ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର: ଆଜି ରାଜଧାନୀରେ ପ୍ରତିଷ୍ଠା ହେବାକୁ ଥିବା ବିଶ୍ୱସ୍ତରୀୟ କ୍ୟାନ୍ସର ହସ୍ପିଟାଲର ଭିତ୍ତପ୍ରସ୍ତର ସ୍ଥାପନ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ଦୁଇଟି କ୍ୟାନସର ହସ୍ପିଟାଲର ଭିତ୍ତପ୍ରସ୍ତର ସ୍ଥାପନ କରିବେ ।
ଏହି ହସ୍ପିଟାଲ ପାଇଁ ଜଟଣୀ ଅଞ୍ଚଳରେ ଥିବା ଇନ୍ଫୋସିଟି-୨ରେ ୨୦ରୁ ୨୫ ଏକର ଜମି ସଂପୂର୍ଣ୍ଣ ମାଗଣାରେ ଯୋଗାଇ ଦେଇଛନ୍ତି । କ୍ୟାନ୍ସରର ସବୁ ବିଶ୍ୱସ୍ତରୀୟ ଚିକିତ୍ସା ଏହି ହସ୍ପିଟାଲରେ ମିଳିବ । ଖାଲି ରୋଗୀ ଚିକିତ୍ସା ନୁହେଁ, କ୍ୟାନ୍ସର ରୋଗର ବିଶ୍ୱସ୍ତରୀୟ ଗବେଷଣା ମଧ୍ୟ ଏଠାରେ ହେବ । କ୍ୟାନ୍ସରର ନୂଆ ନୂଆ ଚିକିତ୍ସାଠୁ ଆରମ୍ଭ କରି ଅନ୍ୟ ଦିଗକୁ ନୂଆ ଦିଶା ଦେବ ଜଟଣୀରେ ହେବାକୁ ଥିବା କ୍ୟାନ୍ସର ହସ୍ପିଟାଲ । ହସ୍ପିଟାଲ ପାଇଁ ଚଳିତ ବର୍ଷ ଏପ୍ରିଲ ୧୪ରେ ଏମ୍ଓୟୁ (ବୁଝାମଣା ପତ୍ର) ସ୍ୱାକ୍ଷର ହୋଇଥିଲା । ଦୁଇ ହସ୍ପିଟାଲର ନିର୍ମାଣ ପାଇଁ ସୁବ୍ରତୋ ଓ ସସ୍ମିତା ବାଗଚୀ ୩୪୦ କୋଟି ଦାନ କରିଛନ୍ତି । ସରକାରଙ୍କ ନିୟନ୍ତ୍ରଣରେ ହସ୍ପିଟାଲ ରହିବ । ଏହାର ପରିଚାଳନା ଦାୟିତ୍ୱ ନେବ ଶ୍ରୀ ଶଙ୍କର କ୍ୟାନ୍ସର ଫାଉଣ୍ଡେସନ୍ । ପ୍ରାଥମିକ ପର୍ଯ୍ୟାୟରେ ୨୫୦ ବେଡ୍ ରହିବ । ପରେ ଏହାକୁ ୫୦୦ ବେଡ୍କୁ ବଢାଯିବ । ତେବେ ଏଠାରେ ୨୫% ରୋଗୀଙ୍କୁ ମାଗଣାରେ ଚିକିତ୍ସା ସୁବିଧା ମିଳିବ ।
ପାଲିଏଟିଭ୍ କେୟାର ସେଣ୍ଟର ପାଇଁ ବାଗଚୀ-କରୁଣାଶ୍ରୟ ହସ୍ପିସ୍ ଟ୍ରଷ୍ଟ ମଧ୍ୟରେ ଏମଓୟୁ ସ୍ୱାକ୍ଷର ହୋଇଛି । କେନ୍ଦ୍ରରେ ଯନ୍ତ୍ରଣା ଉପଶମ ସେବା ଯୋଗାଇ ଦିଆଯିବ । ଉଭୟ ହସ୍ପିଟାଲ ୨୦୨୪ ସୁଦ୍ଧା ନିର୍ମାଣ ସରିବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଭୟ ହସ୍ପିଟାଲ ପାଇଁ ଭିତ୍ତିପ୍ରସ୍ତର ଦେବେ । ଉପସ୍ଥିତ ରହିବେ ସୁବ୍ରତୋ ଓ ସସ୍ମିତା ବାଗଚୀ, ଶ୍ରୀ ଶଙ୍କର କ୍ୟାନ୍ସର ହସ୍ପିଟାଲ ଓ ଗବେଷଣା କେନ୍ଦ୍ରର ପରିଚାଳନା ଟ୍ରଷ୍ଟି ଡ. ଶ୍ରୀନାଥ ବି ଏସ୍ । ହସ୍ପିଟାଲରେ କେମୋ ଥେରାପି, ଇମ୍ୟୁନୋଥେରାପି, କ୍ୟାନ୍ସର ସର୍ଜରୀ, ରେଡିଏସନ୍ ଥେରାପି, ପେଟ ସିଟି, ଏଣ୍ଡୋସ୍କୋପି, ଡାଇଗ୍ନୋସିସ୍, କ୍ଲିନିକାଲ ପାଥୋଲୋଜି, ହିଷ୍ଟୋପାଥୋଲୋଜି, କ୍ରିଟିକାଲ କେୟାର, ଆଡ଼ଭାନ୍ସ ଇମାଜିଂ ଓ ଟେଲିମେଡିସିନ୍ ସେବା ମିଳିବ ।
