ସନଷ୍ଟାର ଟିଭି ବ୍ୟୁରୋ
ଭୁବନେଶ୍ବର: କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ରେ ଦିବ୍ୟାଙ୍ଗ ଓ ମାନସିକ ଅନଗ୍ରସର ଛାତ୍ରଛାତ୍ରୀଙ୍କ ପାଇଁ ସ୍ପେସାଲ୍ ଏଜୁକେସନ୍ ନିଡ୍ ( ଏସ୍ଇଏନ) ଗ୍ଲୋବ୍ ଉଦ୍ଘାଟିତ ହୋଇଯାଇଛି । ଏଥିରେ ବିଭିନ୍ନ ବର୍ଗର ଦିବ୍ୟାଙ୍ଗ ଓ ମାନସିକ ଅନଗ୍ରସର ଛାତ୍ରଛାତ୍ରୀଙ୍କ ପାଇଁ ଉନ୍ନତ ଉପଚାରାତ୍ମକ ଚିକିତ୍ସା ସହ ଶିକ୍ଷା ପ୍ରଦାନ କରାଯିବ । ଆଜି ନ୍ୟାସ୍ନାଲ୍ ସେଣ୍ଟର ଫର୍ ଅଟିଜିମ୍ର ପ୍ରତିଷ୍ଠାତା ନିର୍ଦ୍ଦେଶିକା ମେରୀ ବରୁଆ , ପଶ୍ଚିମ ବଙ୍ଗ ଅଟିଜିମ୍ ସୋସାଇଟିର ପ୍ରତିଷ୍ଠାତା ନିର୍ଦ୍ଦେଶିକା ଇନ୍ଦ୍ରାଣୀ ବାସୁ , କିଟ୍ ଓ କିସ୍ ପ୍ରତିଷ୍ଠାତା ଅଚ୍ୟୁତ ସାମନ୍ତ , କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ର ଚେୟାରପର୍ସନ ଡ . ମୋନାଲିସା ବଳଙ୍କ ଉପସ୍ଥିତିରେ ଏହି ବିଭାଗ ଉଦ୍ଘାଟିତ ହୋଇଥିଲା । ଏହି ଅବସରରେ ମେରୀ ବରୁଆ କହିଲେ , ଏସ୍ଇଏନ୍ ଗ୍ଲୋବ୍ ପ୍ରତିଷ୍ଠା କରି କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ ଏକ ଉଦାହରଣ ସୃଷ୍ଟି କରିଛି । କିଟ୍ ଶିକ୍ଷାନୁଷ୍ଠାନ ସମୂହ ଓ କିସ୍ରେ ୪ଶହରୁ ଉର୍ଦ୍ଧ୍ଵ ଦିବ୍ୟାଙ୍ଗ କାର୍ଯ୍ୟ କରୁଥିବା ଗର୍ବ ଓ ଗୌରବର ବିଷୟ । ଦିବ୍ୟାଙ୍ଗଙ୍କ ପାଇଁ ଏଭଳି ଏକ ସ୍ଵତନ୍ତ୍ର ବିଭାଗ ପ୍ରତିଷ୍ଠା କରିବାରେ କିଟ୍ର କ୍ଷମତା , ଭିତ୍ତିଭୂମି ଓ ପ୍ରଶାସନିକ ଇଚ୍ଛାଶକ୍ତି ରହିଛି ବୋଲି ସେ କହିଥିଲେ । ଏଥିପାଇଁ ସେ ପ୍ରତିଷ୍ଠାତା ଶ୍ରୀ ସାମନ୍ତଙ୍କୁ ସାଧୁବାଦ ଜଣାଇଥିଲେ । ସେ ଆହୁରି ମଧ୍ୟ କହିଲେ , ଏହି ବିଭାଗ ଦିବ୍ୟାଙ୍ଗ ଓ ମାନସିକ ଅନଗ୍ରସର ଶିଶୁଙ୍କ ପାଇଁ ଗେମ୍ ଚେଞ୍ଜର ସାବ୍ୟସ୍ତ ହେବ । ଏହା ମାଧ୍ୟମରେ ବିଶ୍ଵକୁ ଅନ୍ତର୍ଭୁକ୍ତି କଣ ତାହା ଦେଖାଇ ଦିଆଯାଇପାରେ । କିଟ୍ ଓ କିସ ପ୍ରତିଷ୍ଠାତା ଶ୍ରୀ ସାମନ୍ତ କହିଲେ , ଭାରତର ସମଗ୍ର