ସନ୍ଷ୍ଟାର ଟିଭି ବ୍ୟୁରୋ
ଭୁବନେଶ୍ୱର: ଖୁବ୍ ଶୀଘ୍ର ଓଡ଼ିଶାରେ ନିର୍ମାଣ ହେବାକୁ ଯାଉଛି ଇନ୍ଡୋର ଆଥଲେଟିକ୍ ଟ୍ରାକ୍ ।ଏନେଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୂଚନା ଦେଇଛନ୍ତି । ନିକଟରେ ‘ସ୍ପୋର୍ଟଷ୍ଟାର’ ପକ୍ଷରୁ ଓଡ଼ିଶାକୁ ଦଶନ୍ଧିର ଶ୍ରେଷ୍ଠ କ୍ରୀଡ଼ା ପ୍ରୋତ୍ସାହନକାରୀ ରାଜ୍ୟ ଭାବେ ପୁରସ୍କୃତ କରାଯାଇଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପୁରସ୍କାର ସମାରୋହରେ ଉପସ୍ଥିତ ରହି ପୁରସ୍କାର ଗ୍ରହଣ କରିବା ସମୟରେ କହିଥିଲେ, ଓଡ଼ିଶା ଦେଶର ବୃହତ୍ତମ ହକି ଷ୍ଟାଡିୟମ ରାଉରକେଲାରେ ନିର୍ମାଣ କରୁଛି । ସେମିତି ଦେଶର ପ୍ରଥମ ଇନ୍ଡୋର ଆଥଲେଟିକ୍ ଟ୍ରାକ୍ ମଧ୍ୟ ଆମେ ନିର୍ମାଣ କରିବାକୁ ଯାଉଛୁ । ହୁଏତ ଆମେ ଦେଶର ପ୍ରଥମ ରାଜ୍ୟ ଭାବେ ପ୍ରତ୍ୟେକ ସହରାଞ୍ଚଳରେ ଇନ୍ଡୋର ସ୍ପୋର୍ଟ୍ସ ହଲ୍ ଏବଂ ଖେଳ ପଡ଼ିଆ ନିର୍ମାଣ କରିବାର ଯୋଜନା କରିଛୁ । ଯେଉଁ ଯୋଜନା ଖୁବ୍ ଶୀଘ୍ର ଆରମ୍ଭ ହେବ ।
ତେବେ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସଚିବ ଭିନିଲ କ୍ରିଷ୍ଣା ଗତ ତା. ୨୩-୩-୨୦୨୧ରେ ଚିଠି ଲେଖି ସମସ୍ତ ଜିଲ୍ଲାର ଜିଲ୍ଲାପାଳ, କମିଶନର ଓ ମ୍ୟୁନସିପାଲ କର୍ପୋରେସନ୍କୁ ଏ ବିଷୟରେ ଅବଗତ କରାଇଛନ୍ତି । ଚିଠିରେ ଭିତ୍ତିଭୂମିର ନିର୍ମାଣ ପାଇଁ ଉପଯୁକ୍ତ ଜମି ଚୟନ କରାଯିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି ।
