ସନଷ୍ଟାର ଟିଭି ବ୍ୟୁରୋ
ପୁରୀ: ଆଜି ବିଶ୍ବପ୍ରସିଦ୍ଧ ରଥ ଯାତ୍ରା । ଭକ୍ତଙ୍କୁ ଦର୍ଶନ ଦେବା ଲାଗି ବର୍ଷକୁ ଥରେ ମନ୍ଦିର ବାହାରକୁ ଆସନ୍ତି ଭକ୍ତପ୍ରିୟ ଭଗବାନ ।ଏହି ପବିତ୍ର ଘୋଷ ଯାତ୍ରାକୁ ଦେଖିବା ପାଇଁ ସାରା ଜଗତ ଚାହିଁ ରହିଥାଏ । ଲକ୍ଷ ଲକ୍ଷ ଭକ୍ତ ବଡ଼ଦାଣ୍ଡରେ ରୁଣ୍ଡ ହୋଇଥାନ୍ତି । ତେବେ ଚଳିତ ବର୍ଷ କିନ୍ତୁ ସମ୍ପୂର୍ଣ୍ଣ ଭିନ୍ନ । ବଡ଼ଦାଣ୍ଡ ପୁରା ଖାଁ ଖାଁ । କରୋନା ମହାମାରୀ ପାଇଁ ଭକ୍ତ ସମାଗମ ଉପରେ ପ୍ରତିବନ୍ଧକ ଲଗାଇଛନ୍ତି ସରକାର ।
ତେବେ ଜଗତର ନାଥ ଜଗନ୍ନାଥ ନିଜ ଭାଇ ଭଉଣୀଙ୍କୁ ସାଥିରେ ଧରି ବଡଦାଣ୍ଡ କୁ ଓହ୍ଲାଇବେ ଓ ଭକ୍ତ ତାଙ୍କ ଦର୍ଶନ ପାଇବ ନାହିଁ, ଏହା କେବେ ସମ୍ଭବ ନୁହେଁ । ଟିଭି ଖୋଲି ବ୍ରହ୍ମାଣ୍ଡବାସୀ ତୃଷାର୍ତ୍ତ ନୟନରେ ଚାହିଁ ବସିଛନ୍ତି ଶ୍ରୀକ୍ଷେତ୍ରର ମଉଡ଼ମଣି ମହାପ୍ରଭୁ ଶ୍ରୀଜଗନ୍ନାଥଙ୍କ ଘୋଷଯାତ୍ରାକୁ ।
ଶ୍ରୀମନ୍ଦିରରେ ସକାଳ ଧୂପ ବଢ଼ିବା ପରେ ସକାଳ ରଥ ପ୍ରତିଷ୍ଠା ହୋଇଛି । ସକାଳ ୭ଟା ୧୦ରୁ ଶ୍ରୀବିଗ୍ରହଙ୍କ ପହଣ୍ଡି ଆରମ୍ଭ ହୋଇଛି । ଅପରାହ୍ଣ ୩ଟାରେ ରଥଟଣା ଆରମ୍ଭ ହେବ । ଅପରାହ୍ଣ ୨ଟା ସୁଦ୍ଧା ଗଜପତି ମହାରାଜା ଛେରା ପହଁରା ରାଜନୀତି ସମ୍ପନ୍ନ କରିବେ । ଅପରାହ୍ନ ୩ଟାରେ ତିନି ରଥ ଶ୍ରୀଗୁଣ୍ଡିଚା ମନ୍ଦିର ଯାତ୍ରା ହେବା ନେଇ ଛତିଶା ନିଯୋଗ ବୈଠକରେ ନିଷ୍ପତ୍ତି ହୋଇଛି । ନିର୍ଦ୍ଦେଶନାମା ମୁତାବକ କେବଳ କୋଭିଡ୍ ଟେଷ୍ଟ ହୋଇଥିବା ସେବାୟତ ଏବଂ ପୁଲିସ ବଳ ରଥଯାତ୍ରାରେ ସାମିଲ ହେବେ ।
