍ଶୀ , ଉପାୟୁକ୍ତ ଡ . ଉମାଶଙ୍କର ଦାଶ ପ୍ରମୁଖ ତାଙ୍କୁ ସ୍ବାଗତ କରିଥିଲେ ।
