ସନଷ୍ଟାର ଟିଭି ବ୍ୟୁରୋ
ଭୁବନେଶ୍ୱର: ବାପାଙ୍କ ମୃତ୍ୟୁର ମାତ୍ର 10 ଦିନ ନ ପୁରୁଣୁ ଆଖି ବୁଜିଛି ପୁତ୍ର । ଦିବଂଗତ ରଘୁନାଥ ମହାପାତ୍ରଙ୍କ ପୁତ୍ର ପ୍ରଶାନ୍ତ ମହାପାତ୍ରଙ୍କ ଦେହାନ୍ତ ହୋଇଛି । ଭୁବନେଶ୍ୱର ଏମ୍ସରେ ଚିକିତ୍ସାଧୀନ ଅବସ୍ଥାରେ ଆଜି ତାଙ୍କର ମୃତ୍ୟୁ ଘଟିଛି । କୋଭିଡ୍ ଆକ୍ରାନ୍ତ ହୋଇ ଏମ୍ସରେ ଚିକିତ୍ସାଧୀନ ଥିଲେ ପ୍ରଶାନ୍ତ । ଚିକିତ୍ସା ପରେ ତାଙ୍କର କୋଭିଡ ରିପୋର୍ଟ ନେଗେଟିଭ ହୋଇଥିଲା । ସ୍ୱାସ୍ଥ୍ୟ ଅବସ୍ଥାରେ ସାମାନ୍ୟ ଉନ୍ନତି ଆସିଥିଲେ ମଧ୍ୟ ସେ ଚିକିତ୍ସାଧିନ ଥିଲେ । ମାତ୍ର ଡାକ୍ତରଙ୍କ ସବୁ ଚେଷ୍ଟା ସତ୍ତ୍ୱେ ଆଖି ବୁଜିଲେ ପ୍ରଶାନ୍ତ ।
ତେବେ ପ୍ରଶାନ୍ତ ପୂର୍ବତନ ଓଡ଼ିଆ ରଣଜୀ ଖେଳାଳି ଥିଲେ । ଓଡ଼ିଶା ପାଇଁ ଅନେକ ରଣଜୀ ମ୍ୟାଚ ଖେଳି ସେ ସୁନାମ ଅର୍ଜନ କରିଥିଲେ । ନବେ ଦଶକର ରଣଜୀ ଦଳର ଜଣେ ଦୁର୍ଦ୍ଦଶ ଓପନର ଥିଲେ ପ୍ରଶାନ୍ତ । ୪୫ଟି ପ୍ରଥମ ଶ୍ରେଣୀ, ୧୭ଟି ଲିଷ୍ଟ-A ମ୍ୟାଚ୍ ଖେଳିଥିଲେ ପ୍ରଶାନ୍ତ। ତାଙ୍କର ନିଆରା ବ୍ୟାଟିଂ ଷ୍ଟାଇଲ୍ ଯୋଗୁଁ ସେ ସ୍ୱତନ୍ତ୍ର ଭାବେ ପରିଚିତ ଥିଲେ । ରଣଜୀ କ୍ୟାରିୟରରୁ ଅବସର ନେବା ପରେ ୪୦ରୁ ଅଧିକ ମ୍ୟାଚ୍ରେ ବିସିସିଆଇ ରେଫରୀ ଭାବେ ଦାୟିତ୍ୱ ତୁଲାଇଛନ୍ତି ପ୍ରଶାନ୍ତ ।