ପୂର୍ବାଞ୍ଚଳରେ କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ ପ୍ରକୃତରେ କହିବାକୁ ଗଲେ ଅନ୍ତର୍ଜାତୀୟ । ଏହି ସ୍କୁଲ ସବୁ କ୍ଷେତ୍ରରେ ଉତ୍କର୍ଷତା ପ୍ରତିପାଦନ କରିଆସୁଛି । କିଟ୍ ଶିକ୍ଷାନୁଷ୍ଠାନ ସମୂହ ଓ କିସ୍ରେ ଆମେ ବ୍ୟବସ୍ଥିତ ଢଙ୍ଗରେ ଅନ୍ତର୍ଭୁକ୍ତ ନୀତି ଆପଣାଇବା ଯୋଗୁଁ ଦିବ୍ୟାଙ୍ଗ ଛାତ୍ରଛାତ୍ରୀ ଓ କର୍ମଚାରୀମାନେ ଏଠାରେ ସୁବିଧାରେ ଶିକ୍ଷାଗ୍ରହଣ , କାର୍ଯ୍ୟ ସମ୍ପାଦନ ଓ ବଢ଼ିବାରେ ସକ୍ଷମ ହୋଇପାରିଛନ୍ତି । କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ର ଏହି ବିଭାଗ ଦିବ୍ୟାଙ୍ଗ ଓ ମାନସିକ ଅନଗ୍ରସର ଛାତ୍ରଛାତ୍ରୀଙ୍କ ପାଇଁ ବେଶ ସହାୟକ ହେବ ବୋଲି ସେ କହିଥିଲେ । କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ ସର୍ବଦା ଏଭଳି ଛାତ୍ରଛାତ୍ରୀଙ୍କ ପାଇଁ ପ୍ରତିଶ୍ରୁତିବଦ୍ଧ ଏବଂ ସ୍ଵତନ୍ତ୍ର ଶିକ୍ଷା ଉପରେ ଗୁରୁତ୍ଵ ଦେଇ ଆସୁଛି । କିଟ୍ ଇଣ୍ଟରନ୍ୟାସ୍ନାଲ୍ ସ୍କୁଲ୍ର ଚେୟାରପର୍ସନ ଡ . ବଳ ସୂଚନା ଦେଇ କହିଲେ , ଏହି ବିଭାଗରେ ପ୍ରାୟ ୭୦ ଜଣ ଦିବ୍ୟାଙ୍ଗ ଓ ମାନସିକ ଅନଗ୍ରସର ଛାତ୍ରଛାତ୍ରୀ ପାଠ ପଢ଼ୁଥିବା ବେଳେ ସେମାନଙ୍କ ପାଇଁ ୨୬ଜଣ ପ୍ରଫେସନାଲ୍ଙ୍କୁ ନିଯୁକ୍ତି ଦିଆଯାଇଛି । ଏମାନଙ୍କ ମଧ୍ୟରେ କେତେକ ଛାତ୍ରଛାତ୍ରୀଙ୍କ ପଢ଼ିବାରେ ସମସ୍ୟା ରହିଥିବା ବେଳେ ଆଉ କେତେକଙ୍କଠାରେ ପାଠ ପଢ଼ାରେ କମ୍ ଧ୍ୟାନ ଦେଇପାରିବା , ମାନସିକ ଅନଗ୍ରସର ଏବଂ ଅନ୍ୟ କେତେକଙ୍କର ଧୀଶକ୍ତିର ଅଭାବ ରହିଛି । ଏହି ଛାତ୍ରଛାତ୍ରୀଙ୍କ ବିଭିନ୍ନ ଆବଶ୍ୟକତାକୁ ଦୃଷ୍ଟିରେ ରଖୁ ଆମେ ଅକୁପେସନାଲ୍ ଥେରାପି , ସ୍ପିଡ୍ ଥେରାପି , ସ୍ପେସାଲ୍ ଏଜୁକେସନ୍ , କଗ୍ନିଟିଭ ଥେରାପି , ବ୍ୟବହାରରେ ଉନ୍ନତି ଆଣିବା ଏବଂ ପରାମର୍ଶ ଦେବା ଆଦି ବ୍ୟବସ୍ଥା କରିଛୁ । ସ୍କୁଲ୍ର ଅଧ୍ୟକ୍ଷ ଡ . ସଞ୍ଜୟ ସୁଆର ଧନ୍ୟବାଦ ଅର୍ପଣ କରିଥିଲେ ।
