ସନ୍ଷ୍ଟାର ଟିଭି ବ୍ୟୁରୋ
ମୁମ୍ବାଇ: ଦକ୍ଷୀଣ ସୁନ୍ଦରୀ ଅଭିନେତ୍ରୀ ରଶ୍ମିକା ମନ୍ଦନା ଏବେ ବଲିଉଡ୍ରେ ପାଦ ଥାପିବାକୁ ଯାଉଛନ୍ତି । ଫିଲ୍ମ ‘ମିସନ୍ ମଜ୍ନୁ’ ରେ ଅଭିନେତା ସିଦ୍ଧାର୍ଥ ମଲହୋତ୍ରାଙ୍କ ସହ ନଜର ଆସିବାକୁ ଯାଉଛନ୍ତି ରଶ୍ମିକା । ଏହି ଫିଲ୍ମଟି ଦେଶାତ୍ମବୋଧକ ଉପରେ ଆଧାରିତ ।
ବଲିଉଡ୍ରେ ପ୍ରଥମ ଥର ନୂଆ ଟିମ୍ ସହ ଯୋଡ଼ି ହୋଇଥିଲେ ମଧ୍ୟ ରଶ୍ମିକା ସମସ୍ତଙ୍କ ସହ ବେଶ ଆରାମରେ କାମ କରୁଛନ୍ତି । ତାଙ୍କ ସହ କାମ କରିବାରେ କୌଣସି ସଦସ୍ୟ ଅସୁବିଧା ମଣୁନାହାନ୍ତି । ଫିଲ୍ମ ସେଟ୍ରେ ତାଙ୍କ ଏନର୍ଜିକୁ ସମସ୍ତେ ତାରିଫ କରୁଛନ୍ତି । ରଶ୍ମିକା ଏବେ ପୂରା ଫିଲ୍ମ ଟିମ୍ର ଅତି ଆପଣାର ହୋଇଛନ୍ତି । ଟିମ୍ର ସମସ୍ତ ସଦସ୍ୟ ଫିଲ୍ମରେ ତାଙ୍କ ଚରିତ୍ର ନାଁରେ ତାଙ୍କୁ ସମ୍ବୋଧନ କରୁଛନ୍ତି, ଯାହା ଖୁବ୍ କମ୍ ଦେଖିବାକୁ ମିଳେ । ଏଥିରୁ ଜଣେ କଳାକାରଙ୍କ ଦକ୍ଷତା ସ୍ପଷ୍ଟ ବାରିହୁଏ । ରଶ୍ମିକା ନିଜକୁ ସମ୍ପୂର୍ଣ୍ଣ ନିଜ ଚରିତ୍ର ଭିତରେ ହଜାଇ ଦେଇଛନ୍ତି ।
ସେଥିପାଇଁ ନିଜ ନାଁ ବଦଳରେ ଫିଲ୍ମର ଚରିତ୍ର ନାଁରେ ସେ ପରିଚିତ ହେଉଛନ୍ତି । ଦକ୍ଷିଣ ସିନେ ଇଣ୍ଡଷ୍ଟ୍ରିରେ ଦର୍ଶକଙ୍କୁ ଏକାଧିକ ହିଟ୍ ଫିଲ୍ମ ଭେଟି ଦେବା ପରେ ରଶ୍ମିକା ଏବେ ବଲିଉଡ୍ରେ ନୂଆ ଧାରା ଆରମ୍ଭ କରିବାକୁ ଅଣ୍ଟା ଭିଡ଼ିଛନ୍ତି । ‘ମିସନ୍ ମଜ୍ନୁ’କୁ ନେଇ ତାଙ୍କର ଅନେକ ଆଶା । ଫିଲ୍ମଟି ବଲିଉଡ୍ରେ ତାଙ୍କୁ ପରିଚିତ କରିବ ବୋଲି ସେ ଆଶା ବାନ୍ଧିଛନ୍ତି । ‘ଡିୟର କମ୍ରେଡ୍’, ‘ଗୀତ ଗୋବିନ୍ଦମ୍’ ଓ ‘ସାରିଲେରୁ ନିକେଭାରୁ’ ଭଳି ଫିଲ୍ମ ପାଇଁ ରଶ୍ମିକା ବେଶ ପରିଚିତି ପାଇଛନ୍ତି । ହିନ୍ଦୀ ସିନେମାରେ ତାଙ୍କ ମ୍ୟାଜିକ୍ ଦେଖିବାକୁ ଦର୍ଶକ ବେଶ ଉତ୍ସାହର ସହ ଅପେକ୍ଷା କରିଛନ୍ତି ।
