ସନଷ୍ଟାର ଟିଭି ବ୍ୟୁରୋ
ଯାଜପୁର : ଆସନ୍ତାକାଲି ପ୍ରତ୍ୟେକ ଓଡିଆ ଘରେ ବିବାହିତା ମହିଳାମାନେ ପାଳନ କରିବାକୁ ଯାଉଛନ୍ତି ସାବିତ୍ରୀ ବ୍ରତ । ଏହି ଅବସରରେ ମହିଳାମାନେ ପୂଜାର୍ଚ୍ଚନା ପାଇଁ ବିଭିନ୍ନ ଦେବାଦେବୀ ମନ୍ଦିରରେ ଭିଡ ଜମାଇଥାନ୍ତି। ତେବେ ଏହାକୁ ଦୃଷ୍ଟିରେ ରଖି ଯାଜପୁର ସହରର ୫ଟି ମୁଖ୍ୟ ଦେବାଦେବୀ ମନ୍ଦିରରେ ୧୪୪ ଧାରା ଜାରି କରାଯାଇଛି । ଅଧିଷ୍ଠାତ୍ରୀ ଦେବୀ ମା ବିରଜା, ଯାଉଁଳି ବନ୍ଧରେ ଥିବା ମା ମଙ୍ଗଳା, ଯାଜପୁରର ଜଗନ୍ନାଥ ମନ୍ଦିର, ବରାହ ମନ୍ଦିର, ମାନସାପୋଲ ଠାରେ ଥିବା ରାମ ମନ୍ଦିରରେ ୧୪୪ ଧାରା ଜାରି କରାଯାଇଛି ।
ବର୍ତ୍ତମାନ ଯାଜପୁର ଜିଲ୍ଲାରେ କରୋନା ସଂକ୍ରମଣ ସଂଖ୍ୟା ଅଧିକ ଥିବାରୁ ଏହି ସମୟରେ ମନ୍ଦିରରେ ଏକତ୍ରିତ ହୋଇ ପୂଜାର୍ଚ୍ଚନାକୁ ଜିଲ୍ଲା ପ୍ରଶାସନ ଅନୁମତି ଦେଇନାହିଁ । ଆଜି ମଧ୍ୟରାତ୍ରରୁ ୧୦ ତାରିଖ ମଧ୍ୟ ରାତ୍ରୀ ପର୍ଯ୍ୟନ୍ତ ୧୪୪ ଧାରା ଜାରି କରାଯାଇଛି। ଯାଜପୁର ଉପ ଜିଲ୍ଲାପାଳ ଜ୍ୟୋତିଶଙ୍କର ମହାପାତ୍ର ଏନେଇ ନିର୍ଦ୍ଦେଶ ଦେବା ସହ ଯାଜପୁର ଟାଉନ ପୁଲିସକୁ ଉପରୋକ୍ତ ଅଞ୍ଚଳ ଗୁଡିକରେ ଆଇନଶୃଙ୍ଖଳା ପରିସ୍ଥିତି ଯାଞ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି ।
