ସନଷ୍ଟାର ଟିଭି ବ୍ୟୁରୋ
ଉଦଳା: ଅବକାରୀ ବିଭାଗ ଏବଂ ଫ୍ଲାଇଙ୍ଗ ସ୍କ୍ୱାର୍ଡ ମିଳିତ ଭାବେ ଏକ ନକଲି ମଦ କାରଖାନା ଉପରେ ଚଢାଉ କରିଛନ୍ତି । ଉଦଳା ଅବକାରୀ ବିଭାଗ ଏବଂ କଟକର ଫ୍ଲାଇଙ୍ଗ ସ୍କ୍ୱାର୍ଡ ଉଦଳା ଥାନା ଅଧିନ ବେଗୁନିଆଡିହା ଗ୍ରାମରେ ଚଢାଉ କରିଥିବା ବେଳେ ଏକ ଘର ଭିତରେ ନକଲି ମଦ ପ୍ରସ୍ତୁତ ହେଉଥିଲା । ଏହି ମଦ କାରଖାନାରୁ ଅବକାରୀ ବିଭାଗ ୧୨୦ ଲିଟର ସ୍ପିରିଟ୍, ମଦ ବୋତଲ ପ୍ରସ୍ତୁତିରେ ବ୍ୟବହୃତ ମେସିନ୍, ନକଲି ଲୋଗ, ଷ୍ଟିକର ଆଦି ଜବତ କରିବା ସହିତ ଜଣେ ଅଭିଯୁକ୍ତକୁ ଗିରଫ କରିଛି । ଗିରଫ ଅଭିଯୁକ୍ତ ଜଣକ ଦୁତିକାଦେଇପୁର ଗ୍ରାମର ପରେଶ ପରିଡା । ତେବେ ମାତ୍ର ଦଶ ଦିନ ମଧ୍ୟରେ ଉଦଳା ଅଂଚଳରେ ଏହା ଦ୍ୱିତୀୟ ନକଲି ମଦ କାରଖାନା ଉପରେ ଚଢାଉ । ଗତ ୩ ତାରିଖରେ ଅବକାରୀ ବିଭାଗ ପୁରୁଣାପାଣି ଗ୍ରାମରେ ଚାଲିଥିବା ନକଲି ମଦ କାରଖାନା ଉପରେ ଚଢାଉ କରି ବିପୁଳ ପରିମାଣର ମଦ ଜବତ କରିବା ସହିତ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଥିଲା ।( ରିର୍ପୋଟ:ଆଲୋକ କୁମାର ବେହେରା)
