ସନଷ୍ଟାର ଟିଭି ବ୍ୟୁରୋ
ନୂଆଦିଲ୍ଲୀ: ତାରଜନ ଫିଲ୍ମରେ ନିଜର ନିଖୁଣ ଅଭିନୟ ଦେଖାଇଥିବା ଲୋକପ୍ରିୟ ଅଭିନେତା ଜୋ ଲାରା ଦେହାନ୍ତ ହୋଇଯାଇଛି । ବିମାନରେ ଯାତ୍ରା କରୁଥିବା ସମୟରେ ଟେନେସିଠାରେ ଦୁର୍ଘଟଣା ଘଟି ତାଙ୍କର ମୃତ୍ୟୁ ହୋଇଛି । ମୃତ୍ୟୁ ବେଳକୁ ତାଙ୍କୁ ୫୯ ବର୍ଷ ବୟସ ହୋଇଥିଲା । ଜୋ’ଙ୍କ ସମେତ ମୋଟ ୭ ଜଣଙ୍କୁ ନେଇ ଯାଇଥିବା ବିମାନଟି ଦୁର୍ଘଟଣା ଗ୍ରସ୍ତ ହେବା ପରେ ସମସ୍ତଙ୍କ ମୃତ୍ୟୁ ଘଟିଛି । ଯେଉଁଥିରେ ତାଙ୍କ ସ୍ତ୍ରୀ ମଧ୍ୟ ରହିଥିଲେ ।
ସୂଚନା ଅନୁଯାୟୀ, ଜୋ ଲାରା ଯାଉଥିବା ବିମାନ ଟି ପ୍ରେସୀ ପ୍ରିଷ୍ଟ ହ୍ରଦରେ ଖସିପଡ଼ିଥିଲା । ତେବେ ସର୍ଚ୍ଚ ଅପରେସନ୍ ବେଳେ ଦୁର୍ଘଟଣାଗ୍ରସ୍ତ ବିମାନ ସହିତ କିଛି ମଣିଷ ଶରୀରର ମଧ୍ୟ ଖଣ୍ଡବିଖଣ୍ଡିତ ଅଂଶ ମିଳିଛି ।
ପରଲୋକଗତ ଜୋ ଲାରା ୧୯୮୯ ମସିହାରେ ଫିଲ୍ମ ତାରଜନ୍ରେ ତାରଜନ୍ ଭୂମିକାରେ ନଜର ଆସିଥିଲେ । ଏହାପରେ ସେ ଟେଲିଭିଜନ୍ ପାଇଁ ତାରଜନ୍ ସିରିଜ୍ ମଧ୍ୟ ଆରମ୍ଭ କରିଥିଲେ । ଯାହା ୧୯୯୬-୧୯୯୭ ମସିହ ଯାଏଁ ଟିଭି ପରଦାରେ ଦର୍ଶକଙ୍କ ମନୋରଞ୍ଜନ କରିଥିଲା । ଏହାଛଡା ସେ ଆକ୍ସନ ଫିଲ୍ମ ସନସେଟ୍ ହିଟ୍, ଗନସ୍ମୋକ୍, ଦ ଲାଷ୍ଟ ଆପାଚି, ଷ୍ଟିଲ୍ ଓ୍ୱାରିଅରରେ ଅଭିନୟ କରିଛନ୍ତି ।
