ସନ୍ଷ୍ଟାର ଟିଭି ବ୍ୟୁରୋ
ଶାମଲି: ଅଢେଇ ଫୁଟ ଉଚ୍ଚତାର ଅଜିମ୍ ମନସୁରୀ ବିବାହ ନ ହେଉଥିବା କଥାକୁ ନେଇ ବେଶ୍ ଚର୍ଚ୍ଚାରେ ଥିଲେ । ତେବେ ସେ ବର୍ତ୍ତମାନ ଆଉ ଏକ ଘଟଣା ପାଇଁ ଚର୍ଚ୍ଚାର ଘେରରେ ପଶିଛନ୍ତି । ଅଜିମ୍ ମନସୁରୀ ଖୁବ୍ ଶୀଘ୍ର ବିବାହ କରିବାକୁ ଯାଉଛନ୍ତି । ସେ ତାଙ୍କ ଉଚ୍ଚତାର ଝିଅଙ୍କୁ ବିବାହ କରିବାକୁ ଯାଉଛନ୍ତି । ଅଜିମଙ୍କ ବାହାଘର ଏବେ ହାପୁଡରେ ରହୁଥିବା ବୁସ୍ରାଙ୍କ ସହିତ ଠିକ୍ ହୋଇଯାଇଛି । ଦୁଇ ପରିବାରଙ୍କ ଉପସ୍ଥିତିରେ ଅଜିମ ଓ ବୁସ୍ରାଙ୍କର ନିର୍ବନ୍ଧ ମଧ୍ୟ ସରିଛି । ବୁସ୍ରାଙ୍କୁ ଅଜିମ ସୁନା ମୁଦି ଓ ୨୧୦୦ ଟଙ୍କାର ସଗୁନ୍ ଦେଇଛନ୍ତି । ସେଭଳି ବୁସ୍ରାଙ୍କ ପରିବାର ଲୋକ ମଧ୍ୟ ଅଜିମଙ୍କୁ ଏକ ସୁନା ମୁଦି ଓ ୩୧୦୦ ଟଙ୍କା ଦେଇ ବାହାଘର ପକ୍କା କରିନେଇଛନ୍ତି ।
ହାପୁଡର ମଜିଦପୁରାରୁ ସଭାସଦ ହାଜି ଆୟୁବ ଓ ଅଜୀମଙ୍କ ସମ୍ପର୍କୀୟ ଶହୀଦ ମନସୁରୀ ଏହି ବାହାଘର ଠିକ୍ କରିଛନ୍ତି । ହାଜି ଆୟୁବ ହିଁ ଅଜିମଙ୍କ ଭିଡିଓ ସୋସିଆଲ ମିଡିଆରେ ଦେଖିଥିଲେ । ଏହାପରେ ସେ ଭାବିଥିଲେ ତାଙ୍କ ଘର ପଖରେ ରହୁଥିବା ବୁସ୍ରାଙ୍କର ବାହାଘର ତାଙ୍କ ସହ କରିଦେଲେ ଠିକ୍ ହେବ । ହାଜି ଆୟୁବ ନିଜର ପ୍ରପର୍ଟି ବିଜନେସ୍ ପାର୍ଟନର ଶହୀଦ ମନସୁରୀଙ୍କୁ ଯୋଗାଯୋଗ କରିଥିଲେ । ଏହାପରେ ଦୁଇ ପରିବାର ଭିତରେ କଥା ହୋଇଥିଲେ । ଉଲ୍ଲେଖନୀୟ ଯେ, ବୁସ୍ରା ଏବେ ବିକମ୍ ପ୍ରଥମ ବର୍ଷର ଛାତ୍ରୀ । ତାଙ୍କର ବୟସ ୨୦ ବର୍ଷ । ବୁସ୍ରାଙ୍କ ଉଚ୍ଚତା ୩ ଫୁଟ୍। ପାଠପଢା ଶେଷ ହେବାମାତ୍ରେ ବୁସ୍ରା ଓ ଅଜିମ ଦୁହେଁ ବିବାହ କରିବେ ।
ସୂଚନାଯୋଗ୍ୟ, କିଛି ଦିନ ତଳେ ଏକ ଭିଡିଓ ଭାଇରାଲ୍ ହୋଇଥିଲା । ଯେଉଁଥିରେ କମ୍ ଉଚ୍ଚତା ପାଇଁ ଅଜିମ ବିବାହ କରିପାରୁନଥିଲେ ବୋଲି କହିବା ସହିତ ନିଜର ବାହାଘର ପାଇଁ ମୁଖ୍ୟମନ୍ତ୍ରୀଙ୍କଠାରୁ ନେଇ ଜିଲାର ଅଫିସରଙ୍କ ପର୍ଯ୍ୟନ୍ତ ସମସ୍ତଙ୍କୁ ଗୁହାରୀ କରିଥିଲେ । କିଛି ଦିନ ତଳେ ମହିଳା ଥାନାକୁ ଯାଇ ପୋଲିସ ଆଗରେ ନିଜ ବାହାଘର ପାଇଁ ଗୁହାରୀ କରିଥିଲେ । ଏହାପରେ ସୋସିଆଲ୍ ମିଡିଆରେ ଏହି ଭିଡିଓ ଖୁବ୍ ଭାଇରାଲ୍ ହୋଇଥିଲା । ଏପରିକି ଏହି ଭିଡିଓ ଦେଖି ଭାଇଜାନ ସଲମାନ ଖାନ୍ ମଧ୍ୟ ତାଙ୍କୁ ମୁମ୍ଵାଇ ଡାକିଥିଲେ ।
